«Dalej śpiecškoła». Kamisija rajvykankama apošni raz papiaredziła niepaŭnaletniaha abaroncu Kurapat
Kamisija pa spravach niepaŭnaletnich pry administracyi Maskoŭskaha rajvykankamu Miensku vyniesła papiaredžańnie Iłaryjonu T., niepaŭnaletniamu aktyvistu, jaki rehularna ŭdzielničaje ŭ akcyjach apazycyi i pikietavańni restaracyi «Pojediem pojedim» kala Kurapat, piša Radyjo Svaboda.
Tydzień tamu Iłaryjon T. užo atrymaŭ papiaredžańnie za ŭdzieł u sustrečy z vybarcami, jakaja prajšła 6 kastryčnika na płoščy Svabody. Siońnia, 21 listapada, kamisija pryznała jaho vinavatym u drobnym chulihanstvie padčas padziej 3 listapada ŭ Kurapatach i znoŭ papiaredziła.
«Skazali, heta apošniaje papiaredžańnie pa artykule 17.1 — za drobnaje chulihanstva. Jašče adno takoje — i nakirujuć ŭ specyjalnuju škołu zakrytaha typu», — kaža chłopiec.
3 listapada paśla šeścia na Dziady ŭ Kurapaty hrupa aktyvistaŭ pajšła da ŭvachodu ŭ restaracyju «Pojediem pojedim». Pavodle adnaho z aktyvistaŭ, na toj momant kandydata ŭ deputaty Źmitra Kazakieviča, išli, kab tam pravieści sustreču z vybarcami. Achoŭniki restaracyi sprabavali nie prapuścić aktyvistaŭ na terytoryju, uźnik kanflikt. Vyklikanyja administracyjaj ustanovy milicyjanty zatrymali 6 aktyvistaŭ, u tym liku i niepaŭnaletniaha Iłaryjona T., jaki ŭ vyniku atrymaŭ traŭmu nahi. Uviečary taho ž dnia chłopca adpuścili z pastarunku.
«Na videa incydentu vidać, što parušeńniaŭ z majho boku nie było, a administracyja sama spravakavała bojku. U raparcie pra mianie milicyjant zaznačyŭ, što ja nibyta sam valiŭsia na ziamlu padčas bojki i ad hetaha ŭtvaryŭsia ŭšyb nahi. Ale heta niapraŭda. Maja traŭma całkam na sumleńni amapaŭcaŭ u cyvilnym, jakija źbivali nas paśla zatrymańnia ŭ busiku. Dy jašče i ździekavalisia maralna. Budu padavać na ich skarhu ŭ Hieneralnuju prakuraturu i Śledčy kamitet», — skazaŭ pra rašeńnie kamisii Iłaryjon T.
Ciapier čytajuć
Źjaviłasia jašče adno FOTA Mikoły Statkieviča paśla vyzvaleńnia2
Kamientary