Doktar-infiekcyjanist: My padychodzim da piku druhoj chvali karanavirusa

Biełaruś padychodzić da piku druhoj chvali karanavirusa. Pra heta ŭ efiry ANT zajaviŭ kandydat miedycynskich navuk, zahadčyk kafiedry infiekcyjnych chvarob i dziciačych infiekcyj BiełMAPA Juryj Horbič, piša Tut.by.

— My troški adstajom ad toj ža Jeŭropy, u tym piku z toj pryčyny, što ŭ Jeŭropie pačałosia ŭsio raniej, u nas — krychu paźniej zaviaršyłasia pieršaja chvala.

Pa słovach śpiecyjalista, nie vyklučany i treciaja, i čaćviortaja chvala karanavirusa, ale havaryć pra heta dakładna nie prychodzicca, bo zachvorvańnie zusim novaje.

Horbič adznačyŭ, što kala 80% chvorych pieranosiać zachvorvańnie lohka, kala 17-20% — ciažka, 3-5% — traplajuć u reanimacyju.

— Realna, pra što my možam kazać — my padychodzim da piku druhoj chvali, my nabližajemsia da miažy prapusknoj zdolnaści stacyjanarnych arhanizacyj sistemy achovy zdaroŭja.

Miedyk paviedamiŭ, što kolkaść tych, chto zachvareŭ u druhuju chvalu ŭ Biełarusi bolš, čym viasnoj. Adnoj z pryčyn hetaha, na dumku Horbiča, źjaŭlajecca toje, što ŭ ludziej źmianiłasia staŭleńnie da karanavirusa — my stamilisia jaho bajacca.

— Nam treba viarnuć nie strach, treba viarnuć razumieńnie taho, što heta niebiaśpiečna. Ciapier, kali pačynaje ŭvodzicca masačny režym, heta vidać. Bo viartajecca razumieńnie, kali my bačym, što raście zachvorvańnie i ŭ kožnaj siamji — dzieści svajaki, dzieści znajomyja, dzieści kalehi pa pracy. I nie daj boh, chtości nie viarnuŭsia z balnicy, na žal, takija vypadki byvajuć, pa-durnomu admaŭlać, što hetaha niama. Realna ŭ hety momant pačynaješ zadumvacca: a moža być, nastupnym budzieš ty? I voś tady prychodzić heta ŭśviedamleńnie. Bo na samaj spravie nidzie ŭ śviecie na dadzieny momant nichto nie daść 100-pracentnaj harantyi, što, kali čałaviek zachvareje, jon ačuniaje.

Juryj Horbič skazaŭ, što ŭ druhuju chvalu COVID-19 zastaŭsia tym ža.

— Usio toj ža. Šmat chto kaža pra toje, što jon hublaje svaju virulentnaść, na samaj spravie ja ryzyknu z hetym paspračacca, bo jon sychodzić u novyja dla siabie papulacyi. Kali my ŭspomnim pieršuju chvalu, heta pieravažna byli stałyja ludzi, ludzi ź vialikaj kolkaściu faktaraŭ ryzyki. Maładyja ludzi taksama sustrakalisia, ale jany składali biezumoŭnuju mienšaść. Zaraz papulacyja ludziej, jakija zachvareli i traplajuć u pole zroku miedykaŭ, maładzieje. Virus znachodzić dla siabie novuju papulacyju, adpaviedna, kazać pra toje, što ŭ jaho źnižajecca virulentnaść, to-bok ułaścivaść vyklikać zachvorvańnie, kali kazać bolš prostaj movaj, nielha.

Pa słovach śpiecyjalista, razmova ab kalektyŭnym imunitecie niasłušnaja i heta ŭžo pryznała SAAZ. Antycieły bolš za try miesiacy zachoŭvajucca ŭ 30-36% tych, chto pierachvareŭ, a astatnija mohuć chvareć paŭtorna. I ŭ Biełarusi takija vypadki ŭžo rehistrujucca.

• 0
• 0
• 0
• 0
• 0
• 0
• 0
• 0