«Zaklikaju ŭsich iści ŭ apošni dzień». Bieraściejec, jaki źniaŭ ukid biuleteniaŭ na minułych vybarach, znoŭ stanie naziralnikam

Bieraściejec Juryj Vaščančuk staŭ adnym z hierojaŭ minułych parłamienckich vybaraŭ. Jon źniaŭ na videa, jak rabotnica dziciačaha sadka sprabavała ŭkinuć u skryniu stos biuleteniaŭ.

Pavialičyć

Paśla hetaha samoha Juryja pazbavili akredytacyi naziralnika: hetaha zapatrabavała niepasredna Jarmošyna. Historyja dajšła až da Łukašenki, jaki navat abazvaŭ naziralnika «mudakom».

Ale sioleta Vaščančuk taksama biare aktyŭny ŭdzieł u vybarčaj kampanii. Jon sprabavaŭ trapić u vybarčyja kamisii, a kali heta nie atrymałasia, to vyrašyŭ znoŭ iści ŭ naziralniki.

«Paśla historyi z parłamienckimi vybarami ŭ mianie piersanalna prablem nijakich nie było. Ale chtości sa śpiecsłužbaŭ prychodziŭ na pracu da majho baćki, — raskazvaje Vaščančuk. — Maje mama i tata — piensijaniery, ale praciahvajuć pracu. Baćka, naprykład, na toj momant choć byŭ na piensii, ale pracavaŭ inžynieram. I da jaho zavitaŭ niejki śpiecsłužbist. Hety «hość» vielmi dalikatna i akuratna raspytaŭ pra pobytavyja pytańni kštałtu «chto dapamahaje hrašyma vašamu synu? Vy? A što budzie, kali vy pierastaniecie jamu dapamahać?», «a z kim vy žyviacie? A z kim žyvie vaš syn?» i hetak dalej. Usia razmova zaniała chvilin 5, kazaŭ baćka.

Moža, heta prosta było dla ptušački, prosta kab pakazać mnie, što za mnoj pryhladvajuć.

Paśla hetaha mama pačała chvalavacca, što mohuć pryjści i da jaje na pracu, ale abyšłosia».

36-hadovy Juryj siońnia praciahvaje sproby trapić u IT: skončvaje kursy ad kampanii «Jepam». Kaža, što «sytyja ajcišniki» taksama nie zadavolenyja situacyjaj u krainie.

«Ja viedaju šmat ludziej z hetaj śfiery i čuju, što jany kažuć. Usie nastrojenyja tak ža, jak i siaredniestatystyčnyja biełarusy. Usie čakajuć čahości, niejkaha cuda. Usie biez vyklučeńnia razumiejuć: treba štości mianiać u krainie. Bo ciapier niama zvarotnaj suviazi z uładaj — jość sacyjalny zapyt na pieramieny, a ŭłada nikoha nie čuje i ničoha nie robić.

Nu i nichto nie vieryć u sumlenny padlik hałasoŭ, — kaža Juryj. —

Jak ja baču, u śfiery IT jość try asnoŭnyja momanty, źviazanyja ź siońniašniaj situacyjaj u Biełarusi.

Pa-pieršaje, uvieś biznes arhanizavany tak, što kiraŭniki časta znachodziacca nie ŭ Biełarusi, kab da ich nie pryjšli «dziadźki z čamadančykami» i nie paprasili «čaho-niebudź dla dziaržavy». Praz heta vyłaziać prablemy čas ad času, bo kiraŭnictva nie znachodzicca ŭ kantakcie z kalektyvam i padnačalenymi. Heta banalna niazručna.

Druhi momant: sudovaja sistema. Usie bačać, jakija prysudy vynosiacca i za što. Sudovaja sistema absalutna łajalnaja dziejučaj uładzie.

I treciaje: ajcišniki, jak i ŭsie inšyja ludzi, bajacca siłavikoŭ. Bajacca svavolstva amapaŭcaŭ, bajacca, što milicyjant moža žorstka zatrymać ciabie, źbić ciabie, a paśla jaho nijak za heta nie pakarajuć.

Sam ja z hetym usim užo amal źmiryŭsia. Apošnija hadoŭ z 10 ja ćviaroza razumieju, u jakim hramadstvie žyvu. Ale sioletnija dziejańni ŭłady dla mnohich ludziej stanoviacca šokam. U ajci-kamandzie, ź jakoj ja pracuju zaraz nad prajektam, jość načalnik z Maskvy. Dyk jon kaža: «Durdom i ŭ nas adbyvajecca, ale ja hladžu na vas i dziŭlusia, jak daloka mohuć zajści ŭłady».

Vaščančuk užo kala čatyry hady siabra Biełaruskaj sacyjał-demakratyčnaj partyi. Na vybary nichto ad ich nie pajšoŭ, tamu na sioletnich vybarach Juryj ustupiŭ u inicyjatyŭnuju hrupu inšaha «sacyjał-demakrata» — Siarhieja Čeračania. 

«Prahrama Čeračania mnie blizkaja, tamu ja i padtrymaŭ jaho.

Akramia taho ja pakinuŭ svoj podpis za Capkału, bo jon čałaviek z ajci-siektara. Babaryka mnie byŭ na toj momant zusim nieznajomy. Siońnia, vyvučyŭšy asoby kandydataŭ, ja ŭsio ž bolš schilajusia da Babaryki: jon bolš pasuje ŭ jakaści prezidenta, čym Capkała.

Ale Babaryku ja nie viedaju jak čałavieka. Jon unušaje davier, kaniečnie, uvieś taki z vyhladu puchleńki, dobrańki… Uražańnie pazityŭnaje pakidaje, ale ž ja kiepska viedaju jaho».

Taksama Juryj spadziajecca stać naziralnikam i na sioletnich prezidenckich vybarach. Spačatku sprabavaŭ trapić u kamisiju pa padliku hałasoŭ, ale jak i bolšaść «nie tych» pretendentaŭ, jaho kandydaturu adchilili.

«Za kaho hałasavać budu pakul nie skažu — jašče ž nie zarehistravali kandydataŭ. Ale dakładna nie prahałasuju za dziejučaha prezidenta, — kaža Vaščančuk. — I budu zaklikać svaich blizkich, kab jany nie bajkatavali vybary, kab hałasavali, chacia b i suprać usich. Pryčym nie daterminova, a ŭ asnoŭny dzień vybaraŭ.

Kantrol za vybarami całkam u rukach dziaržavy. Hetyja kamisii, jakija ličać hałasy, dazvalajuć uładzie namalavać u vyniku lubuju ličbu. Ale ž hałasavańnie pakaža, nakolki prazrystymi buduć vybar. Kali ludzi pryjduć i prahałasujuć, to takim čynam pakažuć kolkaść tych, chto hatovy da pieramien. I kali budzie šmat hałasoŭ za niejkaha kandydata, to sfalsifikavać vybary budzie składaniej».

• 0
• 0
• 0
• 0
• 0
• 0
• 0
• 0