Udzielniki prajmieryz ad apazicyi zrabili zajavu, što nie buduć vyznačać adzinaha kandydata pa vynikach prajmieryz. Jany ličać, što paŭnavartasny ŭdzieł u vybarčaj kampanii ŭ ciapieršanich umovach źjaŭlajecca niemahčymym.
«Zajaŭlajem, što abjaŭleńnie i praviadzieńnie vybaraŭ va ŭmovach razharu epidemii karanavirusa niedapuščalna i złačynna», — adznačajecca ŭ zajavie.
Kampanija ličyć, što paŭnavartasny ŭdzieł u vybarach u hetych umovach źjaŭlajecca niemahčymym.
Palityki vykazali padziaku ŭsim hramadzianam Biełarusi, jakija pryniali aktyŭny ŭdzieł u pracedurach prajmieryz.
Jany pryznali, što ŭ abstavinach, jakija skłalisia, niemahčyma realizavać usie zakładzienyja ŭ prajmieryz pracedury i vyznačyć adzinaha kandydata.
U zajavie palityki abjavili pra start kampanii «Za Biełaruś biez dyktatury!».
Jany płanujuć vykarystańnie lehalnych instrumientaŭ vybarčaj kampanii ŭ pieryjad zboru podpisaŭ dla mabilizacyi, abjadnańnia i padtrymki hramadzian Biełarusi, jakija prahnuć pieramien.
Kandydaty prajmieryz Juryj Hubarevič, Volha Kavalkova, Mikałaj Kazłoŭ farmujuć supolnuju inicyjatyŭnuju hrupu i pačynajuć kampaniju, asnoŭnyja mety jakoj — adstaŭka Łukašenki, sumlennyja vybary i sistemnyja reformy dla novaj Biełarusi.
Nahadajem, pavodle vynikaŭ anłajn-hałasavańnia prajmieryz, pieramohu ŭ internecie atrymaŭ Mikałaj Kazłoŭ — 39,8%.
Raniej zajaŭlałasia, što ŭdzieł u anłajn-hałasavańni voźmuć da 100 tysiač čałaviek, a adzinaha kandydata abiaruć na źjeździe ŭ kancy maja. Ale praź niebiaśpieku karanavirusa realizavać płany nie ŭdałosia.
Kamientary