Hiermanija bje rekordy pa zachvorvańniach za ŭsiu pandemiju. Kažuć, asnoŭnaja vina na antyvaksierach
Kaliści Hiermanija była prykładam u baraćbie z kavidam. Ciapier ža niedavier da pryščepak spryjaje tamu, kab miascovyja pakazčyki pandemii ŭźlacieli na novy ŭzrovień.
Čaćviortaja chvala pandemii kavidu akazałasia dla Hiermanii samaj mocnaj. Kožny dzień prynosić dziasiatki tysiač novych chvorych na kavid i novych śmierciaŭ. Naprykład, za 15 listapada Hiermanija pabačyła adpaviedna 30483 novyja vypadki kavidu, ad chvaroby ŭ toj ža dzień pamierli 167 čałaviek.
Asnoŭnym ruchavikom ciapierašniaha i samaha ciažkaha etapa pandemii ŭ krainie stali antyvaksiery, piša New York Times.
Dla Hiermanii heta nievierahodny pavarot. Kali pandemija tolki pačynałasia, Hiermanija pakazała prykład taho, jak spraŭlacca ź virusam i trymać nizkim uzrovień śmierciaŭ. Kraina chutka arhanizavała paŭsiudnaje teściravańnie, pašyryła kolkaść miescaŭ u reanimacyjach i zabiaśpiečyła chvorych naležnym lačeńniem. Niemcy pabačyli ŭ asobie Anhieły Mierkiel lidara, jakomu možna daviarać, i pasłuchmiana vykonvali rekamiendacyi jaje ŭrada pa sacyjalnamu dystancyravańniu.
Ale siońnia Hiermanija bačyć novy ŭsplesk chvaroby. Siarod faktaraŭ, adkaznych za heta, nazyvajuć chałodnaje nadvorje, pavolnuju vakcynacyju bustarnymi pryščepkami i rost vypadkaŭ kavidu ŭ susiednich uschodniejeŭrapiejskich krainach — naprykład, u Čechii. Toje, što ŭ Hiermanii zaraz pierachodny pieryjad pamiž sychodam adnaho ŭrada i prychodam novaha, nie spryjaje efiektyŭnaj baraćbie z kryzisam.
Admova ad pryščepak jak ruchavik epidemii
Ekśpierty schodziacca ŭ mierkavańniach, što asnoŭnaja vina za novy ŭsplesk pandemii lažyć na tych niemcach, chto nie prajšoŭ vakcynacyju. Jašče ŭ pačatku leta miedyki papiaredžvali, što praz vysokuju zaraznaść štama «delta» treba vakcyniravać jak minimum 85% nasielnictva, kab paźbiehnuć kryzisa ŭ sistemie achovy zdaroŭja.
Siońnia ŭ Hiermanii ličba vakcyniravanych nie daciahvaje i da 70%. Heta bolš, čym u šmatlikich krainach Centralnaj i Ŭschodniaj Jeŭropy, adnak mienš, čym u bolšaść zachodniejeŭrapiejskich krain. Naprykład, u Bielhii, Danii i Italii try čverci nasielnictva prajšli poŭnuju vakcynacyju, a ŭ Partuhalii ličba vakcyniravanych nabližajecca da 90%.
Pryčyna takich nizkich ličbaŭ — niamieckija antyvaksiery, jakich asabliva šmat na terytoryi byłoj HDR. Vialikaj papularnaściu tam karystajecca ŭltrapravaja partyja «Alternatyva dla Hiermanii». Cikava, što Cina Krupała i Alis Vajdel, lidary frakcyi hetaj partyi ŭ parłamiencie, aboje admovilisia ad pryščepki — i aboje ŭ apošni čas zdali stanoŭčyja testy na kavid.
Kolkaść chvorych taksama raście ŭ častkach dźviuch paŭdniovych niamieckich ziemlaŭ — Bavaryi i ziamli Baden-Viurtenbierh. U hetych bahatych rehijonach duža papularny ruch Querdenker, što vystupaje suprać ahulnapryniatych mietadaŭ baraćby z kavidam.
Urady niekatorych niamieckich ziemlaŭ ciapier žadajuć uvieści bolš žorstkija miery baraćby z pandemijaj. Razmova idzie ŭ tym liku pra bolš strohija patrabavańni našeńnia masak i pra toje, što dla ŭvachodu ŭ hramadskija abjekty spatrebicca dokaz vakcynacyi ci pieraniesienaj infiekcyi. Adnak pakul nieviadoma, ci chopić hetych mier.
Kamientary