Što budzie rabić Biełaruś u vypadku vajny pamiž Rasijaj i Ukrainaj? Raźbirajemsia
Padčas narady ŭ Minabarony Łukašenka skazaŭ, što «kali tolki Ukraina pasprabuje raźviazać kanflikt z Rasijaj, u baku Biełaruś nie zastaniecca». A što, Ukraina choča vajny z Rasijaj? I čamu Biełaruś musić u hetym udzielničać? Spytali ŭ ekśpierta.
«Pa-pieršaje, u Kanstytucyi Biełarusi prapisany nie niejtralitet, a imknieńnie da niejtralitetu. U savieckija časy pisali, što my «imkniemsia da kamunizmu», voś tut sens prykładna taki ž, — kaža vajskovy analityk Alaksandr Alesin. — A zhodna z pahadnieńniami Sajuznaj dziaržavy, Biełaruś musić vystupić u abaronu sajuźnika ŭ vypadku ahresii adnosna Rasijskaj Fiederacyi».
Praściej kažučy, kali Rasija raźviazvaje niejkuju vajnu — Biełaruś nie abaviaznaja prymać u hetym udzieł. Kali ž vajnu z Rasijaj pačynaje inšaja dziaržava — tut Biełaruś musić dapamahčy Rasii.
Adpaviedna, kali vajnu z Ukrainaj pačynaje Rasija — biełaruskija vojski mohuć nie ŭdzielničać. Kali budzie vyrašana, što ahresiju pieršaj prajaviła Ukraina — Biełaruś musić padtrymać Rasiju.
«U nas tut jak u NATA: kali napadajuć na adnaho z členaŭ NATA, astatnija abavajazanyja vystupić u jaho abaronu, — tłumačyć Alesin. — Ale jość nievialiki niuans — na Danbasie ciapier niekalki socień tysiač rasijskich hramadzian, bo Rasija razdavała tam svaje pašparty.
I ŭ pryncypie, kali hetyja ludzi z rasijskimi pašpartami pacierpiać ad abstrełaŭ, to Rasija pry žadańni moža vykarystać heta jak ahresiju z boku Ukrainy i nahodu dla vajny. Toje ž samaje, kali, barani boža, niejki snarad zalacić z Ukrainy na rasijskuju terytoryju.
Ale ŭ vyniku vajny, što budzie rabić Biełaruś? Adpravić svaich sałdat u Rasiju? Sama napadzie na Ukrainu?
«Usio budzie zaležać ad taho, što budzie patrebna Rasii. RF vidavočna maje płan dziejańniaŭ, i ŭ pieršuju čarhu Rasii buduć patrebnyja nie suchaputnyja siły Biełarusi, a jaje aeradromy, darohi dla pierakidvańnia rakietnych kompleksaŭ.
Ja liču, što na pieršym etapie Rasija budzie vajavać nie suchaputnymi vojskami, a budzie atakavać punkty vajskovaj infrastruktury rakietnymi ŭdarami. Heta budzie z boku Čornaha mora, z padłodak i karabloŭ. Taksama ŭdary avijacyi. I ŭ vypadku nieabchodnaści, na terytoryju Biełarusi prybuduć «Iskandery», jakija z našaj terytoryi buduć vieści abstreł.
Paśla taho, jak terminały, aeradromy i hetak dalej buduć vybityja rakietami, tady Rasija prymienić suchaputnyja vojski ci siły śpiecapieracyj. Prykładna tak, na maju dumku, i budzie vyhladać vajna Rasii i Ukrainy», — miarkuje analityk.
Ale ci moža hetaja vajna nasamreč pačacca?
«Z punktu hledžańnia stratehičnych intaresaŭ Rasii, Ukrainy i Biełarusi, hetaja vajna nie vyhadnaja nikomu. Ale jaje moža spravakać palityka ŭnutry Ukrainy. Tam jość siły, jakija nie vielmi adekvatna aceńvajuć situacyju i mohuć uciahnuć Ukrainu bieź viedama kiraŭnictva ŭ hetuju vajnu.
To-bok, niejkija vajskoŭcy mohuć ździejśnić pravakacyju na miažy z Rasijaj ci niepryznanymi respublikami. I tady ŭsio budzie zaležać ad reakcyi Rasii — kali jana nie zacikaŭlenaja ŭ vajnie, to moža rascanić heta jak łakalny ŭzbrojeny kanflikt. Tak, jak u svoj čas byvała pamiž SSSR i Kitajem: kali było niekalki kanfliktaŭ, jakija nie pryviali da vajny.
Ale ž kali ŭ Rasii prymuć rašeńnie vyrašać ukrainskaje pytańnie adnym momantam i adrazu, to nie vyklučaju, što pravakacyja moža pryvieści navat da vajny. Praŭda, miarkuju, hety varyjant usio ž małavierahodny», — adznačaje Alaksandr Alesin.
Čytajcie taksama:
Łukašenka: Kali tolki Ukraina pasprabuje raźviazać kanflikt z Rasijaj, u baku Biełaruś nie zastaniecca
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy12
Kamientary