Žycharku Pastavaŭ asudzili na 2 hady kałonii za abrazu pradstaŭnika ŭłady i patrony ŭ šviejnaj mašyncy
Pastaŭski rajonny sud asudziŭ 49-hadovuju Irynu Palaninu na dva hady pazbaŭleńnia voli ŭ kałonii ahulnaha režymu. Termin pryznačany šlacham častkovaha składańnia pakarańniaŭ: pavodle art. 369 — da chimii na dva hady,pavodle art. 295 — na paŭtary hady pazbaŭleńnia voli ŭ kałonii, paviedamlaje spring96.org.
Prakuror patrabavaŭ dla Iryny try hady pazbaŭleńnia voli ŭ kałonii ahulnaha režymu.
Taksama sud abaviazaŭ Irynu Palaninu kampiensavać maralnuju škodu paciarpiełamu: 2000 rubloŭ, dziaržpošlinu 87 rubloŭ, praracesualnyja vydatki — 63,80.
Jaje pryznali vinavataj u tym, što u śniežni minułaha hoda žančyna raźmiaściła abraźlivy kamientar u sacsietkach pad fotazdymkam načalnika Pastaŭskaha RAUS Alaksandra Rybakova.
Taksama pa viersii śledstva, pastaŭčanka znajšła ŭ domie svajoj maci patrony ad małakalibiernaj vintoŭki i pryniesła ich dachaty: tam ich znajšli ŭ šviejnaj mašyncy pry ahladzie. Pa infarmacyi vałancioraŭ, heta byŭ mienavita ahlad, a nie vobšuk.
Iryna Palanina na sudzie skazała, što spačatku ździviłasia, što za začynienuju karobku znajšli milicyjanty, ale kali ŭbačyła patrony, uzhadała, što jany zastalisia ad baćki. «Ja nie ličyła ich nastolki niebiaśpiečnymi», — skazała Iryna.
Linhvistyčnaja ekśpiertyza pakazała, što tekst kamientara abraźlivy, a abjektam niehatyŭnaj acenki źjaŭlajecca Rybakoŭ.
Dziaržabvinavaŭca adznačyŭ: toje, što patrony zachoŭvalisia ŭ šviejnaj mašyncy amal paŭhoda, śviedčyć pra toje, što jany byli schavanyja i zmohuć spatrebicca.
U apošnim słovie Iryna Palanina vybačyłasia pierad načalnikam RAUS i paprasiła źviarnuć uvahu, što jana viedała, chto na fotazdymku, i heta było jaje asabistaje mierkavańnie, u jakim jana zaraz raskajvajecca. Taksama jana adznačyła, što namieraŭ vykarystoŭvać patrony ŭ jaje nie było.
«U toj momant ja adna dahladała dvaich ciažka chvorych invalidaŭ, jakija ledź nie ździekvalisia ź mianie. U chacie byŭ ramont, i byli momanty, kali navat nie pamiatała, jak samu siabie zvać, — nie toje što, dzie i jakija patrony lažać u chacie. Heta mianie nie apraŭdvaje, ja ździejśniła złačynstva i raskajvajusia. Prašu nie pazbaŭlać mianie voli, bo na maich rukach — maja maci. Bajusia, što mahu nie akazacca pobač i stracić jaje», — skazała Iryna Palanina.
Kamientary