Dziaržprapahanda abvinavačvaje demsiły ŭ raźjadnanaści. A jak na samaj spravie?
Nie raz i nie dva ŭ bok biełaruskaj apazicyi hučała krytyka pra raźjadnańnie, pra najaŭnaść mnostva asobnych inicyjatyŭ. Maŭlaŭ, nie čas dla ambicyj asobnych palitykaŭ: treba abjadnacca i vystupić z adzinaj pazicyjaj. Aktyŭna krytykuje raźjadnanaść demakratyčnych siłaŭ i biełaruskaja prapahanda. I voś niadaŭna Pavieł Łatuška źviarnuŭsia da ofisa Śviatłany Cichanoŭskaj, členaŭ Kaardynacyjnaj rady i ahułam da ŭsich pradstaŭnikoŭ demsił z zaklikam abjadnacca i vypracavać adnu stratehiju pa vyrašeńni biełaruskaha kryzisu. Što atrymlivajecca z hetaj prapanovy?
Havorka idzie, pierš-napierš, pra vyzvaleńnie ŭsich palitźniavolenych i spynieńnie represij, pryciahnieńnie da adkaznaści asob, vinavatych u złačynstvach suprać narodu i praviadzieńnie novych demakratyčnych vybaraŭ.
Paśla hetaha jak NAU, tak i ofis Śviatłany Cichanoŭskaj dy inšyja pradstaŭniki demakratyčnaj supolnaści praviali šerah sumiesnych sustreč. My raspytali, što na ich vyrašałasia i nakolki abvinavačvańni ŭ raźjadnanaści demsił majuć padstavy.
«U Cichanoŭskaj niama ambicyj, tamu ŭ nas i atrymlivajecca zachoŭvać adzinstva»
Jak raspavioŭ «Našaj Nivie» daradca Śviatłany Cichanoŭskaj Franak Viačorka, u chodzie apošnich sustreč z NAU i inšymi demsiłami jany zrazumieli prosta dadatkova sinchranizavali svaje dziejańni.
«Pa fakcie my pracujem adnym frontam i adzinaja demakratyčnaja płatforma ŭžo isnuje. Tudy ŭvachodziać Ofis i Kabiniet Cichanoŭskaj, NAU Paŭła Łatuški, kamanda Babaryki, Kaardynacyjnaja rada. Kantaktaŭ z Valeryjem Capkałam stała, praŭda, mienš.
My sazvońvajemsia z partniorami, Śviatłana Cichanoŭskaja pravodzić sustrečy Kaardynacyjnaj rady. Niadaŭna my zapuścili Płatformu salidarnaści — tam usie našyja asnoŭnyja partniory, ź jakimi my zaŭždy ŭ kantakcie. Ci treba stvarać dadatkovuju strukturu?
Davajcie ščyra: ci patrebnyja novyja struktury dziela struktur? Kali b my zahnali ŭsich u adzin umoŭny ofis, heta b spravie nie dapamahło. Na moj pohlad, treba ŭzmacniać toje, što jość. Tuju ž Kaardynacyjnuju radu, bo jana i zadumvałasia jak miesca, dzie pradstaŭniki ŭsich palityčnych sił mohuć sabracca razam».
Franak nie admaŭlaje, što taksama čuŭ abvinavačvańni ŭ razroźnienaści demsił, u tym, što kožny ciahnie koŭdru na siabie, ale zvyčajna jany ničym nie padmacavanyja.
«Viadoma, amal va ŭsich jość ambicyi. U kaho ich niama, dyk heta ŭ Śviatłany Cichanoŭskaj. Tamu ŭ nas i atrymlivajecca zachoŭvać adzinstva. Cichanoŭskuju nie ŭsprymajuć jak kankurenta na vybarach.
My jašče ŭ sakaviku źbiralisia z Paŭłam Łatuškam, Valeryjem Capkałam, aktyvistami Babaryki i damovilisia pracavać razam, nie napadać adno na adnaho. Heta tolki na ruku režymu. My možam być levymi i pravymi, rasiejskamoŭnymi i śviadomymi, pacyfistami i radykałami, ale zaraz nie čas dzialicca. Voś budzie parłamient, tam usie i buduć spaborničać», — kamientuje Viačorka.
