Śviatłana Aleksijevič: Ciaham niekalkich dzion my apynulisia ŭ krainie, dzie nie pracuje nivodny z pryncypaŭ humanizmu
Biełaruski PEN apublikavaŭ zajavu z pryčyny apošnich padziej u Biełarusi.
PEC-centr źviartaje ŭvahu na niedapuščalnaść žorstkaha biesčałaviečnaha staŭleńnia i katavańniaŭ u dačynieńni da aktyvistaŭ hramadzianskaj supolnaści, błohieraŭ, siabraŭ kamand pretendentaŭ u kandydaty ŭ prezidenty, a taksama tvorcaŭ, siarod jakich łaŭreaty premij Biełaruskaha PEN-centra i litaratary (Paŭła Sieviarynca, Hanny Sieviaryniec, Volhi Nikałajčyk).
Staršynia Biełaruskaha PENa, nobieleŭski łaŭreat pa litaratury Śviatłana Aleksijevič zaznačaje:
«Ciaham niekalkich dzion my apynulisia ŭ krainie, dzie nie pracuje ni adzin z pryncypaŭ humanizmu. Ciapier vybar za kožnym z nas — u jakoj krainie my chočam žyć u budučyni? U krainie sumlennych vybaraŭ abo ŭ krainie, dzie vybaru niama. Čym bolš nas budzie na baku svabody, tym my macniejšyja. U adzinočku samyja śmiełyja z nas zaznajuć parazu. Kab my pieramahli, kožny siońnia musić adoleć svoj strach».
Rada Biełaruskaha PENa vykazvaje pratest suprać cisku, zapałochvańniaŭ i biesčałaviečnaha staŭleńnia da ludziej u suviazi z vykazvańniem imi svajho mierkavańnia i ŭdziełam u lehalnych masavych mierapryjemstvach i zaklikaje ŭłady da šanavańnia pravoŭ čałavieka i humanistyčnaha staŭleńnia da asoby.
Kamientary