Jeŭrasajuz vychodzić z łakdaŭnu. Jakija abmiežavańni ŭžo źniali?

Sacyjalnaje i kulturnaje žyćcio Hiermanii staić na «avaryjnym tormazie» — u krainie dziejničajuć adzinyja abmiežavalnyja miery baraćby z karanavirusam, pryniatyja ŭ kancy krasavika. Ale z 9 maja abmiežavańni nie buduć tyčycca ludziej, jakija prajšli poŭnuju vakcynacyju abo jakija pieranieśli karanavirus.

Jak minimum adnu pryščepku ŭ FRH atrymali bolš za 30 adsotkaŭ nasielnictva. Dla tych, chto całkam pryščapiŭsia abo pierachvareŭ, buduć źniatyja abmiežavańni na sacyjalnyja kantakty, admieniena dziejańnie kamiendanckaj hadziny i adpadzie nieabchodnaść u ekspres-testach, abaviazkovych dla naviedvańnia niecharčovych kram, cyrulniaŭ abo muziejaŭ. Ale ab źniaćci łakdaŭnu, chaj i pastupovym, havorka pakul nie idzie. U inšych jeŭrapiejskich krainach viartańnie da narmalnaha žyćcia adbyvajecca chutčej.

U Hrecyi adkrylisia restarany i čakajuć turystaŭ

I žychary Hrecyi, i turysty ź nieciarpieńniem čakali hetaj padziei: z 3 maja ŭ krainie znoŭ — paśla paŭhadavoha karancinu — adčynilisia bary i restarany, choć pracavać jany buduć z abmiežavańniami. Absłuhoŭvać klijentaŭ možna tolki na vulicy, a piersanału pryjdziecca dvojčy na tydzień zdavać testy na karanavirus i nasić maski. Stały pavinny stajać na istotnaj adlehłaści, siadzieć za adnym stałom mohuć nie bolš za šeść čałaviek.

Kab naviedniki asabliva nie rassłablalisia, žyvyja vystupy muzykaŭ u restaranach pakul nie dazvalajucca. Pracavać bary i restarany zmohuć da 23.00, paśla hetaha ŭstupaje ŭ siłu kamiendanckaja hadzina, pačatak jakoha pieranieśli z 21.00. Ab poŭnaj admienie havorka jašče nie idzie.

Z 10 maja ŭ Hrecyi adčyniacca škoły, a z 15 maja turysty, jakija zrabili abiedźvie pryščepki abo jakija majuć pry sabie niehatyŭny test na COVID-19, zmohuć znoŭ zajazdžać u krainu bieź nieabchodnaści prajści karancin.

Kulturnyja i zabaŭlalnyja ŭstanovy, takija jak teatry, kancertnyja i kinazały i načnyja kłuby, zastajucca začynienymi. Pakazčyk zachvorvańnia ŭ Hrecyi składaje kala 150 vypadkaŭ na 100 tysiač žycharoŭ — prykładna stolki ž, kolki ŭ Hiermanii. Kala vaśmi adsotkaŭ nasielnictva byli vakcynavanyja choć by adzin raz.

Francyja asłablaje karancin

Z 3 maja pačała asłablać karancin - adzin z samych žorstkich u Jeŭropie - Francyja. Upieršyniu za doŭhija tydni źniatyja abmiežavańni na pieramiaščeńnie: da hetaha žychary krainy pavinny byli zastavacca ŭ radyusie 10 kiłamietraŭ ad svaich damoŭ, kali havorka nie išła ab nieabchodnych pajezdkach.

U najbližejšyja dni viernucca ŭ škoły vučni siarednich kłasaŭ — zaniatki ŭ pačatkovych užo adnoŭlenyja, adčynienyja i dziciačyja sady. A z 19 maja znoŭ pačnuć pracavać terasy ŭ kaviarniach, barach i restaranach, pačatak kamiendanckaj hadziny budzie adsunuty z 19.00 na 21.00.

Bolšaść francuzaŭ rady pastupovamu viartańniu da zvykłaha ŭkładu, choć niekatoryja ličać, što łakdaŭn pasłablajuć zanadta chutka: pakazčyki zachvorvańnia jašče dosyć vysokija - kala 300 vypadkaŭ na 100 tysiač nasielnictva. Ułady spadziajucca, što tempy vakcynacyi dapamohuć źnizić ŭzrovień pašyreńnia infiekcyi. Na siońnia, pavodle źviestak Univiersiteta Džonsa Chopkinsa, 10 adsotkaŭ žycharoŭ krainy atrymali jak minimum adnu pryščepku.

Italija adkryvaje muziei i teatry

Pastupova źmiakčaje ŭmovy karancinu i Italija. U rehijonach, paciarpiełych ad pandemii nie tak mocna, znoŭ pracujuć adkrytyja terasy ŭ restaranach i barach, praŭda, tolki da 22.00 — paśla hetaha ŭstupaje ŭ dziejańnie kamiendanckaja hadzina. Adzin za adnym adčyniajucca muziei i kinateatry. Z 3 maja adnavili pracu muziei Vatykana — uvachod u ich, viadoma, dazvoleny tolki ŭ mascy.

