Zorka Kupałaŭskaha: Što heta za bandfarmiravańni arudujuć u centry Minska?
Viadučy akcior Nacyjanalnaha akademičnaha teatra imia Janki Kupały Pavał Charłančuk raskazaŭ Svabodzie pra svajo staŭleńnie da vybarčaj kampanii, čynoŭnikaŭ i televizijnikaŭ.
«Što heta za bandfarmiravańni arudujuć u centry Miensku?»
Pavał Charłančuk 19 červienia pad viečar znachodziŭsia na płoščy Jakuba Kołasa, siadzieli razam z žonkaj Hannaj kala Fiłarmonii na łaŭcy. Da ich padyšoŭ maładzion u mascy, cyvilnym adzieńni, biez apaznavalnych znakaŭ i kaža: sychodźcie adsiul.
«Ja pytajusia — čamu? Jon adkazvaje: «Vy parušajecie hramadski paradak». Jak ja mahu parušać pravaparadak, siedziačy na łaŭcy? Ja naahuł nie razumieju, što adbyvajecca: čałaviek nie nazvaŭsia, jon u zvyčajnym cyvilnym adzieńni, padychodzić i prosić mianie syści. Situacyja: prosta niejki čałaviek padychodzić da mianie i abvinavačvaje ŭ parušeńni pravaparadku! Što heta za ludzi? Heta nie milicyja, nie AMAP, prosta čałaviek u cyvilnym.
Što heta za bandfarmiravańni, jakija arudujuć u centry Minska? Ja nie bačyŭ nivodnaha pjanaha na vulicy, ludzi hulali ŭ dobraje nadvorje, stajali ŭ čarzie pastavić u apošni dzień podpis za kandydata ŭ kandydaty. Biezzakońnia z boku prostych hramadzian, ludziej, jakija ŭ čerhach stajać, ja nie bačyŭ. A z boku hetych nieviadomych ludziej bačyŭ. Dziŭnyja ludzi ŭ cyvilnym žorstka chapajuć minakoŭ, kali chtości vypadkova raptam apynuŭsia nie ŭ tym miescy.
Ja takoha naahuł nie pamiataju, u maich dośviedzie takoha nie było. Heta niejkaja ahonija. I mnie vielmi škada ludziej, jakich pasadzili i aštrafavali», — kaža Pavał Charłančuk.
«Kali ty ŭpeŭnieny, što pieramožaš lubuju kamandu, pieramažy sumlenna!»
Što jon dumaje pra pačatak sioletniaj vybarčaj kampanii? Akcior — zaŭziaty futbalist, tamu paraŭnaŭ ciapierašniuju situacyju ź niesumlennaj hulnioj u futboł.
«Viedajecie, usia hetaja vybarčaja honka nahadvaje mnie situacyju, kali ty pryjšoŭ na futbolny matč, zapłaciŭ za heta hrošy, ale ŭ adnoj kamandzie, jak było ŭ dziacinstvie, jość «varatar-vadziła»: bramnik staić na bramie, ale maje prava «vadzicca». I jon biare ŭsiu hulniu na siabie: i ŭ abaronie, i ŭ paŭabaronie, i ŭ napadzieńni. Ź miačom tolki jon adzin. I pry hetym jašče ludziej z kamandy supiernika prosta prybirajuć, kab pakinuć pustuju bramu, i jon tudy zabiŭ hoł. Takaja hulnia absalutna niecikavaja. U hetym niama duchu spabornictva, niama spraviadlivaści, nie vykonvajucca praviły i zakony. A ja za heta jašče pavinien płacić hrošy!
Kali ty ŭpeŭnieny, što pieramožaš lubuju kamandu, dyk pieramažy sumlenna! Chaj heta budzie baraćba — spraviadlivaja i sumlennaja. Ja chacieŭ by, kab usio adbyvałasia pavodle zakona. A toje, što ciapier adbyvajecca ŭ centry Minska, dyj nia tolki ŭ Minsku, ale ŭ inšych haradach, navat maleńkich — Łunincy, Kalinkavičach, Hancavičach, Bieraści — heta prosta biezzakońnie. Heta niejkaja inšaja realnaść. Žudasnaja realnaść».
«Heta paraza ŭłady na ŭsich frantach»
Aburajecca Pavał i dziaržaŭnymi telekanałami, i ich viadoŭcami. Raskazaŭ pra palemiku ŭ fejsbuku z adnym teležurnalistam — «tvaram telekanała».
«Ja pračytaŭ, jak hety žurnalist mieŭ nieaściarožnaść vykazacca nakont łancuhoŭ salidarnaści — maŭlaŭ, pravilna razhaniajuć. Dy jašče tak abraźliva, hniusna! Ja ŭ pryvacie rezka adkazaŭ jamu. Nu jak tak možna chłusić, krucicca, prystasoŭvacca, bałansavać?
Pasłuchajcie tolki, što kažuć z teleekranaŭ našy vysokapastaŭlenyja čynoŭniki. Tych, chto zaraz pryjšoŭ va ŭrad, ja nazyvaju «ŭładaj pakryŭdžanych školnikaŭ». Heta zaciukanyja školniki, jakich nikoli nie prymali ŭsurjoz. Kali ja hladžu na novaha kiraŭnika Kamiteta dziaržaŭnaha kantrolu, jaki ahučvaje padrychtavany tekst, a kali jamu zadajuć pytańni, — jon taki ščaślivy, što da jaho takaja ŭvaha!
Heta paraza ŭłady na ŭsich frantach. Va ŭsich narmalnych ludziej adnaznačnaja acenka taho, što adbyvajecca, — heta ahonija ŭłady. Tolki ŭ samoj ułady, čynoŭnikaŭ, siłavikoŭ, pravaachoŭnikaŭ, televizijnikaŭ — nibyta inšy śviet. I ich mnie taksama škada», — kaža viadučy akcior Kupałaŭskaha teatra i Teatra-studyi kinaaktora Pavał Charłančuk.
Kamientary