Suśvietnaj ekanomicy pahražaje kryzis stahodździa, papiaredžvaŭ MVF. Ale ŭsio akazałasia jašče horš
Karanavirus prydušyŭ suśvietnuju ekanomiku, ale chutka jon asłabić chvatku, i dziełavaja aktyŭnaść adnovicca. Biez nastupstvaŭ nie abydziecca: kryzis budzie samym strašnym z časoŭ Vialikaj depresii amal stohadovaj daŭniny, a rachunak za lačeńnie pieravysić 9 trłn dalaraŭ, padličyŭ niadaŭna Mižnarodny valutny fond. Praź miesiac jon pryznaŭ, što pamyliŭsia, piša bbc.com.
Usie akazałasia našmat bolš surjozna.
«Kryzis tolki nabiraje abaroty, a prahnoz užo horšy navat za našy piesimistyčnyja čakańni, — skazała kiraŭnik MVF Krystalina Hieorhijeva. — Kali miedycyna nie adoleje virus, mnohija ekanomiki pacierpiać jašče macniej».
Ekanamisty MVF u siaredzinie krasavika pradrakli suśvietnaj ekanomicy spad na 3% u biahučym hodzie, tady jak jašče minułaj vosieńniu raźličvali, što jana vyraście na tyja ž try pracenty.
Upieršyniu ŭ sučasnaj historyi prahnoz pamianiaŭsia tak rezka za taki karotki termin. Ale MVF zachavaŭ aptymizm i vieru ŭ lepšaje: jon pradkazaŭ rost amal na 6% užo ŭ nastupnym hodzie, adnak papiaredziŭ, što, pa-pieršaje, heta nie kampiensuje padzieńnia, a pa-druhoje, zdarycca tolki kali virus nie vierniecca druhoj chvalaj, i karancin nie pryjdziecca ŭvodzić znoŭku.
Za niapoŭny miesiac stała jasna, što pradkazańni starejuć chutčej, čym ich udajecca aformić i pradstavić publicy.
«Vielmi vierahodna, što ŭ červieni my abnovim prahnozy. I ŭžo ciapier jasna, što varta čakać drennych navin», — skazała Hieorhijeva na kanfierencyi Financial Times u aŭtorak.
Za ličanyja dni paśla publikacyi papiaredniaj acenki škody ad MVF my daviedalisia, što try najbujniejšyja ekanomiki śvietu, na jakija prypadaje bolš za pałovu suśvietnaha vypusku i spažyvańnia, pieražyli samaje surjoznaje padzieńnie ŭ sučasnaj historyi.
Ekanamičnaja aktyŭnaść u Kitai skaraciłasia ŭpieršyniu amal za paŭstahodździa. Jeŭraźviaz nie bačyŭ takoha spadu za ŭsio svajo isnavańnie. A najbujniejšaja ŭ śviecie ekanomika ZŠA karcinna spatyknułasia, i samaja praciahłaja ŭ jaje historyi dziesiacihadovaja faza ŭzdymu padyšła da kanca.
Biespracoŭje siarod amierykancaŭ pabiła ŭsie rekordy z časoŭ Vialikaj depresii pamiž dźviuma suśvietnymi vojnami minułaha stahodździa.
Karanavirus pierapyniŭ adnaŭleńnie suśvietnaj ekanomiki paśla papiaredniaha kryzisu-recesii 2008-2009 hadoŭ. Jaje maštaby zaraz zdajucca ekanamistam śmiešnymi ŭ paraŭnańni z tym, što śviecić płaniecie paśla Vialikaha karancinu, jak užo nazyvajuć ciapierašniaj depresijaj.
Značyć, i viartańnie da raniejšych tempaŭ prymnažeńnia bahaćcia i skaračeńnia niaroŭnaści na płaniecie ryzykuje być bolš praciahłym. Minułym razam na heta syšło cełaje dziesiacihodździe.
Tady śviet daŭ rady ŭ asnoŭnym źmiakčeńniem hrašovaj palityki — nadrukavaŭ hrošaj i źmiakčyŭ finansavy kryzis. Na hety raz usio bolš surjozna, pakolki prablema nie ŭ niedachopie kapitału, a ŭ virusie i źviazanych ź im vydatkach i abmiežavańniach.
