Rasija skłała śpis krain, ź jakich nielha brać najmitaŭ na vajnu z Ukrainaj. Biełaruś u jaho nie ŭvajšła
Rasija ŭviała abmiežavańni na viarboŭku najmitaŭ z šerahu krain, jakija raniej ličylisia «družalubnymi». Pavodle źviestak vydańnia «Važnyje istorii», viarboŭščykam dadzieny śpis dziaržaŭ, hramadzianam jakich ciapier zabaroniena padpisvać kantrakty na słužbu. U pieralik mahli ŭvajści kala 40 krain śvietu.
U śpisie fihurujuć pieravažna krainy Afryki, arabskaha śvietu i niekatoryja inšyja dziaržavy, u tym liku Kitaj, Indyja, Brazilija, Paŭdniovaja Afryka, Turcyja, Kuba, Afhanistan, Iran i Vieniesueła. Śpis pačali raspaŭsiudžvać u pačatku 2026 hoda siarod viarboŭščykaŭ, jakija pracujuć na roznych napramkach.
Rašeńnie ab skaračeńni pieraliku krain aficyjna nie tłumačycca. Miarkujecca, što jano mahło być źviazana z dypłamatyčnymi pieramovami. Niekatoryja dziaržavy, takija jak Indyja, Šry-Łanka ci Niepał, raniej źviartalisia da rasijskich uładaŭ z patrabavańniem spynić viarboŭku ich hramadzian dla ŭdziełu ŭ vajennych dziejańniach. Paśla hetaha asobnyja krainy byli ŭklučanyja ŭ zabaronieny śpis.
Siarod hetych krain — Kienija, hramadzianie jakoj stali adnoj z važnych krynic papaŭnieńnia dla rasijskaj armii. Paviedamlajecca, što častka hramadzian afrykanskich krain trapiła na front padmanam, praz abiacańni pracy abo inšymi šlachami, jakija paźniej vyklikali skarhi i pratesty ich rodnych. U niekatorych vypadkach ludzi źnikali paśla pryjezdu i padpisańnia kantraktu, a ich dalejšy los zastavaŭsia nieviadomym.
Taksama paviedamlajecca, što śpis moža być pašyrany. Niekatoryja błohiery śćviardžajuć, što ŭ jaho dadali novyja krainy, adnak aficyjnaha paćviardžeńnia hetych źmien niama. Pry hetym viarboŭka ŭ asobnych rehijonach, pavodle infarmacyi krynic «Važnych istorij», praciahvajecca.
Pavodle źviestak ukrainskaha prajekta «Chaču žyć», da vosieni 2025 hoda Rasija zavierbavała bolš za 10 tysiač zamiežnych najmitaŭ. Na hramadzian krain, jakija ciapier uniesienyja ŭ «stop-list», prypała 37% ad ahulnaj kolkaści zamiežnikaŭ. Siarod ich lidzirujuć Kuba (bolš za 1000 čałaviek), Niepał (kala 800) i Šry-Łanka (bolš za 700). Najbolšaja ž kolkaść najomnikaŭ prypadaje na dziaržavy JEAES: Tadžykistan (bolš za 1500 čałaviek), Biełaruś (zvyš 1300) i Kazachstan (bolš za 1100).
U 2025 hodzie aktyŭna nabirali hramadzian niekalkich afrykanskich dziaržaŭ, u tym liku Hany, Kamieruna i Kienii.
Rasijskaja ambasada ŭ Karei vyviesiła banier «Pobieda budiet za nami»
Minimum 314 biełarusaŭ zahinuli va Ukrainie, vajujučy za Rasiju. Stali viadomyja imiony. Ad viarboŭki da śmierci prachodzić u siarednim paŭhoda
Bolš za pałovu biełarusaŭ z novaha śpisu, jakija vajujuć za Rasiju, majuć sudzimaści
Chodzić pa Mazyry z aŭtamatam: małady baćka pajechaŭ vajavać za Rasiju i nie chavaje hetaha
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary