Łukašenka: my asudžany žyć razam z Rasijaj!

Čakany revierans: siońnia na sustrečy z hubiernataram Leninhradskaj vobłaści Valeryjem Sierdziukovym Łukašenka zapeŭniŭ, što «budučyni biez Rasii my nie bačym, my asudžany žyć razam z Rasijaj».

Heta adbyłosia praź ličanyja dni paśla taho, jak u Śvietłahorsku jon vierbalna adbambiŭsia pa Maskvie. I, jak pamiatajecie, zabaraniŭ svaim čynoŭnikam poŭzać na kaleniach pa rasijskich kabinietach.

Tradycyjnaja taktyka kivača u dziejańni. Treba źmikšavać papiarednija vypady, vylić porcyju balzamu na dušy rasijcaŭ.

Zrešty, navat ciaham hutarki ź Sierdziukovym haspadar kabinieta sprytna spałučaŭ klatvy ŭ addanaści Rasii z kołkimi remarkami. Sutnaść pretenzij u tym, što vialikaja susiedka nie śpiašajecca dapamahać siniavokaj respublicy padčas kryzisu. Dyk ža tak, maŭlaŭ, niadoŭha i stracić chaŭruśnictva...

Darečy, na siońnia ŭ Łukašenki zapłanavana jašče i sustreča z sakratarom Rady biaśpieki Rasii Mikałajem Patrušavym. Imavierna, budzie čarhovaja porcyja balzamu dziela bałansu.

A napiaredadni vajskoŭcy rekłamavali zapłanavanyja na vosień šyrokamaštabnyja supolnyja manieŭry. Padčas kryzisu buduć vystrelvać miljony dołaraŭ u bieły śviet jak u kapiejku, trenirujučysia adbivać imaviernuju ahresiju suprać sajuznaj dziaržavy. Taksama balzam na dušu maskoŭskim vialikadziaržaŭnikam.

Miž tym biełaruski bok raźličvaje pajmieć kankretnyja vyhady ad vajskovaj kaapieracyi, u pryvatnaści zadarma ci tanna atrymać zienitna-rakietnyja kompleksy S-400.

A voś de-fakta sastupać kantrol nad supraćpavietranaj abaronaj ci pasyłać sałdat u haračyja punkty zhodna z damovaj pra kalektyŭnyja siły apieratyŭnaha reahavańnia Minsk, budźcie ŭpeŭnieny, nie razhonicca. U Kramli pra heta, badaj, zdahadvajucca. Adnak robiać vyhlad, što ŭsio na poŭnym surjozie.

Rasija choć i vyhladaje hrozna, ale časta, jak vialikaje dzicia, zadavalniajecca cacankami. Atrymaŭšy vierbalnuju poŭchu, nieŭzabavie ŭžo znoŭ ciešycca sałodkaj rytorykaj pra mifičnaje braterstva. Što i treba biełaruskamu boku dla bałansavańnia ŭ zamiežnaj palitycy.

P.S. Z vykazvańniaŭ Łukašenki možna zrabić vysnovu, što Miadźviedzieŭ pa telefonie asabista vyśviatlaŭ u jaho, čamu adsiekli rasijskija kanały («My damovilisia z prezidentam Rasii, što kiraŭniki administracyj dakładna ŭrehulujuć hetyja pytańni»).

Siońnia biełaruski kiraŭnik, vidać, paŭtarajučy tezy, davodziŭ Sierdziukovu, što prablema vysmaktana z palca. Ale potym, jak heta časta byvaje, nie ŭtrymaŭsia,

vyliŭ kryŭdu: maŭlaŭ, «Biełaruś naohuł nie pradstaŭlena ŭ miedyjnaj prastory Rasii». I ŭdakładniŭ: «A kali i pradstaŭlena, to prezident — idyjot i dzieci ŭ jaho nienarmalnyja, žuliki dy prajdziśviety».

P.P.S. I samaja śviežaja navina: zaŭtra Łukašenka lacić u Maskvu. Sapraŭdy, kivač pajšoŭ u advarotny bok.

• 0
• 0
• 0
• 0
• 0
• 0
• 0
• 0