Dla pierazapusku ekanomiki paśla karancinu ŭsie krainy śvietu ŭžo paabiacali vydatkavać z kazny dadatkovyja 9 trłn dalaraŭ, padała Hieorhijeva śviežyja acenki MVF.
«I my prosim tolki ab adnym: kali łaska, vydatkoŭvajcie jak maha bolš. I potym jašče krychu», — skazała jana.
Takich hrošaj ni ŭ kaho niama, ich daviadziecca pazyčać. Płacić pa rachunkach treba budzie budučym pakaleńniam: upartaj pracaj, praz pavyšanyja padatki abo inflacyju.
I kali raźvityja krainy bieź ciažkaści znachodziać kredytoraŭ, to ŭsich astatnich COVID-19 pastaviŭ u niajomkaje stanovišča. U surovyja hady hrošy vyciakajuć z rynkaŭ, što raźvivajucca, i ciapier jakraz taki čas. Adtok kapitału pryvodzić da devalvacyi, što pavialičvaje košt nie tolki novych, ale i raniejšych daŭhoŭ, padvyšajučy nahruzku na i biez taho dziravuju kaznu.
U vyniku adnosna niebahatyja krainy, jakija raźvivajucca, nakštałt Rasii, Indyi ci Mieksiki pacierpiać ad karanakryzisu jašče macniej za zabiaśpiečanyja, papiaredziła AAN i zaklikała sabrać dla ich antykryzisny pakiet na 2,5 trłn dalaraŭ.
Ale i hetaha nie chopić, adznačyła Hieorhijeva. Jana skazała ŭ aŭtorak, što hetaja acenka budzie taksama pierahledžana ŭ bolšy bok.
U sakaviku, kali virus upieršyniu prademanstravaŭ svaju zabojčuju siłu, adtok kapitału z rynkaŭ, jakija raźvivajucca, dasiahnuŭ amal 100 młrd dalaraŭ, što prykładna ŭ čatyry razy bolš za kožny z troch papiarednich finansavych kryzisaŭ.
Hieorhijeva skazała, što krasavickaja statystyka maluje zvarotnuju karcinu: dziakujučy ŭlivańniam likvidnaści z boku centrabankaŭ ZŠA, jeŭrazony, Vialikabrytanii i Japonii ŭ inviestaraŭ znoŭ pračnuŭsia apietyt da ryzyki, i kapitał pačaŭ viartacca na rynki, jakija raźvivajucca.
Ale heta ŭsio — časovaja palohka. Budučynia naŭprost zaležyć ad zychodu bitvy ź virusam. Kali jon vierniecca z novaj siłaj, škoda budzie našmat surjoźniejšaja, a prahnozy znoŭ pryjdziecca pierahladać.
I ŭ MVF jość padstavy aścierahacca takoha raźvićcia padziej.
Pakul Hieorhijeva vystupała na virtualnaj kanfierencyi, ekanamisty jaje arhanizacyi apublikavali acenku pieršych krokaŭ Jeŭropy nasustrač bieskarancinnaj budučyni.
Jany papiaredzili, što Stary Śviet horš padrychtavany da źniaćcia abmiežavańniaŭ, čym Azija, jakaja pieršaj pryniała ŭdar pandemii.
«U kožnaha svaja stratehija, ale Jeŭropa, padobna, vychodzić z karancinu na bolš rańniaj stadyi epidemijałahičnaha cykłu, čym Azija. Da taho ž, mahčymaści poŭnamaštabnaha testavańnia, adsočvańnia kantaktaŭ i izalacyi asiarodkaŭ zaražeńnia ŭ Jeŭropie sastupajuć azijackim anałaham», — papiaredžvajuć ekśpierty MVF.
«I Azii, i ŭ Jeŭropie karancin nanosić surjoznuju ekanamičnuju i psichałahičnuju škodu. Žadańnie jak maha chutčej źniać jaho bolš čym vytłumačalnaje. Adnak dziejničać treba aściarožna, i nie varta paddavacca spakusie adkryć usiaho pabolš i chutčej. Heta pahražaje recydyvam chvaroby».
Kamientary