Adkryłasia «Biełaruskaja akademija». Heta, faktyčna, biełaruskamoŭny ŭniviersitet, tolki novaha typu
U Polščy pačała dziejnaść dystancyjna-stacyjanarnaja adukacyjnaja płatforma «Biełaruskaja akademija», jakaja ažyćciaŭlaje navučańnie na biełaruskaj movie z nastupnaj vydačaj dypłomaŭ ab vyšejšaj adukacyi jeŭrapiejskaha ŭzoru, piša Radyjo Svaboda.
Navučency buduć mieć pravy studentaŭ stacyjanaraŭ. Asablivaść idei ŭ tym, što nie stvarajecca novaja asobnaja navučalnaja ŭstanova, a navučańnie budzie ažyćciaŭlacca pa-biełarusku pry ŭžo isnujučych univiersitetach. Nabor pieršaj hrupy studentaŭ budzie adbyvacca da 10 lutaha. Pačatak zaniatkaŭ — z 15 sakavika.
Inicyjatarkaj stvareńnia «Biełaruskaj akademii» stała prafiesarka Śviatłana Kul-Sialvierstava, zvolnienaja ŭ 2014 hodzie z Hrodzienskaha dziaržaŭnaha ŭniviersiteta, jakaja ciapier pracuje ŭ Biełastockim techničnym univiersitecie «Politechnika Białostocka».
«My realizavali hetuju ideju ŭsiaho za try miesiacy. Biełarusy zmohuć navučacca, nie vyjazdžajučy ź Biełarusi na ŭvieś čas. Pry hetym studenty majuć status stacyjanarnaha navučańnia», — paviedamiła Śviatłana Kul-Sialvierstava.
U «Biełaruskaj akademii» buduć vykładać biełaruskija vykładčyki:
«Prafiesary, dacenty, pałova ź jakich — tyja, kaho z palityčnych matyvaŭ pazbavili pracy. Jość kalehi ź Biełarusi, ale pracujuć, naprykład, u ZŠA, Kitai, Šviecyi, Finlandyi, Litvie, Polščy, jak ja. Usiaho nas kala 70 vykładčykaŭ ź imionami, dośviedam i kvalifikacyjaj». U kamandzie — były dyrektar Instytuta sacyjałohii Hienadź Koršunaŭ, kandydatka psichałahičnych navuk Taćciana Sinica, prafiesar Maryna Mažejka, a fizkulturu budzie vieści znakamity fitnes-trenier Pavał Arakielan.
Pieršaj śpiecyjalnaściu, na jakuju adkryli nabor, stała administravańnie ŭ dziaržaŭnych orhanach i biznesie. Hetaja śpiecyjalnaść adkrytaja ŭ biełastockaj filii Wyższa Szkoła Kadr Menedżerskich (Vyšejšaja škoła menedžmentu).
«My nie stvarajem novuju navučalnuju ŭstanovu. My zaklučajem damovy ź jeŭrapiejskimi vyšejšymi navučalnymi ŭstanovami na adkryćcio śpiecyjalnaściej dla studentaŭ ź Biełarusi. My tam vykładajem pieravažna pa-biełarusku, ale jość i vykładańnie pa-rasiejsku, i adpaviedna bałonskamu pracesu. A vypuskniki buduć atrymlivać dypłom toj navučalnaj ustanovy, u jakoj adkryvajecca i viadziecca navučańnie pa peŭnaj śpiecyjalnaści», — patłumačyła inicyjatarka «Biełaruskaj akademii».
Śviatłana Kul-Sialvierstava taksama kaža, što navučacca ŭ «Biełaruskaj akademii» mohuć i tyja studenty, jakija ciapier atrymlivajuć adukacyju ŭ biełaruskich VNU:
«Takija studenty zmohuć adnačasova atrymać dźvie adukacyi — ź biełaruskim dypłomam u Biełarusi i ź jeŭrapiejskim dypłomam u nas. Navučańnie płatnaje, ale my vyznačyli pa minimumie. Hetyja hrošy iduć vyklučna na apłatu vykładčykaŭ, padatki i techničnaje zabieśpiačeńnie navučalnaha pracesu. U nas niama rektara, sakratarak i kabinietaŭ».
Śviatłana Kul-Sialvierstava kaža, što najbližejšym časam płanujecca adkryć nabor abituryjentaŭ jašče na adnu śpiecyjalnaść — menedžment u teleSMI i žurnalistycy.
«Jość damoŭlenaść pačać nabor u sakaviku. Hetaja śpiecyjalnaść budzie adkrytaja ŭ inšaj ustanovie — u Vyšejšaj škole finansaŭ u Biełastoku», — paviedamiła jana i dadała, što ŭ płanach taksama dziejnaść pa paśladypłomnaj adukacyi.
Pavodle jaje słoŭ, u «Biełaruskaj akademii» mohuć vučycca i tyja biełarusy, jakija vymušanyja byli ŭciačy va Ŭkrainu, Polšču ci Litvu ad represij u Biełarusi.
Ciapier čytajuć
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič77
Kamientary