Ministerstva ŭnutranych spraŭ Litvy śćviardžaje, što ŭ aŭtorak mieła miesca pravakacyja z boku Biełarusi, kali miažu niezakonna pierajšli i trapili na terytoryju Litvy 12 biełaruskich pamiežnikaŭ, piša Delfi.lt.
U adkaz MUS zajaviła, što pavialičvaje svaju prysutnaść na miažy.
«Da takich nachabnych pravakacyj, kali 12 biełaruskich pamiežnikaŭ siońnia pierasiekli miažu Litoŭskaj Respubliki, my nie možam stavicca pamiarkoŭna. Nieadkładna my adreahavali na hetuju pravakacyju i pryniali rašeńnie dadatkova ŭzmacnić achovu miažy», — zajaviła ministr unutranych spraŭ Ahnie Biłatajcie.
Pavodle źviestak MUS, u Šalčyninkajskim rajonie pradstaŭniki siłavych struktur Biełarusi sa ščytami i ŭ ekipiroŭcy dla padaŭleńnia biesparadkaŭ siłkom vycisnuli 35 mihrantaŭ i sami zajšli na terytoryju Litvy.
Videazapisam hetaha incydentu ŭ aŭtorak uviečary ŭ fejsbuku padzialiłasia Słužba achovy dziaržaŭnaj miažy. Pavodle źviestak słužby, biełarusy sami apublikavali, jak hrupa mihrantaŭ sprabuje trapić u Litvu, adnak zmaŭčali, što mihrantaŭ u Litvu ciaśnili biełaruskija siłaviki.
«Mienavita biełaruskija siłaviki ŭ ekipiroŭcy dla padaŭleńnia biesparadkaŭ vyciaśniajuć mihrantaŭ ź Biełarusi na terytoryju Litvy, a zatym i sami niezakonna pierasiakajuć litoŭskuju dziaržaŭnuju miažu», — śćviardžaje Słužba achovy kraju. «Paśla paŭtornych papiaredžańniaŭ supracoŭnikaŭ SADM parušalniki syšli ŭ bok Biełarusi», — adznačyła słužba.
Kamientary