Mer Charkava Kiernies pamior ad karanavirusa

Mer Charkava Hienadź Kiernies pamior ad nastupstvaŭ karanavirusa na 62-m hodzie žyćcia, piša RBK-Ukraina.

Jon prachodziŭ lačeńnie ŭ Bierlinskaj klinicy ź vieraśnia. Pra heta ŭ Telegram paviedamiŭ biznesoviec i siabar Kierniesa Pavieł Fuks.

Pa jaho słovach, Kiernies pamior u noč na 17 śniežnia. U jaho spyniłasia serca.

Kiernies uznačalvaŭ druhi pa vieličyni horad Ukrainy 10 hadoŭ. Viadomy daloka za miežami svajoj krainy — pierš za ŭsio, dziakujučy źlitamu ŭ sietku ŭ 2013-m virusnamu videa (dzie jon, miakka kažučy, razvažaje z kiraŭnikom abłasnoj administracyi Michaiłam Dobkinym, jak pravilna vieści pieradvybarčuju kampaniju) — jon zastavaŭsia adnym z samych papularnych kiraŭnikoŭ horada krainy.

U kastryčniku 2020 hoda Kiernies vyjhraŭ vybary mera, fizična znachodziačysia ŭ niamieckaj balnicy na praciahu ŭsioj vybarčaj kampanii. Bijahrafija Kierniesa była niby vytkanaja z supiarečnaściaŭ i nieadnaznačnaściej, piša Bi-bi-si.

Mera ŭniviersiteckaha centra, «pieršaj stalicy» Ukrainy, časta paprakali kryminalnym minułym i manierami, jakija nahadvali pra «lichija 90-ja».

Jaho doŭha ličyli jarkim prarasijskim palitykam i padazravali ŭ arhanizacyi «citušak» padčas Jeŭramajdana, ale ŭ niejki momant jon pieratvaryŭsia ŭ haranta «ŭkrainskaści» Charkava i prychilnika prezidenta Piatra Parašenki.

Žurnalisty kazali ab nieefiektyŭnaści i karupcyjnym składniku jaho sici-mieniedžmientu, ale jon zastavaŭsia biassprečnym aŭtarytetam dla bolšaści charkaŭcaŭ, tak i nie zajmieŭ nivodnaha hodnaha supiernika.

***

Hienadź Kiernies naradziŭsia ŭ 1959 hodzie ŭ Charkavie. Paśla zakančeńnia škoły, pavodle aficyjnaj bijahrafii, «bolš za dziesiać hadoŭ pracavaŭ na dziaržaŭnych pradpryjemstvach horada». Kiernies pracavaŭ ślesaram, raźlivalščykam małaka i navat hadzińnikavym majstram, pisali miascovyja ŚMI.

Pry kancy isnavańnia Savieckaha Sajuza ŭ Kierniesa, pavodle źviestak ŚMI, źjavilisia prablemy z zakonam.

U roznych krynicach možna pračytać roznyja viersii taho, jak mienavita, budučy charkaŭskim meram, jon pierastupaŭ zakon: ci to zajmaŭsia śpiekulacyjaj, to «varyŭ džynsy» ŭ padpolnych «cechach», to zarablaŭ naparstkami, ci prosta byŭ machlarom, ci pierapradavaŭ kradzienaje. Tak ci inakš, u pačatku 90-ch Kiernies pravioŭ dva hady ŭ SIZA.

«Tady takim čynam farmavali ahulnaje mierkavańnie siarod papularnych ludziej u horadzie, a ja byŭ papularnym čałaviekam, voś i apynuŭsia ŭ miescach, nie hetak addalenych», — raspaviadaŭ ab hetaj staroncy svajoj bijahrafii Kiernies u intervju vydańniu «Hardon».

I dadavaŭ: paśla dvuch hadoŭ za kratami jon byŭ apraŭdany, heta značyć farmalna sudzimym nie ličyŭsia.

«Mianie pasadzili pry Savieckim Sajuzie, a vyjšaŭ ja ŭ inšaj krainie, u inšych realijach. Ja trapiŭ u turmu, kali taksi kaštavała 5 rubloŭ. Dadomu, kali vyjšaŭ praz dva hady, ja jechaŭ na taksi za 25 karbavancaŭ [ukrainskaja nazvu savieckaj valuty]», — apisvaŭ Kiernies mietamarfozy, jakija adbylisia z krainaj za čas jaho adsutnaści.

• 0
• 0
• 0
• 0
• 0
• 0
• 0
• 0