Maładyja ź Minska vyrašyli adśviatkavać viasielle na niadzielnym maršy

Antoś i Nastaśsia (proźvišča para paprasiła nie nazyvać u metach biaśpieki) uziali šlub i adśviatkavali viasielle na niadzielnym maršy 27 vieraśnia.

Pavialičyć

Maładyja razam bolš za piać hod. Ažanicca vyrašyli mienavita ŭ 2020 hodzie.

— Nam raniej być raśpisanymi niejak nie było patreby, ale ciapier taki čas — biez papierki my adno adnamu nichto, pieradački navat nie pieradasi. Tak što my vyrašyli aformić adnosiny aficyjna, kab mieć mahčymaść adno adnamu dapamahać.

Paznajomili budučuju paru znajomyja. Antoś, jak i Nastaśsia, lubić vandravać. I, pabyvaŭšy ŭ Finlandyi, pa prośbie dziaŭčyny padzialiŭsia ź joj dośviedam: jak tudy praściej dabracca ź Biełarusi, jakija padvodnyja kamiani. Chutka jany pačali vandravać razam. Na dadzieny momant u topie lubimych krain na dvaich — Partuhalija. Na žal, karanavirus pakul pastaviŭ supolnaje chobi na paŭzu.

— Prapanovy jak takoj nie było. My razam abmierkavali apošnija padziei ŭ krainie i dosyć budzionna adšukali ZAHS, dzie možna jak maha chutčej raśpisacca. Heta było padobna da zapisu da doktara z razumieńniem, što taja adna bazavaja vieličynia, jakuju my addajom za rośpis, całkam siabie akupić u vypadku čaho, — praciahvaje raskazvać Antoś.

U ZAHS maładyja adpravilisia ŭ zvyčajnym adzieńni ŭ piatnicu. Paśla schadzili ŭ restaran. A voś užo na maršy vyrašyli adznačyć viasielle razam z tysiačami biełarusaŭ: nadzieli fatu i čorna-biełyja kaściumy.

— Da niadzieli nichto, akramia baćkoŭ, nie viedaŭ, što my ŭziali šlub. Baćki, darečy, uspryniali adsutnaść tradycyjnaha śviatkavańnia narmalna. Dla siabroŭ naša źjaŭleńnie na maršy ŭ vobrazie muža i žonki stała sapraŭdnym pierformansam-navinoj. Ciapier vinšujuć u instahramie. A jašče prydumali dla nas łozunh-kryčałku ŭ styli «Sabačku!»: «Svad́bačku!» — śmiajecca surazmoŭca.

Akramia siabroŭ, 27 vieraśnia paru vinšavali dziasiatki nieznajomcaŭ. Šmat ludziej padychodzili da ich, kab sfatahrafavać dla siabie i skazać «Horka!», ščyra radavalisia ich novamu statusu.

Darečy, ideja adpravicca na marš u takich vobrazach naležyć mienavita Antosiu. Ën pracuje ŭ śfiery absłuhoŭvańnia i pryznajecca, što vielmi lubić, kali na šeściach źjaŭlajucca karnavalnyja elemienty.

— Mnie padajecca, ciapier usim nam nie chapaje viesiałości, — kaža chłopiec. — Chočacca, kab ludzi chacia b krychu paśmichalisia. Chočacca kultyvavać radaść, a nie strach.

• 0
• 0
• 0
• 0
• 0
• 0
• 0
• 0