Umiełaje bałansavańnie miž centrami siły: Manholija ŭžo zakupiła dastatkovuju kolkaść vakcyny

Manholija, nasielnictva jakoj składaje krychu bolš za 3,2 miljona, znachodzicca pamiž dvuma bujnymi vytvorcami vakcyn z hłabalnymi ambicyjami. Heta maje svaje pieravahi, bo pakul bolšaść krain u stadyi raźvićcia zmahajucca z surjoznym niedachopam vakcyn, Manholija maje dastatkova srodkaŭ, kab pryščapić usio darosłaje nasielnictva, dziakujučy ŭhodam jak z Kitajem, tak i z Rasijaj. Tamu čynoŭniki ŭžo abiacajuć hramadzianam leta biez kavidu, piša The New York Times.

Manholija ŭdała vykarystała svoj hieapalityčny status i atrymała dozy z toj ža chutkaściu, jak heta atrymałasia ŭ raźvitych krainach.

Heta taksama pieramoha dla Kitaja i Rasii, jakija zacikaŭlenyja ŭ resursach Manholii i imknucca adyhrać svaju rolu ŭ spynieńni pandemii.

Spačatku Manholija adstavała ad hłabalnaha zakliku da vakcynacyi, bo amal hod čynoŭniki chvalilisia, što vypadkaŭ zaražeńnia ŭ krainie niama. Adnak uspyška kavidu była zafiksavanaja ŭ Manholii ŭ listapadzie. Praz dva miesiacy heta vyklikała palityčny kryzis, bo ŭrad nie davaŭ rady epidemii. U vyniku premjer-ministr padaŭ u adstaŭku.

Novy premjer-ministr paabiacaŭ adnavić ekanomiku krainy, jakaja paciarpieła ad łakdaŭnu i zakrytych miežaŭ, ale hetyja płany ŭskładnilisia rostam zaražeńniaŭ.

Tady Manholija źviarnułasia da Rasii i Kitaja. U toj ža čas čynoŭniki sprabavali zakupić vakcyny na Zachadzie, ale za adnu pryščepku Pfizer pasiaredniki prapanoŭvali canu 120 dalaraŭ, što składaje čaćviortuju častku štomiesiačnaha siaredniaha zarobku ŭ krainie.

U vyniku ŭ lutym Manholija ŭchvaliła rasijskuju vakcynu Sputnik V, a praź niekalki dzion i kitajskuju Vero Cell. Chutka paśla hetaha Kitaj achviaravaŭ Manholii 300 tysiač doz svajoj vakcyny ŭ znak «daŭniaha siabroŭstva».

Pieramovy z Kitajem nakont vakcynacyi taksama ŭklučajuć u siabie pytańnie adkryćcia miežaŭ, bo Manholija maje patrebu ŭ tym, kab Kitaj nabyvaŭ jaje vuhal. Ekspart vuhalu ŭ Kitaj — adna z hałoŭnych krynic dachodu Manholii.

Taksama Manholii ŭdałosia damovicca z Rasijaj nakont pastavak Sputnik V, ale pakul praz zatrymku vytvorčaści ŭ Manholiju było dastaŭlena tolki 60 tysiač doz. Tamu bolšaść pryščepak budzie zroblena kitajskaj vakcynaj.

Va Ułan-Batory, stalicy Manholii, 97% darosłaha nasielnictva ŭžo atrymali pieršuju dozu. Va ŭsioj krainie bolš za try čverci manhołaŭ taksama atrymali pieršuju dozu. Kab matyvavać nasielnictva pryščaplacca kitajskaj vakcynaj, manholski ŭrad vypłačvaje 18 dalaraŭ paśla druhoj pryščepki.

Adnak mnohija hramadzianie aścierahajucca, što vakcynacyja ŭzmacnić upłyŭ Kitaja ŭ krainie, jakaja i tak ad jaho mocna zaležyć ekanamična.

• 0
• 0
• 0
• 0
• 0
• 0
• 0
• 0