Zapracavaŭ praŭładny telehram-kanał, jaki močyć Babaryku, Capkału i Cichanoŭskaha
Jašče adzin mietad baraćby ź inšadumcami apracavali dziaržaŭnyja ideołahi i śpiecsłužby. Źjaviŭsia telehram-kanał «Žoŭtyja Z.» [nie dajem poŭnuju nazvu — «NN»], jaki śpiecyjalizujecca na brudzie ŭ adnosinach da tych ludziej, jakija vystupajuć suprać Alaksandra Łukašenki.
U asnoŭnym «Žoŭtyja Z.» pišuć pra ŭdzielnikaŭ vybarčaj honki: Viktara Babaryku, Valeryja Capkału, a taksama pra Siarhieja i Śviatłanu Cichanoŭskich. Zadača da niemahčymaści prostaja — pakazać palitykaŭ u niepryvabnym śviatle.
Dla hetaha ŭ chod iduć videanarezki, internet-miemy, cytaty z savieckich filmaŭ i mulcikaŭ. Amal usio toje, što na dziaržaŭnym telebačańni praktykavali i ŭ 2001 hodzie, i ŭ 2006-m.
«Kreatyŭ» zvyčajna zvodzicca da taho, što emblemu kamandy Babaryki jany zdolnyja paraŭnać z… dupaj. Uzrovień žartaŭ piacikłaśnika. Albo nalapić tvar Babaryki da žabraka z savieckaha filma, jaki vyprošvaje miljon.
Kaniečnie ž, u stylistycy kultavych «Dziaciej chłuśni» varta pieraapranuć apanientaŭ ułady ŭ formu palicajaŭ. Prapahanda nie zmahła znajści bolš efiektyŭnych i novych mietadaŭ pracy ź ludźmi, čym staryja kanśpiekty Juryja Azaronka i Alaksandra Zimoŭskaha.
Toje, što heta nie praca niejkaha entuzijasta, a metanakiravanaja palityka, śviedčać pieraposty, jakija družna robiać praŭładnyja telehram-kanały. Takich vypadkovaściaŭ nie byvaje.
Pryčym dziŭnym čynam robicca heta amal adnačasova: «Puł Pieršaha», Ahienctva televizijnych navin («Biełaruś-1»), telekanał ANT. Usie jany družna stali pieradrukoŭvać kantent «Žoŭtych Z.». Zrešty, vialikaj papularnaści hety kanał nie nabraŭ. Ludzi cudoŭna bačać, što vyhladaje ŭsio heta biezdapamožna i panyła.
Viadziecca telehram-kanał ananimna. Cikava, što pry hetym sami čynoŭniki niaredka krytykujuć ananimnaść u telehramie.
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy16
Kamientary