Kiraŭnik Pradstaŭnictva ES: Pahadnieńnie pa vizach padpisać možna choć zaŭtra, ale jość adno ale
Pra heta zajaviŭ u intervju Tut.by kiraŭnik Pradstaŭnictva ES u Biełarusi Dzirk Šubiel.
Siońnia pahadnieńnie ab spraščeńni vizavaha režymu ŭžo prajšło ŭsie stadyi ŭzhadnieńnia i hatova da padpisańnia. Ale Dzirk Šubiel adznačaje, što jość adno ale.
— Pahadnieńnie pa spraščeńni vizavaha režymu źviazana z pahadnieńniem pa readmisii, i abodva pahadnieńni pavinny ŭstupić u siłu adnačasova. Pracedury z boku ES krychu bolš składanyja, čym ź biełaruskaha boku: Biełaruś — adna kraina z centralizavanaj sistemaj kiravańnia, a ES składajecca z 28 krain. Akramia taho, niekatoryja krainy Jeŭrasajuza ŭvachodziać u šenhienskuju zonu, i pamiž imi niama nijakaha kantrolu na miažy, a jość tyja, što nie ŭvachodziać, i pahadnieńnie pa spraščeńni vizavaha režymu datyčycca ŭ asnoŭnym krain šenhienskaj zony. Mahu skazać, što pahadnieńnie pa spraščeńni vizavaha režymu prajšło pracedury ŭzhadnieńnia ŭ Jeŭrasajuzie i hatova da padpisańnia. Što datyčycca pahadnieńnia ab readmisii, to tut situacyja krychu inšaja, bo jano tyčycca taksama niekatorych krainaŭ nie šenhienskaj zony, tamu praces ŭzhadnieńnia bolš praciahły. My sprabujem jaho paskoryć, kab vyjści na padpisańnie jak maha chutčej, — raspavioŭ Šubiel.
Paśla padpisańnia Jeŭrapiejski parłamient daje zhodu na zaklučeńnie pahadnieńniaŭ. Zatym Rada Jeŭrapiejskaha sajuza prymaje rašeńnie ab zaklučeńni abodvuch pahadnieńniaŭ. Abodva pahadnieńni ŭstupajuć u siłu adnačasova ŭ pieršy dzień druhoha miesiaca paśla daty, kali baki prainfarmujuć adzin adnaho ab zaviaršeńni pracedur ratyfikacyi.
Ci paśpiejuć baki padpisać pahadnieńni i abmianiacca ratyfikacyjnymi hramatami da śniežnia (kali heta adbudziecca paźniej, to ŭ Jeŭrasajuzie paśpiejuć ŭstupić u siłu novyja praviły, i košt «šenhiena» vyraście da 80 jeŭra dla ŭsich krain pierš čym źnizicca dla biełarusaŭ da 35 jeŭra z ustupleńniem u siłu dvuchbakovaha pahadnieńnia), dypłamat adkazać nie zmoh.
— Ja nie mahu nazvać kankretnyja daty, ale sa svajho boku my pastarajemsia zrabić usio jak maha chutčej, kab u najbližejšaj budučyni vy pačuli dobryja naviny.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ29
Kamientary