Jeździć na Ferrari, piša pieśni, pracuje na baćku. Čym zajmajucca dzieci biełaruskich sielebryci
Hraje ŭ teatry ŭ Łatvii, stvaraje videahulni, vučycca ŭ raskošnym Manaka… «Naša Nina» pahladzieła, jak skłaŭsia los dziaciej biełaruskich sielebryci.
Adela Volskaja
22-hadovaja dačka Lavona Volskaha taksama śpiavačka. U 2017-m jana vypuściła svoj pieršy albom.
«Što da paraŭnańniaŭ z baćkam, to ŭ nas ź im zusim roznyja temy. Jon piša pra publičnaje: hramadskija źjavy, palityku tuju ž. Ja ž nakiravanaja ŭnutr siabie, pišu pra asabistyja pieražyvańni», — dzialiłasia jana ŭ intervju «Našaj Ninie».
Adela skončyła 23-ju biełaruskamoŭnuju himnaziju ŭ Minsku, Kołasaŭski licej. Vyšejšuju adukacyju atrymlivała va ŭniviersitecie Maryi Kiury-Składoŭskaj (Lublin) pa śpiecyjalnaści «arhanizatar mierapryjemstvaŭ». Ciapier vučycca tam u mahistratury. Ale Polšča blizkaj dla dziaŭčyny nie stała.
«Ja b usio addała, kab zastacca ciapier užo nazaŭsiody ŭ Minsku. Mnohija kažuć, što heta biessensoŭna, bo tut niama čaho rabić, i ja ź imi častkova zhodnaja. Sama časam prytrymlivałasia takoha ž mierkavańnia. Ale ŭsio ž Biełaruś mnie našmat bližejšaja pa duchu, čym hetaja Polšča, ad jakoj mianie vanituje», — emacyjna vykazvałasia ŭ sacsietkach Adela.
Pavieł Michałok
U svaje 25 syn Siarhieja Michałka paśpieŭ ažanicca i raźvieścisia, pažyć u Maskvie i viarnucca ŭ Minsk.
Vyšejšuju adukacyju Pavieł nie atrymaŭ. Pastupaŭ u Instytut sučasnych viedaŭ imia Šyrokava, na pradziusarski fakultet, ale kinuŭ, nie skončyŭšy pieršaha kursa.
Paśla razvodu baćkoŭ chłopiec žyŭ z maci i ajčymam, ale časta jeździŭ z tatam na hastroli. Dva hady tamu staŭ vystupać ź Siarhiejem — Pavieł kłavišnik u hurcie Drezden. Raniej jon hraŭ u post-pank-hurcie Super Besse i jeździŭ ź imi pa jeŭrapiejskich muzyčnych placoŭkach.
Julija Ajpłatava
Dačka viadomaha dyzajniera Ivana Ajpłatava pajšła pa śladach baćki. Letaś dziaŭčyna skončyła Akademiju mastactvaŭ, fakultet dyzajnu i dekaratyŭna-prykładnoha mastactva.
Ź pieršaha kursa jana pracuje ŭ baćkavaj studyi. Tłumačyła, što choča nabracca vopytu, pierš čym stvarać štości svajo.
«Ci strohi krytyk tata? Ja časam, ščyra kažučy, nie mahu zrazumieć jaho reakcyju. Mnie chočacca, kab, kali ja niešta krutoje prydumała, jon uskliknuŭ: o, kłasna! A jon: tak, dobra. Potym mama raskazvaje, što jon mianie pachvaliŭ. Kaniečnie, heta vielmi dapamahaje, kali pobač jość taki daśviedčany čałaviek», — dzialiłasia jana padčas abarony dypłomu.
Ihnat Bandarčuk
Synu Hanny Bond 20 hod. Spačatku jon pastupiŭ u muzyčny kaledž, ale paśla vyrašyŭ być biznesoŭcam, a nie pijanistam. Ciapier chłopiec žyvie ŭ Manaka i vučycca prodažam u tamtejšym univiersitecie.
Ihnat viedaje anhielskuju movu, krychu francuzskuju i italjanskuju. Cikavicca kryptavalutami, handluje na biržy, čytaje biznes-litaraturu. Zapisvaje taksama anłajn-sieminary pra asabisty rost i pra toje, jak zarablać na pieraprodažy modnaha adzieńnia.
