Aŭtarka skandalnaj brašury «10 pryčyn zachavać cnatlivaść» patłumačyła, što mieła na ŭvazie
Brašurka pabudavanaja pa pryncypie 10 tezisaŭ, jakija tłumačać, čamu dziaŭčyncy nieabchodna zachoŭvać cnatlivaść da šlubu.
Niekatoryja punkty hetaj brašury vyklikali ŭ internaŭtaŭ źmiašanyja pačućci.
Naprykład, punkt pra toje, što budučy muž budzie abražać svaju žonku, havaryć, što jana drennaja haspadynia, ale ŭ adsutnaści cnatlivaści abvinavacić nie zmoža. «Heta ŭžo štości!» — čytajem u brašury.
«Naša Nina» paprasiła aŭtarku brašury Vieraniku Siardziuk, staršyniu hramadskaj arhanizacyi «Centr padtrymki siamji i maciarynstva «Matula», raskazvać pra svoj tekst.
«Asnoŭny napramak dziejnaści našaj arhanizacyi — heta praduchileńnie abortaŭ, zachavańnie siamji. Ja liču, što my ŭžo 8 hod, a mienavita stolki isnuje naš centr, robim vialikuju spravu — ratujem dziaciej, jakija jašče nie naradzilisia. I ŭ miežach hetaj idei my pracujem z padletkami, bo kali žančyna ŭžo traplaje ŭ abartaryj, hutaryć ź joj pozna. Tamu my pravodzim aśvietnickija mierapryjemstvy i ź dziaŭčynkami, jakim tolki spoŭniłasia 14 hadoŭ. I voś hetaja brašura mienavita dla padletkaŭ», — raskazvaje Vieranika Siardziuk.
Zaraz, pryznajecca Vieranika, brašuru hetu centr užo nie raspaŭsiudžvaje.
«Nie, nie tamu što ja źmianiła niejkija svaje pohlady, a prosta źjaŭlajucca novyja temy, pa-inšamu padajecca materyjał. Naprykład, naš novy buklet nazyvajecca «Cnota». Jon na biełaruskaj movie i całkam składzieny z falkłornaha materyjału, u jakim padkreślivajucca siamiejnyja kaštoŭnaści».
«Ja — žonka pravasłaŭnaha śviatara. I ja navat nie mahu ŭjavić, što budu štości kazać suprać cnatlivaści. Choć ja i kulturołah, i staršynia hramadskaha abjadnańnia, ale ŭsio adno mianie ŭsprymajuć jak hołas carkvy», — pryznajecca Vieranika.
Siardziuk pryhadvaje, što pierad tym, jak nadrukavać buklet, arhanizacyja praviała apytańnie siarod padletkaŭ 14-16 hadoŭ pra toje, ci havaryli ź imi baćki pra pieršy seksualny dośvied.
«U 15% vypadkaŭ baćki havaryli ź dziećmi na hetuju temu, navat dali dzieciam kantraceptyvy. U 10% vypadkaŭ baćki tłumačyli dzieciam, što nielha zajmacca seksam da šlubu, u 75% baćki naohuł nie havaryli ź dziećmi na hetuju dalikatnuju temu. Tamu my i vyrašyli, što pry dapamozie svajoj brašury raskažam padletkam pra toje, jak važna zachoŭvać cnatlivaść».
«Brašura nie zabaraniaje, jana prymušaje zadumacca, a ci varta jano taho. I admova ad pałavoha žyćcia ŭ padletkaŭ — heta 100% harantyja zachavańnia zdaroŭja», — ličyć Vieranika Siardziuk.
A nakont pytańnia, čamu brašurka adrasavanaja tolki dziaŭčynkam, Vieranika patłumačyła:
«Prymajuć rašeńnie ab ustupleńni ŭ blizkija adnosiny ŭ asnoŭnym žančyny. I nastupstvy blizkaści ŭ bolšaj stupieni tyčacca žančyn — mužčyna ž nie zaciažaryć».
«Naša arhanizacyja za toje, kab ludzi ŭstupali ŭ intymnyja adnosiny tolki tady, kali zmohuć nieści za heta poŭnuju adkaznaść. Da taho ž dziaŭčynki čaściej traŭmujucca padčas intymnaj blizkaści, čym chłopčyki. Chłopčyki traŭmujucca padčas homaseksualnaha pałavoha aktu. Ja nie budu ŭdavacca ŭ miedycynskija padrabiaznaści, ale tak jano i jość. Tamu zadača našaj arhanizacyi — infarmavać i baćkoŭ u tym liku, kab hutaryli sa svaimi dziećmi i na hetyja temy», — raskazvaje Vieranika Siardziuk.
Na ciapierašni momant u arhanizacyi pracujuć tolki ź dziaŭčynkami.
«Choć ŭsio bolš baćkoŭ prosiać pravodzić zaniatki pa pałavym vychavańni i dla chłopčykaŭ. Chacia z našaha dośviedu pracy mahu skazać, što chłopčyki bolš cnatlivyja. Dziaŭčynka, jakaja pačynaje pałavoje žyćcio ŭ padletkavym uzroście, robić heta nie tamu, što patrabuje cieła, a tamu, što blizkaści patrabuje duša. Takich dziaŭčynak nie dalubili doma, nie dapieścili, nie dacałavali, tamu jany šukajuć usio heta ŭ čužych mužčyn», — pierakananaja Vieranika Siardziuk.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam14
Kamientary