«U chirurhičnym korpusie adklučyłasia padača kisłarodu. Stali pamirać ludzi». Doktar raskazaŭ pra trahiedyju ŭ Viciebsku

Minułaj vosieńniu BCHMD stała hałoŭnaj u Viciebsku pa pryjomie i raźmierkavańni pacyjentaŭ z karanavirusnaj infiekcyjaj. Pad kavid razharnuli try korpusy: terapieŭtyčny, chirurhičny, akušerski.

— I nahruzka na kisłarodnuju sistemu stała prosta varjackaj, — tłumačyć Uładzimir Martaŭ. — Pry hetym ź pieršaj chvali epidemii my vyjšli sa znošanym abstalavańniem.

Adbyŭsia techničny zboj: dzieści na ŭzroŭni kisłarodnaj stancyi parušyłasia padača kisłarodu. Vyśvietliłasia, što jaho pastupleńnie dla pacyjentaŭ na ŠVŁ u tym abjomie, jaki byŭ raniej, niemahčyma.

My hublali kisłarodnyja punkty — adzin za adnym, pałaty — adnu za adnoj. Kidalisia i sprabavali zrazumieć: čamu tam, dzie ŭ pieršuju chvalu epidemii narmalna padavaŭsia kisłarod, jon užo nie padajecca.

Bili tryvohu: źviartalisia i da svajho kiraŭnictva, i da «kisłarodčykaŭ» — rabotnikaŭ kisłarodnaj słužby. Pryjazdžali śpiecyjalisty ź Minska, dva razy mianiali sistemu padačy hazu. Heta była cełaja «vajskovaja apieracyja»: chvorych na ŠVŁ pieravodzili na inšyja aparaty. Nam było vielmi ciažka.

Ale hetyja miery ni da čaho nie pryviali.

Prablemu spuskali na tarmazach, jaje navat zabaraniałasia abmiarkoŭvać.

Katastrofa zdaryłasia 7 i 8 studzienia: u chirurhičnym korpusie try razy adklučałasia padača kisłarodu — na 15, 20 i 23 chviliny. Stali pamirać ludzi. Chtości pamior u tyja ž dni, chtości — na nastupny dzień, chtości — praz 3—5 dzion… Heta vielmi strašna, kali pamirajuć pacyjenty, jakich ty ciahnuŭ, ratavaŭ, jak moh. Kali tvar čałavieka čarnieje na vačach u miedykaŭ — a my ničoha, naohuł ničoha, ni-čo-ha nie možam zrabić!

Pavialičyć

— Nie adzin i nie dva čałavieki. Pramaŭčać pra heta nadzvyčajnaje zdareńnie ja, zrazumieła, nie moh — napisaŭ ministru achovy zdaroŭja Dźmitryju Pinieviču [kopija paviedamleńnia Martava jość u redakcyi. — Zaŭv. TUT.BY]. Jon dasłaŭ kamisiju ŭ našu balnicu. Sistemu padačy kisłarodu nichto nie daśledavaŭ, sa mnoj abmiarkoŭvali zusim inšyja pytańni. U vyniku ja ž atrymaŭ vymovu: za toje, što niapravilna laču karanavirusnych chvorych.

Paśla hetaha hałoŭny doktar pierastaŭ sa mnoj havaryć.

Raźbiracca ž treba nie sa zbojami ŭ kisłarodnaj sistemie, a z tym, chto vydaŭ prablemu. I stała zrazumieła, što maje dni ŭ jakaści zahadčyka adździaleńnia źličanyja.

Ale pieraboi z padačaj kisłarodu pieryjadyčna pa-raniejšamu adbyvajucca. Heta treba vyrašać! I jość prykład, kali čynoŭniki ad miedycyny nie chavali prablemu, a vyrašali jaje. U 2005 hodzie ŭ radzilni ŭ Homieli zahinuli dźvie žančyny: pry kiesaravym siačeńni im byŭ patrebny narkoz — a ŭ bałonie apynuŭsia nie kisłarod, a vuhlakisły haz. Paśla hetaj trahiedyi ŭ apieracyjnych źjaviŭsia darahi sučasny manitorynh — i takija śmierci zaraz prosta niemahčymyja.

* * *

Načalnik Hałoŭnaha ŭpraŭleńnia pa achovie zdaroŭja Viciebskaha abłvykankama Michaił Višniaviecki admoviŭsia patłumačyć TUT.BY situacyju z techničnymi zbojami z padačaj kisłarodu ŭ BCHMD, a taksama zvalnieńnie doktara Martava.

— Ja kamientavać ničoha nie budu, — paviedamiŭ čynoŭnik i pakłaŭ słuchaŭku.

Žurnalist TUT.BY taksama prychodziŭ u abłvykankam, kab sustrecca ź Michaiłam Višniavieckim u jahonym pracoŭnym kabiniecie ŭ nadziei ŭsio ž atrymać kamientar. Adnak kiraŭnik abłzdrava admoviŭsia ad sustrečy, spasłaŭšysia na toje, što chutka ŭ jaho «vialikaja narada».

TUT.BY nakiravaŭ zapyt u Ministerstva achovy zdaroŭja z prośbaj prakamientavać pryčyny i nastupstvy nadzvyčajnaha zdareńnia z kisłarodam u Viciebskaj BCHMD, a taksama pryčyny niepraciahvańnia kantrakta z doktaram Uładzimiram Martavym.

Taksama była sproba atrymać kamientar ministra Dźmitryja Pinieviča, ale jon nie adkazaŭ na zvanki.

Čytajcie taksama:

Zahadčyk reanimacyi viciebskaj balnicy raskazaŭ, jak i čamu situacyja z karanavirusam u horadzie vyjšła z-pad kantrolu

U Viciebsku zvalniajuć Uładzimira Martava — reanimatołaha, jaki pieršym u Biełarusi ščyra skazaŭ pra kavid

«Burycca sistema maralnych kaštoŭnaściaŭ». Viadomy chirurh Dźmitryj Charkoŭ zvalniajecca ŭ znak salidarnaści

• 0
• 0
• 0
• 0
• 0
• 0
• 0
• 0