Paśla źjaŭleńnia publikacyi na sajcie «Našaj Nivy» pad zahałoŭkam «Što adbyvajecca z «Bajpołam»? Čamu abjadnańnie pakinuŭ jaho zasnavalnik?» narešcie źjavilisia aficyjnyja kamientary.
Na vialiki žal, kali rychtavaŭsia papiaredni artykuł, to kamientary admovilisia davać jak pradstaŭniki «Bajpoła» i NAU, hetak i asabista Andrej Astapovič. Adnak paśla źjaŭleńnia publikacyi «NN» jany byli vymušanyja reahavać.
«Bajpoł» nazvaŭ infarmacyju «niedakładnaj», chacia tak i nie ŭdakładniŭ u čym mienavita. «NN» nie nazyvała padziei ŭ «Bajpole» raskołam, tolki kanstatavali, što abjadnańnie byłych siłavikoŭ pakinuŭ adzin z zasnavalnikaŭ i tvar kampanii Andrej Astapovič.
«Udzielniki BYPOL źviazany piśmovymi damoŭnymi abaviazańniami pra nierazhałošvańnie źviestak, što vyklučaje mahčymaść jakich-niebudź kamientaroŭ adnosna ŭnutranaj pracy inicyjatyvy», — havorycca ŭ zajavie.
«Hetymi ž damoŭnymi abaviazańniami siabram inicyjatyvy zabaroniena być udzielnikami jakich-niebudź prajektaŭ, jakija prama ci ŭskosna dublujuć dziejnaść BYPOL, u tym liku ŭ vypadku vychadu z šerahaŭ BYPOL», — niezrazumieła, ci tut užo idzie havorka pra Astapoviča albo nie.
Svaju zajavu adnosna apošniaj situacyi zrabiŭ były pres-sakratar «Bajpoła» Jaŭhien Miadźviedzieŭ.
«Ja ŭznačaliŭ adździeł PR u śniežni 2020 hoda. Za paŭtara miesiaca nam atrymałasia pieraŭtvaryć «Bajpoł» u paznavalny brend, pra jaki havorać u Biełarusi i Rasii, jaki šalmujuć u dziaržaŭnaj prapahandzie, jakoha bajacca biełaruskija ŭłady. Dva tydni tamu, skončyŭšy raskrutku «Bajpoł», ja zaniaŭsia inšym kirunkam: ekanamičnyja rasśledavańni. Ciapier maja kamanda rasśleduje fakty kantrabandy cyharet, vuhla, nafty i zbroi «kašalkami Łukašenki».
Nakolki mnie viadoma, kamanda «Bajpoł» praciahvaje pracu rasśledavańniaŭ u śfiery pravaachoŭnych orhanaŭ, Andrej Astapovič pa-raniejšamu na suviazi z byłymi kalehami. Adnak adnym «Bajpołam» paviestka pa siłavikach nie abmiažoŭvajecca: aproč ich, taksama pracuje niezaležnaja kamanda pa rasśledavańni ŭ ekanamičnaj śfiery, pa reformie OUS pry NAU, «Biełaruski narodny trybunał». U najbližejšy čas usie ŭkazanyja adznačacca hromkimi rasśledavańniami».
Jak bačym, Miadźviedzieŭ taksama piša pra Andreja Astapoviča i «byłych kaleh». Tamu infarmacyja pra dalejšy niaŭdzieł zasnavalnika arhanizacyi ŭ pracy «Bajpoła» paćviardžajecca.
Načalnik milicyi Brahina stralaŭ u svaju žonku. Jana cudam vyžyła9
Kamientary