«Я добраахвотна прад'явіў усе грошы». За ўваход на 30 см у зялёны калідор аэрапорта ў пенсіянера канфіскавалі $61 тысячу
Толькі за тое, што 65-гадовы мінчук ступіў за лінію зялёнага калідора, у яго канфіскавалі на карысць дзяржавы 61 тысячу даляраў. На судзе было пацверджана, што ён не меў ніякага намеру незаўважна праслізнуць праз яго.
Гэта здарэнне адбылося 11 ліпеня. Пенсіянеры Рачкоўскія збіраліся ляцець у Турцыю. Вясной у іх памёр сын, інвалід 1 групы, якога яны глядзелі некалькі год. Яны прадалі дом з участкам за 75 тысяч даляраў і вырашылі прыгледзець сабе нерухомасць у Турцыі. Грошы ўзялі з сабой, расказаў Аляксандр для Onliner.
Згодна з правіламі, Аляксандр Рачкоўскі, у якога былі з сабой грошы, павінен быў ісці праз чырвоны калідор.
«Мне было вядома пра зялёны калідор: я чуў і чытаў пра неабходнасць дэклараваць сумы звыш 10 тысяч даляраў перад вылетам. І збіраўся гэта рабіць», — кажа Аляксандр Мікалаевіч.
З сабой у яго былі патрэбныя паперы: дакумент куплі-продажу для доказу законнага паходжання сумы і праект дамовы з турэцкай кампаніяй.
Калі падышлі да мытнага пункта, жонка пайшла наперад — ёй нічога дэклараваць не трэба было. На руках — пашпарт і квіток. Астатняе было ў яго.
У аэрапорце Аляксандр прыглядаў за жонкай. «Хваляваўся за яе — думаў, што буду назіраць і дапамагу ў выпадку чаго. Ды і стрэсавы стан», — кажа ён.
Па-другое, яму трэба было звярнуцца да інспектара. А ў чырвоным калідоры нікога не было. Адзіны чалавек, у якога ён мог нешта спытаць пра дэклараванне грошай, — супрацоўніца за «зялёнай» стойкай. У судзе гэта пацвердзілася.
«Калі мяне спыталі, ці трэба мне нешта дэклараваць, я адразу сказаў так. Бо я стаяў, не прабягаў. І сказаў, што мне трэба ў чырвоны калідор. Але мне адказалі, што я ўжо ў зялёным і назад дарогі няма».
Хаця Аляксандр прайшоў углыб зялёнага калідора мо 30 см, што таксама пацвердзілася на судзе.
«Я добраахвотна прад'явіў усе грошы. Зусім не было ніякага жадання і падставы іх хаваць. У мяне былі дакументы, якія пацвярджаюць паходжанне», — расказвае Аляксандр.
Але суд пастанавіў прыцягнуць Аляксандра Рачкоўскага да адміністрацыйнай адказнасці паводле часткі 2 арт 15.5 КаАП — штрафу 10 базавых велічынь з канфіскацыяй у даход дзяржавы грошай, не задэклараваных ва ўстаноўленым парадку (60 800 даляраў і 400 рублёў). 10 тысяч даляраў вярнулі.
Рашэнне суда можа быць абскарджана.
Каментары