Dačka ministra Markava abvinavaciła Pavuka ŭ płanavańni sieryi telefonnych terarystyčnych atak padčas UNS
Na telekanale ANT vyjšaŭ repartaž, dzie dačka ministra infarmacyi Marata Markava, siłaviki i pamiežnaja słužba raskazvajuć pra zatrymańnie «čarhovaha ekstremista», jaki na zamovu błohiera Andreja Pavuka chacieŭ zładzić u Biełarusi cełuju sieryju iłžyvych zvankoŭ pra minavańnie škoł i špitalaŭ. Usio dla taho, kab «pasiejać paniku siarod nasielnictva padčas UNS» (Usiebiełaruskaha narodnaha schodu). U kamientary «Našaj Nivie» Pavuk usio admaŭlaje: «Tam navat nie moj hołas, moža štučnym intelektam zrabili?».
U repartažy viadoŭcy Nastaśsi Markavaj pakazali kadry z zatrymańniem Siarhieja K., jaki z 9 śniežnia sprabavaŭ kupić šmat biełaruskich sim-kartak i aktyvavać ich. Raskazvajecca, što mužčyna nastolki straciŭ nadzieju, što raskidaŭ klič pra pošuki simak va ŭsich mahčymych pamiežnych i emihranckich publičnych čatach, a aktyvavać adnu ź simak sprabavaŭ u kramie pry zastavie Lidskaha pamiežnaha atrada.
Na jaho ž, raskazvaje viadoŭca, adrazu źviarnuli ŭvahu siłaviki, ale vyrašyli nie zatrymlivać adrazu, a ŭziać «u ščylnuju raspracoŭku». Tak jany vyjšli na ŭsiu «kambinacyju destruktyŭnych sił», a mienavita — na Andreja Pavuka.
U siužecie demanstrujuć kadry z dopytu niaŭdałaha telefonnaha terarysta. Praŭda, jaho tvar nie pakazvajuć. Hledačam paviedamlajuć tolki toje, što raniej jon byŭ asudžany za machlarstva i ŭdzieł u pratestach.
Śćviardžajecca, što Siarhiej K. pa zadańni Andreja Pavuka pavinien byŭ za ŭznaharodžańnie arhanizavać cełuju «fiermu fiktyŭnych abanientaŭ». Dla hetaha jon u tym liku damoviŭsia na «Kufary» pra nabyćcio sim-boksa.
Hałoŭnaja ž meta, śćviardžajuć na ANT, — destabilizavać krainu padčas praviadzieńnia UNS, rassyłajučy fejkavyja paviedamleńni pra minavańnie škoł, lakarniaŭ i inšych dziaržaŭnych abjektaŭ. Viadoŭca kaža, takim čynam Pavuk chacieŭ zahładzić vinu pierad litoŭcami za prademanstravanuju raniej niepavahu da litoŭskaj movy i naohuł ci nie zakaz heta litoŭskich śpiecsłužbaŭ.
Andrej Pavuk: «Kryzis žanru, niama čym inšym ludziej pałochać»
U siužecie taksama demanstrujecca nibyta pierapiska Andreja Pavuka ź Siarhiejem K. Usia jana — nabor z hałasavych paviedamleńniaŭ, častku ź jakich puskajuć u efiry.
U razmovie z «Našaj Nivaj» błohier adrazu adrezaŭ: «Tam navat nie moj hołas. Moža, štučny intelekt?»
Błohier dadaŭ, što dla zvankoŭ u Biełaruś čynoŭnikam i inšym asobam, jakija jon zapisvaje i vykładaje na svaim jutub-kanale, jamu dastatkova dziejnaj je-simki, zarehistravanaj na biełarusa z emihracyi z dazvołu apošniaha.
«Navošta mnie niechta ź Biełarusi, kali ŭ mianie aktyvavanaja je-simka? Ja prosta pry patrebie jedu na miažu, łaŭlu łajfaŭskuju sietku i telefanuju. Ja nie tolki nie viedaŭ, što takoje sim-boks, ale i byŭ nie ŭ kursie, što niejki UNS užo znoŭ źbirajecca. Moža, sapraŭdy tady treba kamu patelefanavać? Kryzis žanru ŭ ich, niama čym inšym ludziej pałochać».
Andrej Pavuk padkreśliŭ, što dla jaho vyklučana ŭzajemadziejańnie ź ludźmi ź Biełarusi.
«Heta vyklučana, tam ža ŭsio prasłuchoŭvajecca. I čamu majho «vykanaŭcu» nijak nie pakazvajuć u videa? Kab potym adpuścić, ja dumaju — adna pakazucha. Ci, moža, pomsta Markava — ja niadaŭna jamu zvaniŭ, ale jon byŭ niešmatsłoŭny, skazaŭ mnie viartacca ŭ Biełaruś».
Adrazu paśla vychadu siužeta na ANT Andrej Pavuk znoŭ nabraŭ ministra infarmacyi.
Ahułam razmova była karotkaj (uvieś dyjałoh atrymaŭsia niecenzurnym):
— Marat, što ty tam za ch*jniu vypuściŭ na ANT pra Pavuka?
— Pavuk byŭ durniem, tamu daviałosia. Budź zdarovy.
Taksama Andrej Pavuk dazvaniŭsia ŭ milicyju z prośbaj pakarać ministra infarmacyi za stvareńnie fejkaŭ.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2323
Kamientary