Śpikier Siejma Litvy dapuściŭ źmianieńnie adnosin ź Biełaruśsiu: adny tolki sankcyi dajuć vynik, ale nie kančatkovy
Śpikier litoŭskaha Siejma Juozas Olekas zajaviŭ, što pieramovy ź Minskam iduć i na techničnym, i na palityčnym uzroŭni — praz pasiarednikaŭ, piša LRT.
Śpikiera Siejma paprasili prakamientavać słovy Dejvidasa Matulonisa, daradcy prezidenta, jaki kaža, što Litva moža zrabić sastupki Biełarusi, kab samoj atrymać vyhadu.
— Ja nie chaču raskryvać usie zakulisnyja padrabiaznaści taho, dzie prachodziać pieramovy. Jak vy viedajecie, siońnia ŭ Siejmie my adkłali pryniaćcie padrychtavanaj nami rezalucyi, kab znajści mahčymaści dla abmierkavańnia roznych varyjantaŭ, bo nam patrebna biaśpieka, nam patrebny ekanamičny rost, i heta nie zaŭsiody dasiahajecca tolki žorstkaj pazicyjaj, ale heta dasiahajecca i dypłamatyčnymi kanałami, i tamu naradžajucca takija prapanovy, — skazaŭ jon.
Na ŭdakładnieńnie, ci mohuć adbycca źmieny ŭ adnosinach ź Biełaruśsiu, Olekas adkazaŭ śćviardžalna.
— Nu, tak. My spadziajomsia, što spačatku buduć vyzvalenyja ŭsie palityčnyja źniavolenyja, što vierniecca naš transpart, jaki zatrymany, i tamu my i razmaŭlajem. Pa-pieršaje, my razmaŭlajem na techničnym uzroŭni i my razmaŭlajem sami ź Biełaruśsiu, a na palityčnym uzroŭni my razmaŭlajem praz našych sajuźnikaŭ.
Palityk adznačaje, što pytańnie naładžvańnia adnosin ź Biełaruśsiu — niaprostaje.
— Ja liču, što my ŭsie pavinny paradavacca i pavinšavać ludziej, jakija paśla 4 hadoŭ turmy vyjšli na volu. Zaŭtra ja sustrakajusia z Alesiem Bialackim, mahčyma, sustrenusia pahavaryć i ź inšymi — pra toje, što my možam zrabić, kab žyćcio biełaruskich ludziej palehčyła.
I, biezumoŭna, takaja naša žorstkaja pazicyja z sankcyjami, ź ciskam, daje peŭny vynik, ale nie daje kančatkovaha. Tamu mova našych sajuźnikaŭ, mova amierykancaŭ, — heta tak zvanaja palityka «bizuna i piernika». My ŭžo majem, vierahodna, niekalki socień — možam naličyć amal 200 — palityčnych źniavolenych i jarkich asob, jakija vypuščanyja na volu. Biezumoŭna, hetaje handlovaje pytańnie taksama paŭstała, ale my aryjentujemsia, raimsia i viadziom dyskusii z partniorami, z sajuźnikami jak na ŭzroŭni NATA, tak i na ŭzroŭni Jeŭrapiejskaha sajuza, kab dasiahnuć najlepšaha vyniku: kab režym nie adčuŭ siabie pieramožcam, kab ni Litva, ni demakratyčnyja jeŭrapiejskija dziaržavy nie prajhrali i kab palityčnyja źniavolenyja mahli atrymać svabodu, — adkazaŭ jon.
Kamientary
[Zredahavana]