6 čałaviek z doma sastarełych u Biešankovičach trapili ŭ balnicu

Pra situacyju ŭ Biešankovičach, rajonnym centry ŭ Viciebskaj vobłaści, «Našaj Nivie» raskazali žychary. Starych špitalizavali ŭ rajonnuju balnicu, dzie lažać dziasiatki ludziej ź pnieŭmanijami i karanavirusam.

[Pieršapačatkova ŭ tekście paviedamlałasia pra adzin vypadak karanavirusa ŭ domie sastarełych. Adnak Redakcyja atrymała ad Ministerstva infarmacyi list z patrabavańniem vydalić hetyja źviestki, bo jany nie adpaviadajuć rečaisnaści].

Pavialičyć

Dom sastarełych u Biešankovičach — heta adździaleńnie kruhłasutačnaha znachodžańnia dla hramadzian pažyłoha ŭzrostu i invalidaŭ pry miascovym centry sacabsłuhoŭvańnia. Adździaleńnie raźličana na 33 čałavieki, siońnia tam žyvuć 28 «pacyjentaŭ». Akramia taho, u centry pracuje adździaleńnie dzionnaha znachodžańnia.

Infarmacyju pra špitalizacyju starych paćvierdzili supracoŭniki adździaleńnia.

«Ciapier 6 čałaviek špitalizavali ŭ infiekcyjnaje adździaleńnie, — raskazali «Našaj Nivie» ŭ Biešankovičach. — Abstanoŭka ŭ nas tut narmalnaja, ludziej z tempieraturaj niama, z prastudaj nikoha niama. 

Analizy na karanavirus va ŭsich uziali, ni ŭ koha nie paćvierdziŭsia. Ciapier budziem zdavać paŭtorny analiz», — raskazali nam.

Ludzi va ŭsioj Viciebskaj vobłaści narakajuć, što čakać vynikaŭ testaŭ davodzicca vielmi doŭha. «Čakać treba niedzie tydzień: testy voziać praviarać u Mahiloŭ», — skazaŭ nam miedrabotnik ź Biešankavič.

Abmiežavańnie na naviedvańnie damoŭ sastarełych u Viciebsku ŭviali tolki ŭ kancy sakavika.

Na dumku žycharoŭ rajona, pačałosia ŭsio tut, mahčyma, z doma adpačynku «Krupienina», jaki mieścicca ŭ miednastvołym sasnovym bary na bierazie adnaho z azior. Sa słoŭ žycharoŭ, u hetym spa-kompleksie na 80 miescaŭ raźmiaščali «pieršyja kantakty» zaražanych karanavirusam. Paśla sanapracoŭku spa-kompleksu pravodzili supracoŭnicy rajonnaha centra hihijeny i epidemijałohii.

Paźniej 57-hadovaja dezynfiektarka sanstancyi pamierła ad pnieŭmanii. Za žyćcio jašče adnoj jaje kalehi zmahajucca daktary rajonnaj balnicy.

Siońnia stała viadoma pra śmierć ad pnieŭmanii jašče adnoj 87-hadovaj žančyny ŭ rajcentry. U balnicy jana pralažała piać dzion, test na karanavirus u jaje nie brali. Svajakam skazali: «Tamu što niama testaŭ». 57-hadovaja dačka pamierłaj taksama lažyć u balnicy z zapaleńniem lohkich, jak i jaje 56-hadovy muž — jon u ciažkim stanie, na aparacie štučnaj vientylacyi lohkich.

Čytajcie taksama: «Pachavajuć u zakrytaj trunie». U Biešankovičach za try dni zhareła dezynfiektarka sanstancyi

U svaju čarhu, niekalki miedrabotnikaŭ u Biešankovičach taksama zarazilisia, raskazali nam. Siarod ich i daktary.

Infarmacyi pra ahulnuju kolkaść chvorych na pnieŭmanii i karanavirus pa Biešankovičach niama. Žychary pieradajuć viadomaje im z vusnaŭ u vusny. U damapohu daktaram Biešankovickaj balnicy adkryty dabračynny pazabiudžetny rachunak: BY44AKBB36323110030582200000 UNP 300194206 BIK AKBBBY21215 u filii №215 AAT «AAB Biełarusbank».

Balnica prosić taksama terminova kupić joj try ŭvilhatnialniki kisłarodu dla ludziej ź lohačnaj niedastatkovaściu. Jaje zvarot reposnuŭ akaŭnt rajvykankama UKantakcie. Na heta treba 960 rubloŭ.

Dapamohu miedykam Viciebščyny źbiraje taksama hramadskaja inicyjatyva «Karanavirus Viciebsk. Dapamoha miedykam».

Karanavirus padstupny tym, što daje ŭskładnieńni na lohkija. Jon vyklikaje ciažkija i časam vielmi chutkaciečnyja pnieŭmanii.

U Francyi, Bielhii i Ispanii vialikuju dolu achviar karanavirusa skłali mienavita pacyjenty damoŭ sastarełych, bo starejšyja ludzi krajnie ciažka pieranosiać COVID-19.

Usiaho ŭ Biełarusi pa stanie na pačatak 2019 hoda było 22 dziaržaŭnyja damy-internaty dla sastarełych i invalidaŭ ahulnaha typu i 50 — psichanieŭrałahičnaha profila. U ich žyvuć bolš za 17,5 tysiač čałaviek. Isnuje taksama kala dziesiaci pryvatnych ustanoŭ takoha płana. Akramia taho, u mnohich haradach jość hetaksama centry dzionnaha pierabyvańnia dla starych ludziej. I jany ŭ situacyi epidemii robiacca zonami ryzyki.

• 0
• 0
• 0
• 0
• 0
• 0
• 0
• 0