U razhonie demanstracyj biaruć udzieł aficery śpiecnaza Minabarony ŭ štackim?
Što za padraździaleńni ŭdzielničajuć u razhonie demanstrantaŭ u stalicy?
Nieadnarazova ŭžo ludzi identyfikoŭvali roznyja padraździaleńni Ministerstva ŭnutranych spraŭ: AMAP, PPSM, Ałmaz, SACHR, HUBAZiK, a taksama Unutranyja vojski.
Taksama ŭ razhonach pieršych dzion paśla vybaraŭ, zdajecca, udzielničali vieterany śpiecnaza pad kiraŭnictvam Dźmitryja Paŭličenki, ich viedamasnuju prynaležnaść vyznačyć ciažka, kali jana ŭvohule jość.
Jašče «Našaj Nivie» stała viadoma prynamsi pra adnaho kursanta Instytuta pahraničnaj słužby, jaki atrymaŭ traŭmu pry razhonie demanstracyj 9-11 žniŭnia.
Ale, vyhladaje, što ŭ razhonach udzielničajuć taksama i supracoŭniki Ministerstva abarony, a kankretna — asobnyja aficery sił śpiecyjalnych apieracyj z 5-j asobnaj bryhady ŭ Marjinaj Horcy.
Što na heta pakazvaje?
Najpierš, technika na vulicach Minska, jakaja znachodzicca ŭ rasparadžeńni tolki SSA — džypy DongFeng Mengshi.
Dalej, śpiecyfičnyja armiejskija broniekamizelki i kaski, jakimi zvyčajna nie karystajucca ŭ milicyi.
Źviarnicie ŭvahu na asablivaści šlemaŭ bajcoŭ: śpiecyfičnaja forma z adkrytym vucham, jakaja dazvalaje dadatkova abaranicca ad akustyčnych traŭm, a taksama lipučaja raźmietka. Jana vykarystoŭvajecca dla naviešvańnia maskirujučych ci apaznavalnych znakaŭ. Fota zroblena na bazie śpiecnaza ŭ Marjinaj Horcy, padčas naviedvańnia čaści Łukašenkam.
A ciapier paraŭnajcie hetyja šlemy z tym, jakija nadziety na čałavieku ŭ cyvilnym, jaki viadzie zatrymanaha va Uruččy 27 vieraśnia. Imavierna, heta adnolkavy šlem.
Voś jašče adno fota ź Niamihi, jakoje ilustruje supadzieńnie amunicyi:
A voś videa, źniataje ŭ adnym ź minskich dvaroŭ 20 vieraśnia. Ludzi ŭ cyvilnym, ale z vajskovymi šlemami i broniekamizelkami (ci jość tam broniepłaściny — nieviadoma) davoli niervova havorać pamiž saboj i, padajecca, łajucca.
U čas svarki čutny mianuški, pa jakich jany źviartajucca adzin da adnaho: «Makar» i «Hłyba».
Čytačy «Našaj Nivy» ź liku vajskoŭcaŭ źviarnuli ŭvahu, što hetyja mianuški supadajuć ź mianuškami asobnych aficeraŭ pieršaha asobnaha atrada marjinahorskaj bryhady śpiecnaza.
Nam viadomyja i mierkavanyja imiony hetych ludziej, hetuju infarmacyju my pieradali ŭ pres-słužbu Minabarony i paprasili paćvierdžańnia infarmacyi ab udziele bajcoŭ armiejskaha śpiecnaza ŭ padaŭleńni pratestaŭ praciŭnikaŭ Alaksandra Łukašenki.
Ni paćviardžać, ni abviarhać infarmacyju ŭ Minabarony nie stali, pakinuŭšy pytańnie biez adkazu.
Pavodle źviestak žurnalistaŭ, bajcy Sił śpiecyjalnych apieracyj brali ŭdzieł u palicejskich apieracyjach suprać demanstrantaŭ i ŭdzielnikaŭ ruchu za hramadzianskija pravy ŭ niekatorych rehijanalnych haradach. Niekatorych ź ich apaznavali demanstranty.
SSA ličacca elitaj biełaruskaha vojska, a pieršy asobny atrad z 5-j ABSP — elitaj elit.
Ciapier čytajuć
Połk Kalinoŭskaha paviedamiŭ pra hibiel troch bajcoŭ7
Kamientary