Nia chočacie zhubić baćkavu chatu – ramantujcie jaje

Z pakinutymi damami ŭ vioskach raźbirajucca sielskija saviety: kali nie zajavić pra svaje pravy, spadčyny možna pazbavicca.

Damy biez dahladu – nastupstva vymirańnia viosak. Staryja adychodziać, a spadčyńnikam časta niepatrebna nieruchomaść na siale. Moładź zastavacca tam nie choča. Addalenyja i małanasielenyja punkty źnikajuć z karty Biełarusi.

Vyznačajciesia, spadarstva, času zastałosia mała!

Na vulicach navat centraŭ haspadarak chapaje biezhaspadarnych, truchlavych damoŭ. Jany nie tolki psujuć źniešni vyhlad vulicy. Vakoł kinutych budynkaŭ adrazu ŭtvarajucca śmietniki, ziamla zarastaje pustaziellem, a sama pabudova stanovicca prytułkam dla pjanic. Amatary vypić zvyčajna palać, a heta niebiaśpiečna: pažar moža zakranuć i susiednija damy.

Adnak u bolšaści vypadkaŭ miascovyja ŭłady nie majuć prava rasparadzicca pustymi chatami, bo farmalna jany majuć uładalnikaŭ. Navat ruiny prybrać nie mohuć: haspadar ŭ luby momant zajavić ab svaim žadańni budavacca nanova na ziamielnym učastku i – treba jamu iści nasustrač...

Ciapier sielskija saviety pačali navodzić paradak u hetaj spravie. Pavodle ukaza Alaksandra Łukašenki, da 1 lipienia treba stvaryć adpaviednyja rejestry. Dla hetaha ŭłaśnikam, jakija nie žyvuć u domie pastajanna, prapanavana zajavić ab svaich pravach u sielskija saviety. Sa svajho boku, apošnija taksama šukajuć haspadaroŭ i spadčyńnikaŭ, jakija źjechali chto kudy i nie cikaviacca svajoj zaniadbanaj ułasnaściu... Im treba kančatkova vyznačycca: albo dahladać svoj dom i navakolnuju terytoryju, albo pradać.

Adnym – ładnaja kapiejka, inšym – hałaŭny bol...

Ideja mieć letni dom u vioscy maje vialikuju papularnaść u haradžan. Kaniečnie, najbolšym popytam karystajucca chaty ŭ tych vioskach, jakija pablizu haradoŭ, albo majuć pobač čyhunku i dobraje aŭtatranspartnaje absłuhoŭvańnie. U lik patrabavańniaŭ da lecišča na adno ź pieršych miescaŭ žychary Mahiloŭščyny taksama staviać radyjacyjnuju biaśpieku: žytło pavinna być u čystaj zonie. Ceny na takuju nieruchomaść niemałyja.

Naprykład, u Harbavickim sielskim saviecie damy kaštujuć ad tysiačy dołaraŭ i vyšej. Heta Čavuski rajon – niepadalok ad Mahilova, asnoŭnaj trasy i čyhunačnaj stancyi. Tut jość tolki kala troch dziesiatkaŭ pustych damoŭ, i ich haspadary paśpiašalisia zajavić ab svaim pravie na ŭłasnaść.

A ŭ Faščaŭskim sielskim saviecie, jaki ŭ Škłoŭskim rajonie, naličvajecca kala sotni pustych i paŭrazburanych damoŭ. Centr – vioska Faščaŭka, jakaja znachodzicca ŭ niekalkich dziesiatkach kiłamietraŭ i ad Škłova, i ad Mahilova. Tamu tut dom možna nabyć ad 300 dołaraŭ.

Što čakaje chaty, jakija zabiaruć sielsaviety

U kožnym sielskim rajonie stvorany kamisii pa naviadzieńniu paradka ŭ nasielenych puntach. Jany buduć vyrašać los tych pabudoŭ, haspadary jakich nie abjaviacca. Kali biezhaspadarnyja budynki mieściacca ŭ ahraharadkach, tudy chutčej za ŭsio pierasielać žycharoŭ małych i addalenych viosak. Tańniej prapanavać čałavieku novaje miesca, čym naładžvać jaho sacyjalnaje absłuhoŭvańnie za šmat kiłamietraŭ. Adnak chaty, jakija patrabujuć značnych hrošaj dla ramontu, chutčej za ŭsio buduć rujnavać, a ziamlu, u zaležnaści ad popytu, addavać pryvatnikam albo sielskim haspadarkam i laśnictvam.

Siarhiej Hutarevič, Bulletinonline.org

• 0
• 0
• 0
• 0
• 0
• 0
• 0
• 0