Sam chłopiec lubić brendavyja rečy i raskošu. Nosić sumku Gucci, jeździć na Ferrari, vychodzić z kram z pakunkami Philipp Plein i Louis Vuitton.
U sacsietkach vykładaje sumiesnyja fota z rasijskimi zorkami — Ivanam Urhantam, Filipam Kirkoravym, Ryhoram Lepsam.
Hanna Bond raskazvała raniej u intervju, što syn dobry da nieprystojnaści i vielmi intelihientny.
Alaksandr i Anton Saładuchi
Synam-dvajniatam Alaksandra Saładuchi pa 32 hady. Anton skončyŭ Instytut sučasnych viedaŭ imia Šyrokava, Alaksandr — filijał Maskoŭskaha instytuta infarmatyki.
Alaksandr Saładucha
Zarablać chłopcy sprabavali pa-roznamu. Hruzili kavuny na rynku, pracavali na składzie firmy, jakaja pradavała zapčastki. Anton niejki čas handlavaŭ duchami. Šmat hod syny pracujuć u kamandzie baćki — kiroŭcam i hukarežysioram, plus zajmajucca arhanizacyjaj kancertaŭ.
Anton Saładucha
Anton i Alaksandr i sami vystupali na scenie — u duecie «Elemient». Hastralavali razam z baćkam pa haradach Biełarusi, Rasii, Ukrainy. Zapisali dva albomy. Ale ŭłasnuju aŭdytoryju nie zajmieli. U adnym ź intervju Anton zhadvaŭ, jak jany sprabavali zładzić solny kancert u Vałožynie, ale raskupili tolki try kvitki.
Chłopcy žanatyja. U Antona dźvie dački. Alaksandr pieršy raz staŭ tatam usiaho miesiac tamu — taksama dačka. Z nahody naradžeńnia ŭnučki Alaksandr Saładucha padaryŭ synu aŭtamabil.
Ivan Stralcoŭ
U akciory pajšoŭ syn śpiavački Iny Afanaśjevaj, jaki ciapier žyvie ŭ Łatvii. Ivan skončyŭ Akademiju mastactvaŭ — vučyŭsia na kursie prymy Kupałaŭskaha Zoi Biełachvościk. Raniej jaho možna było ŭbačyć na scenie Teatra imia Horkaha ŭ Minsku, a ź minułaha hoda chłopiec hraje ŭ Ryžskim ruskim teatry imia M. Čechava.
U Ivana jość žonka i maleńkaja dačka Vara. Žonka Julija Viarchoŭskaja taksama biełaruskaja aktrysa, zdymajecca ŭ kino i sieryjałach. Letaś pryhažunia była siarod finalistak, jakija zmahalisia za prava pradstavić Biełaruś na konkursie «Misis śvietu».
Cikava, što ŭ sacyjalnych sietkach akcior pościć nie tolki liryčnyja nazirańni i foty lubimaj siamji, ale i vierš Hanny Sieviaryniec pra Kolu, ekśpierymient błohieraŭ pa zbory podpisaŭ za Łukašenku.
Anatol Jarmolenka
Syn śpiavački Alesi praciahvaje tvorčuju dynastyju. Chłopiec skončyŭ kaledž mastactvaŭ u Minsku. U jaho była mahčymaść vučycca ŭ Vienskaj kansiervatoryi (siamja peŭny čas žyła ŭ Aŭstryi), ale, jak raskazvaŭ Jarmolenka-starejšy, Anatol vielmi chacieŭ viarnucca na radzimu.
Anatol z 4 hod na scenie. Udzielničaŭ u «Słavianskim bazary» i «Novaj chvali». Pad psieŭdanimam DJ Anatol zapisvaje solnyja albomy i vypuskaje klipy. A taksama vystupaje ź dziedam u składzie ansambla «Siabry».
Anatol sprabavaŭ prabicca i ŭ rasijski šoŭ-biznes — udzielničaŭ u konkursie «Pieśni» na kanale TNT.
U volny čas chłopiec lubić hulać u piejntboł i płavać u basiejnie, zachaplajecca fatahrafijaj.
Jaŭhien Chamienka
Syn lidara hurta «Pałac» Aleha Chamienki nie staŭ źviazvać žyćcio z muzykaj. Skončyŭ Minski kaledž pradprymalnictva pa śpiecyjalnaści «bankaŭskaja sprava», paśla vučyŭsia na ekanamista ŭ Minskim inavacyjnym univiersitecie.
