U homielskaj VNU dekan fakulteta admoviŭsia karać studentaŭ za palityčnuju pazicyju

U homielskim dziaržaŭnym techničnym univiersitecie imia Suchoha dekan adnaho z fakultetaŭ pazbaviŭsia pasady za toje, što admoviŭsia vynosić dyscyplinarnyja spahnańni studentam, jakija ŭdzielničali ŭ akcyjach pratestaŭ, piša Tut.by.

Kandydat fizika-matematyčnych navuk, dacent Uładzimir Łukjanienka va ŭniviersitecie pracuje amal 10 hadoŭ. Šeść ź ich byŭ namieśnikam dekana fakulteta aŭtamatyzavanych i infarmacyjnych sistem. Siem miesiacaŭ tamu pierajšoŭ na pasadu dekana, u minuły paniadziełak ža hetaj pasady pazbaviŭsia.

Pavialičyć

Jak raspavioŭ Tut.by eks-dekan, va ŭniviersitet pryjšoŭ list ad uładaŭ z prośbaj da administracyi pravieści prafiłaktyčnuju pracu sa studentami i vykładčykami ŭniviersiteta, jakija raniej pryciahvalisia da administracyjnaj adkaznaści pavodle artykuła 23.34 KaAP. Da lista prykładalisia dva śpisy. Adzin — z proźviščami siami studentaŭ i mahistrantaŭ (čaćviora ź ich vučacca na fakultecie Uładzimira Łukjanienki), druhi — z proźviščami supracoŭnikaŭ i vykładčykaŭ VNU. Ź listom dekana ŭ administracyi aznajomili pad podpis, a vusna, kaža jon, paprasili vynieści studentam sa śpisu zaŭvahu abo vymovu.

Łukjanienka admoviŭsia.

— Zhodna ź dziejučymi va ŭniviersitecie Praviłami ŭnutranaha rasparadku dla navučencaŭ, dyscyplinarnaje spahnańnie mohuć vynieści i za adzin prapuščany z važkich pryčyn zaniatak. Heta značyć miechanizm moža być taki: ciapier — zaŭvaha, potym za luby prahuł — vymova, a dalej užo adličeńnie, — tłumačyć Łukjanienka.

U minuły paniadziełak jaho znoŭ vyklikali da rektara i dali čas vykanać ukazańnie administracyi — da sierady. Ale Uładzimir Alehavič, kaža, znoŭ adkazaŭ admovaj, patłumačyŭšy, što ličyć ukazańnie niezakonnym.

U hety ž dzień dekan napisaŭ zajavu: paprasiŭ pieravieści jaho na pasadu dacenta kafiedry. Ab svaim rašeńni Uładzimir nie škaduje.

— Paśla taho, što ŭ nas pačało adbyvacca ŭ krainie sa žniŭnia, vielmi składana nijak na heta nie reahavać. Jak možna rabić vyhlad, što ničoha nie adbyłosia, što nikoha nie źbivali, nikoha nie katavali, nichto nie zahinuŭ, nichto nie skraŭ u ludziej ich hałasy? Adrazu paśla vybaraŭ my abmiarkoŭvali z žonkaj, što jość rečy, jakija ja dakładna nie stanu rabić, navat kali ad hetaha budzie zaležyć, ci zastanusia ja pracavać albo nie. U nas rastuć dzieci, jak im dalej hladzieć u vočy, što im kazać, kali jany buduć pytacca pra heta niaprosty čas?

• 0
• 0
• 0
• 0
• 0
• 0
• 0
• 0