Na samicie ADKB padpisana pahadnieńnie ab stvareńni Kalektyŭnych sił apieratyŭnaha reahavańnia

«Niahledziačy na adsutnaść biełaruskaj delehacyi na čale z Alaksandram Łukašenkam, na samicie ADKB 14 červienia ŭ Maskvie padpisana pahadnieńnie ab stvareńni Kalektyŭnych sił apieratyŭnaha reahavańnia.

«Padpisany dakumient, jaki ŭklučaje ŭ siabie pahadnieńnie ab Kalektyŭnych siłach, rašeńnie Savieta kalektyŭnaj biaśpieki ab składzie KSAR», — cytuje prezidenta Rasii Dźmitryja Miadźviedzieva RIA Novosti. Akramia taho, pavodle jaho słoŭ, padpisany dakumient ab chodzie vykanańnia rašeńnia Savieta kalektyŭnaj biaśpieki ADKB ad 4 lutaha 2009 hoda ab KSAR.

Pierad pačatkam samita biełaruski bok zajaviŭ, što nie davaŭ zhodu na pryniaćcie rašeńniaŭ na mierapryjemstvach ADKB.

Kamientujučy najaŭnuju situacyju, pres-sakratar MZS Biełarusi Andrej Papoŭ, u pryvatnaści, zajaviŭ: «Niemahčymaść pryniać rašeńnie biez kansiensusu ŭsich dziaržaŭ — udzielnic ADKB vidavočnaja. Biełaruś była vymušana nakiravać adpaviednuju notu ŭ Sakrataryjat ADKB tolki paśla taho, jak, niahledziačy na ŭsiu vidavočnaść hetaha, prahučaŭ šerah zajaŭ z boku aficyjnych pradstaŭnikoŭ adnoj ź dziaržaŭ — členaŭ arhanizacyi, sutnaść jakich u tym, što niaŭdzieł inšaj dziaržavy — člena ADKB u Saviecie kalektyŭnaj biaśpieki pavinna być praihnaravana i što, maŭlaŭ, dakumienty, vyniesienyja na razhlad maskoŭskaj siesii ADKB, mohuć być uchvaleny i biez udziełu hetaj dziaržavy (havorka, vidać, idzie pra ministra zamiežnych spraŭ RF Siarhieja Łaŭrova. — BiełaPAN.). Heta sproba ihnaravać nie tolki pryncypovuju pazicyju dziaržavy — člena ADKB, ale i ihnaravać asnovatvornaje praviła arhanizacyi — praviła kansiensusu pry pryniaćci rašeńniaŭ, jakoje harantuje na praktycy niaŭchilny ŭlik mierkavańniaŭ usich biez vyklučeńnia členaŭ arhanizacyi ŭ takoj važnaj spravie, jak biaśpieka».

Aficyjny pradstaŭnik biełaruskaha MZS jašče raz nahadaŭ, što pryčynaj niaŭdziełu krainy ŭ hetaj siesii ODKB «stała

kateharyčnaja niazhoda Biełarusi prymać rašeńni ADKB, skiravanyja na ŭmacavańnie vajenna-palityčnaj biaśpieki, va ŭmovach i da taho času, pakul adkryta padryvajecca ekanamičnaja biaśpieka adnaho z členaŭ arhanizacyi, u ciapierašnim vypadku — Respubliki Biełaruś». «Heta naša śviadomaja pazicyja», — zaznačyŭ Andrej Papoŭ.

Pavodle jaho słoŭ, nakiravańniem adpaviednaj noty ŭ Sakrataryjat ADKB ab adsutnaści kansiensusu pa dakumientach maskoŭskaj siesii biełaruski bok jašče raz pakazvaje, što «ihnaravać pazicyju dziaržavy — člena arhanizacyi nielha, a rašeńni nasupierak mierkavańnia luboj dziaržavy arhanizacyi — nielehitymnyja».

U toj ža čas prezident Rasii, vystupajučy na samicie, adznačyŭ, što Biełaruś moža dałučycca da padpisanych siońnia dakumientaŭ paźniej. «My razumiejem, što tyja dziaržavy, jakija pakul nie dałučylisia da adpaviednych rašeńniaŭ, — u ich adkrytaja dla hetaha pazicyja, jany zmohuć sfarmulavać hetuju pazicyju dla siabie i pry praviadzieńni nieabchodnych dziaržaŭnych pracedur dałučycca da hetych rašeńniaŭ. My budziem hetamu rady», — skazaŭ Dźmitryj Miadźviedzieŭ.

Prezident RF ličyć, što ŭ ciapierašniaj situacyi prezident Biełarusi pastupiŭ nie jak partnior, nie paviedamiŭšy asabista ab rašeńni nie ŭdzielničać u samicie ADKB u Maskvie ŭ suviazi z roznahałośsiami pa prablemie pastavak małočnaj pradukcyi.

«Alaksandr Ryhoravič Łukašenka nie telefanavaŭ mnie i nie kazaŭ mnie, što jon źbirajecca pryniać rašeńnie ab tym, kab nie pryjazdžać, choć supracoŭniki jaho administracyi telefanavali nam», — skazaŭ Miadviedzieŭ na pres-kanfierencyi paśla zaviaršeńnia samita ADKB.

Jon taksama zajaviŭ, što biełaruskija ŭłady pavinny vyrašać ekanamičnyja pytańni z Rasijaj šlacham dvuchbakovych kantaktaŭ, a nie palityzavać prablemy i nie raździmać «isteryku». «Ekanamičnyja pytańni pažadana vyrašać šlacham niepasrednych kantaktaŭ, a nie pierakidvajučy ciažar adkaznaści za dvuchbakovyja ekanamičnyja prablemy na šmatbakovy farmat, jaki zabiaśpiečvaje žyćcio i biaśpieku ŭ šerahu dziaržaŭ», — skazaŭ Miadźviedzieŭ.

Viartajučysia da temy KSAR, prezident RF adznačyŭ: «U kančatkovym vyniku, viadoma, heta rašeńnie našych partnioraŭ, my da jaho stavimsia spakojna, nie dramatyzujem ničoha, upeŭnieny, što biełaruski bok acenić usie pieravahi viartańnia da abmierkavańnia pytańnia ab členstvie i padpisańni dahavora ab Kalektyŭnych siłach apieratyŭnaha reahavańnia. <...> Spadziajusia, što hetaja miasa-małočnaja isteryka nie sapsuje pracy pa Kalektyŭnych siłach apieratyŭnaha reahavańnia», — zajaviŭ Dźmitryj Miadźviedzieŭ.

BiełaPAN

• 0
• 0
• 0
• 0
• 0
• 0
• 0
• 0