KDB raskryŭ karupcyjnuju schiemu ŭ ałkaholnaj halinie, a ŭ pres-słužbie ŭrada paviedamili ab vyzvaleńni ad zajmanych pasadaŭ staršyni kancerna «Biełdziaržcharčpram» Alaksandra Zabieły i hiendyrektara «Minsk Kryštal Hrup» Stanisłava Jodzisa. Raniej ab adstaŭcy Zabieły paviedamlali krynicy, choć letam jamu pradkazvali pasadu ambasadara Biełarusi ŭ Kazachstanie, piša TUT.BY.
Va ŭradzie TUT.BY raspaviali i pra inšyja zvalnieńni na pradpryjemstvach kancernaŭ «Biełdziaržcharčpram» i «Biełnaftachim». Z-za vyjaŭlenych faktaŭ karupcyjnaj dziejnaści ŭ AAT «Minsk Kryštal», AAT «Viciebski likiora-harełačny zavod «Prydźvińnie», AAT «Pinski vinarobny zavod»i AAT «Chimramont» pa roznych padstavach zvolnienyja siem kiraŭnikoŭ roznych uzroŭniaŭ.
Padrabiaznaści spravy paviedamili na telekanale «Biełaruś-1». Siem kryminalnych spraŭ raspačata za atrymańnie chabaru i adna — za daču chabaru. Čatyry fihuranty znachodziacca pad vartaj.
«U pole zroku apieratyŭnikaŭ patrapili dva biznesmieny, jakija łabiravali za chabar intaresy svaich kamiercyjnych kampanij. Za hrašovaje ŭznaharodžańnie vyrašali zadačy pastavak preparataŭ, inhredyjentaŭ i absłuhoŭvańnia abstalavańnia. Słužbovyja asoby pradpryjemstvaŭ ałkaholnaj pramysłovaści ŭ Minskaj i Viciebskaj abłaściach atrymlivali za sadziejničańnie ad 500 da 15 tysiač dalaraŭ u zaležnaści ad sumy kantraktu», — raspaviali ŭ siužecie.
Adznačajecca, što fihuranty pryznalisia ŭ ździejśnienych złačynstvach i supracoŭničajuć sa śledstvam.
Nahadajem, u vieraśni pravaachoŭnyja orhany zacikavilisia top-mieniedžarami ałkaholnych zavodaŭ. U pryvatnaści, havorka išła ab hałoŭnym inžynieru kirujučaj kampanii «Minsk Kryštal Hrup» Alaksandru Žarynie, kiraŭniku «Viciebskaha likiora-harełačnaha zavoda «Prydźvińnie» Michasiu Vasileŭskim i dyrektaru Čašnickaha śpirtzavoda «Čysty vytok 1872» Dźmitryju Niaśmirnym. Infarmacyi ab dvuch pieršych užo niama na sajtach pradpryjemstvaŭ. Cikava, što Žaryn uvachodziŭ u kamisiju «Minsk Kryštal Hrup» pa supraćdziejańni karupcyi i ŭznačalvaŭ konkursnuju kamisiju pa praviadzieńni zakupak abstalavańnia, śviedčyć spravazdačnaść kampanii.
Ciapier čytajuć
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?6
Palitviaźniaŭ pa ŭsioj krainie apytvajuć: paśla pamiłavańnia vy chočacie zastacca ŭ Biełarusi ci źjazdžać?
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Kamientary