«Pracavaŭ niejki čas u banku, rekłamnym ahienctvie. Ciapier źjaŭlajusia kantent-mieniedžaram u biełaruskaj IT-kampanii SoftSwiss», — raskazaŭ Jaŭhien «Našaj Ninie».
U 16 hod jon byŭ viadoŭcam i aŭtaram prahramy «K-hulni» na «Vośmym kanale», ale bolš na telebačańni nie źjaŭlaŭsia.
«Ja ŭvieś čas zachaplaŭsia piśmieńnictvam, chacieŭ vydać knihu. Cikaŭlusia videahulniami i nastołkami», — dzielicca Jaŭhien.
Ciapier jon jakraz udzielničaje ŭ stvareńni niekalkich hulniaŭ. Płanujecca, što hetyja nastołka i videahulnia vyjduć u nastupnym hodzie.
Uładzimir i Klim Kacianiovy
U televiadučaj Śviatłany Baroŭskaj i akciora Anatola Kacianiova dvoje darosłych synoŭ.
Starejšy Uładzimir skončyŭ adździaleńnie fiłasofii ŭ BDU. Pastupaŭ tudy dziela adukacyi, a nie pracoŭnaj śpiecyjalnaści.
«Jak typovy humanitaryj ź miemaŭ, ja roznaje pierasprabavaŭ: pracavaŭ i barmenam, i dastaŭščykam ježy. U niejki momant karjernaja evalucyja pajšła ŭ patrebnym kirunku, ja prajšoŭ šlach ad mieniedžara prajektaŭ u PR-ahienctvie da kursaŭ ličbavaha dyzajnu.
Pracavaŭ u dyzajn-studyi, viarstaŭ žanočy časopis, ciapier rablu ajdentyku, sajty, prezientacyi, rekłamu. Nie lublu słova fryłansier — ad jaho paviavaje biednaściu i lanotaj. Kažu, što ŭ mianie pryvatnaja praktyka», — padzialiŭsia chłopiec.
U dziacinstvie jon časta čuŭ ad atačeńnia: «Ty tak padobny da taty, dakładna budzieš akcioram!» Ale sam nie maryŭ pra hetu prafiesiju.
«Kali vyras — zrazumieŭ, što praca z kamieraj patrabuje sapraŭdnaha talentu i pryzvańnia. Pieršaha ŭ mianie małavata, druhoha — niama zusim, dyj žadańnia va ŭśviadomlenym uzroście navat nie ŭźnikała».
U volny čas Uładzimir špacyruje pa 10-15 km i słuchaje intervju i padkasty.
«Asobnaje miesca ŭ śpisie chobi zajmaje kamierny chor «Salutarys», u jakim ja śpiavaju ŭžo hod 8. My abjeździli pałovu ziamnoha šara, vyjhrali šmat konkursaŭ. Heta pry tym, što chor amatarski», — dadaŭ jon.
Małodšy Klim zakančvaje fakultet mižkulturnych kamunikacyj Minskaha dziaržaŭnaha linhvistyčnaha ŭniviersiteta.
«Vyrašyŭ pajści tudy, pakolki mnie padabałasia anhielskaja mova. Ciapier niama pastajannaha miesca pracy, ale mieŭsia vopyt u jakaści dziciačaha animatara, pierakładčyka», — raskazaŭ Klim.
Chłopiec lubić sport — zajmajecca ŭ trenažornaj zale i hulaje ŭ baskietboł.
Darja i Mikita Jalinskija
Heta starejšyja dzieci Anžaliki Ahurbaš.
22-hadovy Mikita vučyŭsia u łondanskim kaledžy, paśla — va ŭniviersitecie Bakoni ŭ Miłanie, na fakultecie mižnarodnaj ekanomiki i finansaŭ.
Ciapier žyvie ŭ Miłanie i pracuje kansultantam u šviejcarskaj kampanii, jakaja pastaŭlaje pramysłovaje abstalavańnie. Dahetul byŭ źviazany z kampanijaj SkyWay — redahavaŭ dla ich navukovyja artykuły i arhanizoŭvaŭ kanfierencyi.
Darja taksama vučyłasia ŭ Łondanie. Ciapier joj 32, žyvie ŭ Maskvie.
Pajšła ŭ muzyčny biznes — piša pieśni, trymaje vakalnuju škołu, pracuje na kancertach. Zachaplajecca indyjskaj kulturaj i śpiavaje mantry.
Kamientary