Śpiecapieracyja ŭ pratesnym ŽK «Kaskad» — pryjechała vosiem busaŭ, siłaviki łomiacca ŭ kvatery
U minski žyły kompleks «Kaskad» pryjechali mikraaŭtobusy ź ludźmi ŭ bałakłavach, nieviadomyja pačali chadzić pa padjezdach.
Miascovyja žychary kažuć, što siłaviki sprabujuć trapić u niekatoryja kvatery z pastanovami ab vobšuku.
Ludzi kažuć, što siłaviki ŭ čornym pryjechali kala 9:00. «Pa pierymietry kvartała — kala dziesiaci mašyn AMAPa, na vulicy niekalki «cicharoŭ».
Siłaviki, pa słovach miascovych, pryjšli ŭ niekalki kvater, raspaviadajuć ab uzłomach dźviarej.
Žychary kažuć, što siłaviki pryjšli da ludziej jakija byli naziralnikami na vybarach, piša Anłajnier.
«Uzłamali minimum čatyry kvatery, dziejničali drylom i łomam. U ludziej pravodziać pieratrusy pa niejkaj kryminalnaj spravy. Ciapier siłaviki pajšli pa inšych kvaterach».
Taksama nieviadomyja ŭ čornym «źniali majtki» — miž damami na raściažcy visieła bieł-čyrvona-biełaja instalacyja ŭ vyhladzie nižniaj bializny.
«Kaskad» — adzin z samych aktyŭnych kvartałaŭ Minska. Tut masava vyviešvajucca bieł-čyrvona-biełyja ściahi, ludzi ładziać viečarovyja kancerty.
Kamientary