Kapitan zbornaj pa baskietbole: Ja nie chaču pradstaŭlać Biełaruś, kali moj narod pakutuje

Voś tekst jaje zajavy:

«U našaj krainie sport — heta prapahanda režymu. I ja nie maju namieru być jaje častkaj»

— Ja pryniała rašeńnie bolš nie vystupać za nacyjanalnuju kamandu i aficyjna abviaščaju pra zaviaršeńnie karjery ŭ zbornaj Biełarusi. Heta abdumanaje i adnaznačnaje rašeńnie. Ja nie chaču bolš pradstaŭlać Biełaruś na mižnarodnaj arenie ŭ toj čas, jak moj narod pakutuje, padviarhajecca katavańniam i represijam, kali ludziej biespakarana zabivajuć, kalečać i trymajuć u turmach. Kolki b čynoŭniki ni śćviardžali, što sport pa-za palitykaj, mienavita ŭ našaj krainie sport — heta prapahanda režymu, i ja nie maju namieru być jaje častkaj.

Jak spartsmienka ja liču, što mahu prynieści našmat bolš karyści hramadstvu svaimi asabistymi prajektami abo sumiesnymi inicyjatyvami z SOS.BY. Naprykład, miesiac tamu svabodnaje abjadnańnie spartsmienaŭ zapuściła «Akademiju čempijonaŭ», u ramkach jakoj my dzielimsia viedami i vopytam z padrastajučym pakaleńniem.

Ja chaču i dalej być karysnaj biełaruskamu hramadstvu, ale nie chaču vystupać za nacyjanalnuju kamandu. Pryčym nie chaču hetaha rabić i ŭ budučyni — u svabodnaj novaj Biełarusi, — padkreśliła Kaciaryna Snycina.

— 2020 hod źmianiŭ mianie, jak i mnohich biełarusaŭ, jak čałavieka i hramadzianina. Mnie stała važna, kab ludzi vakoł mianie, tyja, z kim ja pravodžu amal 24/7, padzialali maje kaštoŭnaści i žyćciovuju pazicyju. U lutym padčas hulniaŭ za nackamandu ŭ Ryzie ja zrazumieła, što takoj padtrymki ŭnutry zbornaj Biełarusi pa baskietbole ŭ mianie niama.

Pry hetym ja sumlenna vykonvała svaje abaviazki na placoŭcy ŭ kvalifikacyjnych matčach, razumiejučy, što asabista adkaznaja za vynik jak kapitan nacyjanalnaj kamandy. My damahlisia nieabchodnaha vyniku, prabilisia na čempijanat Jeŭropy. Dalej adkaznaść ź siabie ja zdymaju. Adznaču: mnie nie kryŭdna, što ja nie zmahu pryniać udzieł u čempijanacie Jeŭropy i pazmahacca za miedali, — skazała baskietbalistka.

— Ja prysłuchałasia da siabie i zrazumieła, što ŭ mianie niama i cieniu sumu z-za spynieńnia vystupaŭ za zbornuju Biełarusi. Zdajecca, što ja ŭžo šmat miesiacaŭ znachodžusia ŭ novaj zbornaj — SOS.BY, dzie sabrany nievierahodnyja, svabodnyja i sumlennyja spartsmieny. Ja biaźmierna hanarusia być častkaj mienavita hetaj kamandy.

***

Kantrakt Kaciaryny Snycinaj z RCAP pa hulniavych vidach sportu minaje 31 sakavika 2021 hoda. Kapitanu zbornaj Biełarusi prapanavali padpisać novuju pracoŭnuju damovu, ale jaje nie zadavoliŭ punkt dadatkovaha pahadnieńnia, jaki tyčycca vystupleńniaŭ spartsmienaŭ u ŚMI.

— U lutym mnie sapraŭdy dasłali na podpis novy kantrakt, jaki ja padpisała na kožnaj staroncy, zakreśliŭšy tolki «Punkt 2.25»: «Nie dapuskać publikacyj i vystupaŭ u ŚMI biez uzhadnieńnia z najmalnikam», — i zapytała pa im detalovaje tłumačeńnie.

15 sakavika mnie pryjšoŭ adkaz ź Ministerstva sportu, u jakim tłumačeńni byli prykładna takija: «Uzhadnieńnie publikacyi aznačaje papiaredniaje ŭzhadnieńnie publikacyi, stanovišča raspaŭsiudžvajecca na kamientary zamiežnym ŚMI, u tym liku na pres-kanfierencyjach, śledstvam nienaležnaha vykanańnia pracoŭnych abaviazkaŭ moža źjaŭlacca pryciahnieńnie da dyscyplinarnaj adkaznaści…»

Na nastupny dzień ja atrymała zahad ab zvalnieńni z nackamandy, datavany 11 sakavika. Uvohule, kantrakt sa mnoj nie praciahnuli, bo «baki zhody nie dasiahnuli».

***

Kaciaryna Snycina vystupała za zbornuju Biełarusi z 2005 hoda, vyjhraŭšy bronzavy miedal čempijanatu Jeŭropy (paźniej jana vystaviła jaje na dabračynny aŭkcyjon), brała ŭdzieł u Alimpijskich hulniach.

Vystupała za kłuby ź Biełarusi, Rasii, Francyi, Polščy, Vienhryi, Turcyi. Zaraz hulaje za kamandu «Niesibie Ajdyn».

Na kłubnym uzroŭni stanaviłasia finalistam, bronzavym pryzioram i paŭfinalistam Kubka Jeŭropy FIBA. čempijonam Biełarusi i Francyi, pryzioram čempijanataŭ Rasii, Biełarusi, Polščy, uładalnikam Kubka Polščy.

• 0
• 0
• 0
• 0
• 0
• 0
• 0
• 0