Deputat Ananič raspaviała ab padrychtoŭcy zakona pra niedapuščalnaść hieraizacyi nacyzmu

Čynoŭniki płanujuć da viasnovaj siesii parłamienta padrychtavać zakanadaŭčyja akty ab niedapuščalnaści hieraizacyi nacyzmu. Pra heta ŭ efiry telekanała ANT zajaviła deputat Pałaty pradstaŭnikoŭ Nacschoda Lilija Ananič, piša Tut.by.

Pavialičyć

Adnak zakonaprajekt, pa jaje słovach, moža być padrychtavany i raniej za start viasnovaj siesii.

Deputat nie ŭdakładniała, jakija normy mohuć prapisać u dakumiencie, praca nad jakim viadziecca. Udakładnim, što ŭ hetym siužecie dziaržtelekanała havorycca siarod inšaha pra BČB-simvały, u tym liku pra BČB-ściah, a taksama pra pratesnyja ruchi.

— Z ulikam padychodaŭ ab niedapuščalnaści nacyzmu buduć prymać u budučyni i zakanadaŭčyja akty ab niedapuščalnaści hieraizacyi nacyzmu. Zaraz idzie praces aktyŭnaj napracoŭki, i, mahčyma, da viasnovaj siesii my budziem mieć kompleksny dakumient, choć jon moža źjavicca ŭ parłamiencie i ŭ bližejšy čas, — skazała deputat Lilija Ananič, namieśnik staršyni Pastajannaj kamisii pa pravach čałavieka, nacyjanalnych adnosinach i srodkach masavaj infarmacyi.

Jakija-niebudź inšyja detali zakonaprajekta, praca nad jakim viadziecca, jana nie stała paviedamlać.

Udakładnim, što viasnovaja siesija parłamienta, jak praviła, startuje ŭ pieršych čysłach krasavika.

Raniej 24 listapada Alaksandr Łukašenka, prymajučy davierčyja hramaty pasła Izraila, zajaviŭ, što biełaruski parłamient razhledzić zakonaprajekt ab niedapuščalnaści hieraizacyi nacyzmu.

— Našy dziaržavy paśladoŭna adstojvajuć absalutnuju niedapuščalnaść pierahladu jaje vynikaŭ (vynikaŭ Druhoj suśvietnaj vajny) i hieraizacyi nacyzmu (darečy, u bližejšy čas naš parłamient razhledzić zakonaprajekt ab niedapuščalnaści hieraizacyi nacyzmu ŭ Biełarusi). Tak zvanaj hieraizacyjaj siońnia hrašać vielmi mnohija krainy, asabliva raźmieščanyja pobač z nami. A darma. Pierakanany, što nijakija zasłuhi pierad Ajčynaj nie mohuć apraŭdać złačynstvy suprać čałaviectva, — zajaviŭ Łukašenka pasłu Izraila.

Raniej, nahadajem, Łukašenka nazvaŭ bieł-čyrvona-bieły ściah fašysckaj simvolikaj i zajaviŭ, što nie maje namieru tryvać jaje ŭ Minsku.

— My prybiarom hetuju fašysckuju simvoliku z našaha hramadstva. Zrobim heta pryhoža i, pierš za ŭsio, tłumačačy, zabivajučy ŭ hałavu ludziam, što hetaha nielha rabić, — zajaviŭ jon, razmaŭlajučy z rabotnikami «Homsielmaša».

• 0
• 0
• 0
• 0
• 0
• 0
• 0
• 0