«Mahčyma pamiłavańnie». Dziaržava abiacaje indyvidualny padychod da kožnaha asudžanaha za narkotyki
Dziaržava razhladaje mahčymaść dać druhi šaniec tym, chto ŭpieršyniu byŭ asudžany za narkotyki, — pryjarytetam stanie indyvidualny padychod da kožnaha, chto siadzić pa «narkatyčnym artykule». Takaja infarmacyja prahučała ŭ efiry telekanała «Biełaruś 1», paviedamlaje Tut.by.
«Zychodziačy z pryncypu spraviadlivaści, prezident daručyŭ pahladzieć, chto znachodzicca ŭ miescach pazbaŭleńnia voli. Mahčyma, ludzi ŭžo ŭśviadomili, zrazumieli, što jany spatyknulisia, pamylilisia. Kali jany stali na šlach vypraŭleńnia, mahčyma i ŭmoŭna-daterminovaje vyzvaleńnie, ale pry peŭnych umovach: kali hetyja ludzi sapraŭdy stanuć na šlach vypraŭleńnia, voźmuć na siabie abaviazacielstva ŭładkavacca na pracu albo pastupić na vučobu», — raspavioŭ namieśnik kiraŭnika Administracyi prezidenta Valeryj Mickievič.
Jon taksama dadaŭ, što kali heta ludzi vypadkova spatyknulisia, to budzie mahčymaść «padrychtavać dla ich da pamiłavańnia».
Mickievič padkreśliŭ, što kožnaja sprava budzie razhladacca indyvidualna. Pry hetym buduć uličvacca abstaviny zdareńnia, asoba asudžanaha, jaho pavodziny. Adnym z kryteraŭ stanie hatoŭnaść svajakoŭ ŭziać na siabie adkaznaść za hetych ludziej.
«Kali jany nie skarystajucca pradastaŭlenym im šancam i znoŭ voźmucca za svajo, to, viadoma, adkaznaść budzie vielmi surovaja», — padkreśliŭ Mickievič.
Zaniepakojenaść losam asudžanych za narkotyki biełaruskich padletkaŭ vykazała na dniach ekśpiert AAN pa pravach čałavieka ŭ Biełarusi Anais Maryn. Jana zaklikała biełaruskija ŭłady pryvieści Kryminalny kodeks u adpaviednaść z ułasnymi abaviazalnictvami ŭ ramkach Kanviencyi ab pravach dziciaci i pierahledzieć zakanadaŭstva ŭ halinie narkotykaŭ i sistemu juvienalnaj justycyi, u pieršuju čarhu z tym, kab znajści alternatyvy turemnaha źniavoleńnia.
«Aryšt, zatrymańnie dziaciej i padletkaŭ abo ich zaklučeńnie pad vartu pavinna być mienšaj mieraj, i pieryjad pazbaŭleńnia voli pavinien być maksimalna karotkim», — zajaviła śpiecdakładčyk.
Kamientary