Pakazčyk pryrostu zachvorvańnia ŭ Italii składaje 135 vypadkaŭ na 100 tysiač nasielnictva. Na praciahu bližejšych tydniaŭ u krainie zapłanavanyja dalejšyja pasłableńni. Z červienia restaranam znoŭ dazvolać pracavać u poŭnym abjomie.

Z pačatku leta kraina płanuje adčynić miežy i dla turystaŭ, choć pakul što nie zusim jasna, jakija buduć praviły ŭjezdu, — u tym liku, dla ludziej, jakija zrabili pryščepki. Da siaredziny maja razam ź nieabchodnaściu PCR- abo antyhien- testu pierad adlotam i paśla prylotu dla ŭsich haściej Italii zachoŭvajecca patrabavańnie piacidzionnaha karancinu. Paśla 15 maja ŭ krainie budzie ŭviedzieny tak zvany Nacyjanalny Zialony pryščepačny pašpart, jaki paśla budzie zamienieny zialonaj jeŭrapiejskaj kartaj, jakaja śviedčyć pra najaŭnaść imunitetu da kavidu.

U Italii vakcynavana bolš za 25 adsotkaŭ nasielnictva.

Niderłandy admianili kamiendanckuju hadzinu

U Niderłandach znoŭ adčynilisia bary i restarany, ale tolki ŭ dzionny čas — ad 12.00 da 18.00. Kamiendanckuju hadzinu ŭ krainie admianili, i pajści ŭ niecharčovuju kramu znoŭ možna biez papiaredniaha zapisu. Paklikać u hości ciapier dazvolena nie adnaho, a dvuch čałaviek. Muziei, kinateatry i teatry pa-raniejšamu začynienyja. Univiersitety i škoły praciahvajuć pracu ŭ režymie anłajn — za vyklučeńniem adnaho dnia ŭ tydzień, kali studenty i školniki mohuć chadzić na zaniatki.

Uzrovień zachvorvańniaŭ u Niderłandach zastajecca vysokim: 300 vypadkaŭ na 100 tysiač nasielnictva. Jak minimum adnu pryščepku zrabili kala 30 pracentaŭ žycharoŭ.

Danija dazvalaje publičnyja mierapryjemstvy na śviežym pavietry

Paśla niekalkich miesiacaŭ karancinu asłablaje abmiežavańni Danija. Kab kraina chutčej mahła viarnucca da zvykłaha rytmu žyćcia biez pahrozy novych uspyšak zachvorvańniaŭ, ułady ŭviali «karanavirusnyja pašparty». Atrymać ich mohuć tyja, chto ŭžo pierachvareŭ abo vakcynavaŭsia, a taksama ludzi z admoŭnym testam na karanavirus (sapraŭdnym na praciahu 72 hadzin). Ułaśniki «karanavirusnych pašpartoŭ» mohuć naviedvać restarany i kaviarni, muziei, kinateatry, cyrulni i astatnija miescy śfiery pasłuh. Dakumient možna pradjavić jak na papiery, tak i ŭ elektronnym vyhladzie — praź śpiecyjalny dadatak.

Z 21 maja ŭ Danii dazvolać pravodzić publičnyja mierapryjemstvy na śviežym pavietry z udziełam da 2000 čałaviek. Kolkaść dazvolenych udzielnikaŭ chatnich sustreč u zakrytym pamiaškańni pavialičycca da 50, a pad adkrytym niebam — da 100. Zaniatki va ŭniviersitetach adnoviacca na 50 adsotkaŭ. Na čatyry matčy, jakija buduć prachodzić u Kapienhahienie ŭ ramkach čempijanatu Jeŭropy pa futbole, płanujecca dapuścić pa 16 tysiač zaŭziataraŭ.

Abmiežavańni zastanucca ŭ sile da taho času, pakul nie buduć vakcynavanyja ŭsie žychary Danii. Kraina płanuje zaviaršyć kampaniju vakcynacyi da kanca lipienia. Ciapier pakaźnik pryrostu zachvorvańnia ŭ Danii składaje mienš za 100 vypadkaŭ na 100 tysiač nasielnictva.

U Čechii pačali pracavać kramy i rynki

Patrochu viartajecca da narmalnaha žyćcia Čechija. Z 3 maja tam adnaviŭsia razdrobny handal i znoŭ pačali pracavać rynki.

Kraina mocna paciarpieła ad pandemii: jašče niekalki miesiacaŭ tamu pakaźniki śmiarotnaści ad kavidu ŭ Čechii byli siarod samych vysokich u Jeŭropie. Ale ŭ apošnija tydni situacyja istotna palepšyłasia: uzrovień zachvorvańnia nie pieravyšaje 150 vypadkaŭ na 100 tysiač, i Čechija bolš nie ličycca krainaj padvyšanaj ryzyki. Minimum adnu pryščepku atrymali bolš za 18 pracentaŭ žycharoŭ.

• 0
• 0
• 0
• 0
• 0
• 0
• 0
• 0