Što ž tady źmienicca? Kaardynatarka NAU Alena Žyvahłod kaža, što z novaha — rehłamient uzajemadziejańnia.
«Usie struktury zaŭsiody pracavali ŭ ramkach adnoj stratehii, u nas ahulnaja sistema metaŭ i zadač. Tak było, jość i budzie. Ale ciapier krytyčna važnyja sinchranizacyja i kaardynacyja i ŭ apieracyjnaj dziejnaści. Niedastatkova ŭžo ŭzhadnić stratehiju na papiery i pravodzić raz na kvartał-miesiac-tydzień sustrečy i sazvony dla źvierki pazicyj. Važnaja realnaja supraca ŭ momancie: kali razam i vypracoŭvajucca rašeńni, i budujucca taktyčnyja płany, i jość prazrystaść vykanańnia hetych płanaŭ.
Ciapier my vypracoŭvajem hetyja miechanizmy. Havorka idzie pra źmieny ŭ padychodzie da ŭzajemadziejańnia, jon stanie bolš ščylnym (nie tolki na stratehičnym uzroŭni, ale i na taktyčnym). Nam prosta treba skarektavać uzajemadziejańnie dziejsnych palityčnych struktur i subjektaŭ, kab bolš efiektyŭna i paśpiachova zapuskać novyja kampanii».
U pieršuju čarhu novy rehłamient dapamoža pravilna raździalać abaviazki, kažuć u NAU. Tak, naprykład, Pavieł Łatuška ŭziaŭ na siabie pracu pa ekanamičnym cisku — tydzień tamu NAU zładzili mižnarodnuju pravavuju kanfierencyju ŭ Niurnbierhu, astatnija demsiły aktyŭna padtrymali inicyjatyvu.
«Dva tydni tamu Ofis arhanizavaŭ kanfierencyju biełaruskich dyjaspar, na jakoj my sabrali 40 arhanizacyj z 27 krain śvietu. Byŭ tam i Pavieł Łatuška, i KS, i palityčnyja partyi. Ciapier my razam rychtujemsia da Kanhresu biełarusaŭ, jaki projdzie naprykancy miesiaca. Na im biełarusy, što ciapier unutry krainy, zmohuć pieramovicca ź biełarusami ŭ vyhnańni».
«Spynić teror, vyzvalić zakładnikaŭ, viarnuć u krainu vybary — pad hetymi zadačami padpišucca ŭsie demsiły»
Adna sa strašyłak, na jakoj u tym liku hrajuć u dziaržprapahandzie, pra toje, što siońniašnija pradstaŭniki demsił mohuć stać jašče adnym kiraŭnictvam u vyhnańni, jašče adnoj «radaj BNR». Franak Viačorka asprečvaje i hety momant.
«Rada BNR zabiaśpiečvaje pierajemnaść, i kali Biełaruś budzie svabodnaj, pieradaść mandat demakratyčna abranamu kiraŭnictvu. U nas ciapier inšyja zadačy i jany nie mianiajucca: spynić teror, vyzvalić zakładnikaŭ, viarnuć u krainu vybary. I ŭsio, što my robim razam, pavinna vieści tudy (usie demakratyčnyja siły padpišucca pad hetymi punktami).
Akramia taho, naš pryjarytet — mienavita praca ź ludźmi ŭnutry Biełarusi, choć heta i niaprosta. Ale my stelefanoŭvajemsia ź miascovymi aktyvistami niekalki razoŭ na tydzień. Pra toje, što my robim unutry krainy, nie zaŭsiody možna kazać adkryta. Tamu moža skłaścisia adčuvańnie, što my pracujem tolki na «mižnarodku», ale heta nie tak».
Babaryka, Łatuška, Dźmitryjeŭ i Vaskrasienski źbiralisia stvaryć partyi. Što ź imi ciapier?
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary