«Ja dobraachvotna pradjaviŭ usie hrošy». Za ŭvachod na 30 sm u zialony kalidor aeraporta ŭ piensijaniera kanfiskavali $61 tysiaču
Tolki za toje, što 65-hadovy minčuk stupiŭ za liniju zialonaha kalidora, u jaho kanfiskavali na karyść dziaržavy 61 tysiaču dalaraŭ. Na sudzie było paćvierdžana, što jon nie mieŭ nijakaha namieru niezaŭvažna praśliznuć praź jaho.
Heta zdareńnie adbyłosia 11 lipienia. Piensijaniery Račkoŭskija źbiralisia lacieć u Turcyju. Viasnoj u ich pamior syn, invalid 1 hrupy, jakoha jany hladzieli niekalki hod. Jany pradali dom z učastkam za 75 tysiač dalaraŭ i vyrašyli pryhledzieć sabie nieruchomaść u Turcyi. Hrošy ŭziali z saboj, raskazaŭ Alaksandr dla Onliner.
Zhodna z praviłami, Alaksandr Račkoŭski, u jakoha byli z saboj hrošy, pavinien byŭ iści praz čyrvony kalidor.
«Mnie było viadoma pra zialony kalidor: ja čuŭ i čytaŭ pra nieabchodnaść dekłaravać sumy zvyš 10 tysiač dalaraŭ pierad vyletam. I źbiraŭsia heta rabić», — kaža Alaksandr Mikałajevič.
Z saboj u jaho byli patrebnyja papiery: dakumient kupli-prodažu dla dokazu zakonnaha pachodžańnia sumy i prajekt damovy z tureckaj kampanijaj.
Kali padyšli da mytnaha punkta, žonka pajšła napierad — joj ničoha dekłaravać nie treba było. Na rukach — pašpart i kvitok. Astatniaje było ŭ jaho.
U aeraporcie Alaksandr pryhladaŭ za žonkaj. «Chvalavaŭsia za jaje — dumaŭ, što budu nazirać i dapamahu ŭ vypadku čaho. Dy i stresavy stan», — kaža jon.
Pa-druhoje, jamu treba było źviarnucca da inśpiektara. A ŭ čyrvonym kalidory nikoha nie było. Adziny čałaviek, u jakoha jon moh niešta spytać pra dekłaravańnie hrošaj, — supracoŭnica za «zialonaj» stojkaj. U sudzie heta paćvierdziłasia.
«Kali mianie spytali, ci treba mnie niešta dekłaravać, ja adrazu skazaŭ tak. Bo ja stajaŭ, nie prabiahaŭ. I skazaŭ, što mnie treba ŭ čyrvony kalidor. Ale mnie adkazali, što ja ŭžo ŭ zialonym i nazad darohi niama».
Chacia Alaksandr prajšoŭ uhłyb zialonaha kalidora mo 30 sm, što taksama paćvierdziłasia na sudzie.
«Ja dobraachvotna pradjaviŭ usie hrošy. Zusim nie było nijakaha žadańnia i padstavy ich chavać. U mianie byli dakumienty, jakija paćviardžajuć pachodžańnie», — raskazvaje Alaksandr.
Ale sud pastanaviŭ pryciahnuć Alaksandra Račkoŭskaha da administracyjnaj adkaznaści pavodle častki 2 art 15.5 KaAP — štrafu 10 bazavych vieličyń z kanfiskacyjaj u dachod dziaržavy hrošaj, nie zadekłaravanych va ŭstanoŭlenym paradku (60 800 dalaraŭ i 400 rubloŭ). 10 tysiač dalaraŭ viarnuli.
Rašeńnie suda moža być abskardžana.
Kamientary