Ci pasvarylisia Łukašenka i Pucin?

Ci sapraŭdnyja danyja VCIOM?

Ja nie baču ničoha dziŭnaha ŭ tym, što niejkija kalaŭładnyja sacyjałahičnyja słužby RF vyvučajuć hramadskija nastroi ŭ Biełarusi.

Tyja danyja VCIOM, jakija byli abnarodavanyja, zusim kiepskija, zdajecca, jany navat horšyja, čym vyniki zachodnich apytańniaŭ — Zois i Chatham House.

Moža, i sapraŭdy ŭsio nastolki kiepska ŭ biełaruskaj ułady.

Charaktar abnarodavanych danych VCIOM nie dazvalaje zrabić vysnovu nakont ich sapraŭdnaści.

Mianie asabliva ničoha nie ździviła ŭ hetych danych.

Rasijskija kalaŭładnyja koły nikoli nie brali na siabie abaviazak lubić Łukašenku.

Jany mohuć navat sublimavać svaju nieluboŭ da rasijskaj ułady na Alaksandra Ryhoraviča, bo heta biaśpiečna.

A čamu va VCIOM pavinny byli haroj ustavać za Łukašenku? Jany kali ad niečaj łaski i zaležać, dyk ad łaski Kramla, a nie ad łaski Łukašenki.

Čytajcie taksama: Jakija nastupstvy budzie mieć apytańnie, jakoje pakazała, što rejtynh Łukašenki mienšy, čym u Cichanoŭskaj, Babaryki i Kaleśnikavaj?

Niama nijakaha sakretu ŭ tym, što mnohija ŭ rasijskim kiraŭnictvie nie lubiać Łukašenku.

My heta bačyli i ŭ apošnija hady, i na praciahu dziesiacihodździaŭ.

I toje, što ludzi ŭ rasijskim kiraŭnictvie, jakija nie lubiać Łukašenku, sprabujuć padstavić jamu padnožku — što ŭ hetym dziŭnaha? I «Chrosnych baciek» niechta rabiŭ, i kanflikty z ambasadaram Babičam byli.

Ja nie dumaju, što nakont hetaha vycieku spytalisia asabista ŭ Pucina.

 Niama padstavaŭ biełaruskaj apazicyi rabić z hetaha vycieku vysnovu — Maskva za nami.

Maskva šmathałovaja. Chtości za vami, a chtości nie za vami.

U što ja nie vieru — što heta častka novaj vialikaj stratehii, što ŭ Kramli sabrałasia narada z prezidentam, raspracavali stratehiju, pieršym krokam jakoj źjaŭlajecca publikacyja hetych danych VCIOM.

 Ci moža heta być namiokam ad Kramla?

 Ja nie vyklučaju, što hety vyciek — adkaz na ŭłasny vypad Łukašenki na adras Pucina, kali jon skazaŭ zavualavanuju hadaść pra Pucina.

Łukašenka skazaŭ na niadaŭniaj naradzie, što jon paŭsiul puskaje ludziej biez masak i PŁR-testaŭ.

Da taho jak pa biełaruskim telebačańni prahučali zajavy pra «bunkier» i «botaks», byŭ vystup Łukašenki na ŭradavaj naradzie, dzie jon pachvaliŭ niejkaha ministra za toje, što toj biez maski.

Łukašenka tady skazaŭ, što jość prezidenty, da jakich dva tydni nie trapiš praz karancin.

Čytajcie taksama: «Biełaruskaja prapahanda bje niaŭład». Raspytali rasijskaha palitołaha, ci varta čakać reakcyj na kpiny ŭ adras Pucina ź dziaržTB

Niešta padobnaje hučała ŭ 2020 hodzie, napiaredadni 9 traŭnia, maŭlaŭ, u rasijskim kiraŭnictvie bajaźliŭcy, a my parad praviadziem, nam pamiać prodkaŭ daražejšaja.

Biełaruskija prapahandysty na toje i biełaruskija, što pracujuć na Łukašenku. I pačuŭšy taki sihnał ad hałoŭnaha, čamu b na hetym nie zhulać?

Biełaruskija prapahandysty pa-raniejšamu značna bolš aryjentavanyja na toje, što choča pačuć Łukašenka, čym na toje, što choča pačuć Kreml.

 Pra «Kamsamolskuju praŭdu»

Što tyčycca aryštu žurnalista «Kamsamolskaj praŭdy», dyk tut padychod Kramla taki — kali heta nie zakranaje rasijskija intaresy, dyk chaj sadžaje kaho choča.

 Pra intehracyju

Z usich apošnich infarmacyjnych nahodaŭ samaja važnaja — heta paviedamleńnie, što sajuznyja prahramy mohuć nie być padpisanyja na pasiadžeńni Vyšejšaha savietu «sajuznaj dziaržavy» 4 listapada.

Z taho, što było apublikavana pra hetyja sajuznyja prahramy, vynikaje, što ničoha revalucyjnaha, kardynalna novaha ŭ ich niama.

I navat u takim vyhladzie hetaja intehracyja prabuksoŭvaje.

Užo bolš jak hod u Minsku źnikła mahčymaść jakoha b tam ni było hieapalityčnaha manieŭru, suviazi z Zachadam, zdavałasia b, parvanyja całkam, zaležnaść ad Rasii poŭnaja.

Ale, niahledziačy na heta, Rasija nie moža pracisnuć navat u takim miakkim, redukavanym vyhladzie hetyja intehracyjnyja «mapy».

Pra zaležnaść ad Rasii i Zachadu

 My raniej pieraaceńvali značeńnie zachodniaha faktaru dla supraciŭleńnia biełaruskaha režymu ŭsioj hetaj intehracyi.

Zdavałasia, što Minsk moža supraciŭlacca intehracyi tolki tamu, što jon maje mahčymaść zblizicca z Zachadam.

Nijakaha manieŭru na Zachad u biełaruskich uładaŭ niama, ale jany davoli paśpiachova praciahvajuć adbrykvacca ad luboha, navat simvaličnaha pahłybleńnia intehracyi.

Biełaruskaja sistema zbudavanaja tak, što niezrazumieła, jak jana budzie pracavać, kali prybrać Łukašenku.

Dla Kramla ryzyki zachavańnia, kansiervacyi situacyi ŭ Biełarusi nižejšyja, čym ryzyki jaje źmieny.

Lepš zachavać usio jak jość.

 Pra tranzit ułady

Kanstytucyjnuju reformu niemahčyma admatać nazad. Budzie refierendum, parłamienckija vybary, zarehistrujucca niejkija partyi. Kaniec daloka, ale bačny. I źmiena pieršaj asoby ŭ Biełarusi niepaźbiežnaja na haryzoncie piaci hod.

«Pakul aścierahajusia jechać u Rasiju» — Cichanoŭskaja dała intervju radyjostancyi «Echo Moskvy»

«Łukašenka — krasaŭčyk». Chto tyja ekśpierty, kaho vykarystoŭvaje dziaržprapahanda

• 0
• 0
• 0
• 0
• 0
• 0
• 0
• 0