«Na, s…ka, atrymaj!» Doktar-urołah raskazaŭ, jak jaho pazaŭčora žorstka źbili ŭ milicejskim busiku i RUUSie

Alaksieju Biełastockamu 31 hod, sam jon rodam z Mahilova. Vučyŭsia ŭ Homielskim miedycynskim univiersitecie na ŭrołaha. Tam ža prachodziŭ ardynaturu. U 2019 hodzie Alaksiej pierajechaŭ u Minsk, da hetaha ŭ stalicu pierabralisia i jahonyja baćki, uładkavaŭsia ŭ 4-ju balnicu.

Pavialičyć

2 vieraśnia Alaksieja da siabie dadomu ŭ łaźniu paklikaŭ baćka. «Ja zvyčajna jedu da jaho pa MKADzie, ale na hety raz vyrašyŭ prajechać praz horad, kab pahladzieć, što tam adbyvajecca. Na Puškinskaj ubačyŭ, što tam kučkaj stajać ludzi. Dumaju, mo patrebna niejkaja dapamoha, spyniŭ mašynu, pryparkavaŭsia, ale dapamohi nie treba było. U vyniku ja dałučyŭsia da ludziej, jakija prybirali sol z nadpisu «Nie zabudziem» na miescy zabojstva Tarajkoŭskaha», — raskazvaje «NN» lekar.

Pobač ź ludźmi ŭvieś čas znachodziŭsia milicyjanier. «Ja ŭbačyŭ, što jon vielmi nachabna sprabavaŭ adahnać ludziej, ja padyšoŭ da jaho, staŭ pytacca, na jakoj asnovie jon heta robicca, chaj pradstavicca, pakaža dakumienty. U vyniku ja ničoha nie dabiŭsia i znoŭ adyšoŭ da ludziej. Potym jon staŭ čaplacca jašče da adnaho chłopca, ja staŭ za jaho zastupacca: «Chto vy taki? Što robicie?» Chłopca atrymałasia adbić, a ŭ svoj bok pačuŭ: «Ja ciabie ŭ RUUS adpraŭlu».

Alaksiej kaža, što praź niejki čas da ich padyšoŭ čałaviek u kaściumie («mabyć, načalnik»), jaki znoŭ zaklikaŭ razyścisia. «Ja spytaŭ: heta prośba? Mnie adkazali, što tak. Ja adkazaŭ, što ŭ takim razie prośbu adchilaju. I tak jon na mianie pahladzieŭ, što stała zrazumieła, što dabrom heta nie skončycca. Praź niejki čas pačuŭsia žanočy kryk i ja ŭbačyŭ kala dziasiatka mocnych takich chłopcaŭ u maskach».

Kali Biełastockaha zatrymlivali, to jaho nie źbivali. Kali ž zakinuli ŭ busik, to jon pačuŭ: «Zaviešvajcie štorki». «U hety momant i pačali bić. Ź mianie źniali zaplečnik, majku apranuli na hałavu. Pakul byli siły, to ja supraciŭlaŭsia, stajaŭ na nahach, potym mianie pavalili na padłohu. Adzin čałaviek trymaŭ mianie, inšy korpaŭsia ŭ mabilniku, a treci — źbivaŭ. Chutčej za ŭsio, što źbivaŭ toj samy, ź jakim ja mieŭ dyjałoh. Maŭlaŭ, chto ja taki, kab u jaho dakumienty patrabavać. Šmat niecenzurna łajaŭsia: «Na, s…ka, atrymaj» i ŭ takim duchu. Bili ŭsiu darohu da RUUS pa bakach, śpinie, šyi», — raskazvaje paciarpieły.

U pastarunku Alaksieja spačatku kinuli na padłohu ŭ asobny pakoj. «Tam ja atrymaŭ dva ŭdary pa hałavie: spačatku ŭ rajon pravaha vucha, potym — levaha. Udary byli mocnymi, u mianie razbalełasia hałava, prasiŭ tabletku, ale pačuŭ tolki: «Aha, zaraz pabiahu». Skłali dva pratakoły: za ŭdzieł u niesankcyjanavanaj akcyi i niepadparadkavańnie dziejańniam milicyi i advieźli na Akreścina. U izalatary mianie nie bili, ja prasiŭ vyklikać chutkuju, što ŭ mianie balić śpina. Ale čuŭ tolki, što tak-tak, abaviazkova».

Noč doktar pravioŭ u kamiery. «Krychu atrymałasia paspać: spačatku siedziačy, potym ležačy. U mianie pačalisia dryžyki, motašnaść, vanity. Fielčarka pamierała cisk, jon byŭ pavyšany. Tym nie mienš, mianie paviali na sud u inšaje kryło izalatara, jon musiŭ adbyvacca pa skajpie. Ja navat nie moh hladzieć na sudździu, bo ŭ mianie tak baleli myšcy hałavy, što nie moh jaje padniać. Ja paprasiŭ pieranieści sud u suviazi sa svaim stanam, sudździa daŭ dazvoł, tolki tady mianie zabrała chutkaja».

U vyniku ŭ Biełastockaha paćvierdziłasia čerapna-mazhavaja traŭma, udar levaj nyrki, a taksama pierałom chrybietki. «Chadzić mahu, ale tolki pa roŭnym i vielmi marudna, — kaža jon. — Padniacca pa leśvicy,ci spuścicca, było b składana».

Kalehi pa 4-j balnicy i telefanujuć, i pryjazdžajuć da jaho. «Siońnia pryjazdžaŭ navat hałoŭny ŭrač z načmiedam pa chirurhii, ahledzieli mianie. Skazali, kab trymaŭsia. Kažuć, što pra zvalnieńnie nie moža być i havorki».

Alaksiej Biełastocki raskazvaje, što chadziŭ amal na ŭsie akcyi salidarnaści ŭ pieršyja dni. «Jeździli z žonkaj u Žodzina, jana ŭ mianie taksama miedyk, dzie sustrakali ludziej ź SIZA. Kali treba niejkaja dapamoha, byli hatovyja rabić ahlady. A litaralna praź dzień paśla Žodzina dapamahaŭ u apieravańni chłopca, jaki mocna paciarpieŭ na Akreścina».

• 0
• 0
• 0
• 0
• 0
• 0
• 0
• 0