Vychoŭvaŭ kułakami. Na Stolinščynie 23-hadovy ajčym atrymaŭ 21 hod kałonii za zabojstva dziciaci

U sudzie abvinavačany raskazvaŭ, što nie chacieŭ zabivać dzicia. Pa jaho słovach, usio adbyłosia pa nieaściarožnaści. Kazaŭ, što biŭ chłopčyka, kab toj nie čapaŭ niebiaśpiečnyja pradmiety, maŭlaŭ, nie ŭjaŭlaŭ, što moh nanieści śmiarotnyja traŭmy dałońniu ruki, jakoj biŭ nie ŭ poŭnuju siłu. Tak, kułakami, ajčym vychoŭvaŭ hadavałaje dzicia. 

Z momantu źbićcia prajšło niekalki dzion. Jak stała viadoma ŭ sudzie, abvinavačany ŭhavaryŭ sužycielku, jakaja bačyła, što dzicia źbitaje, nie źviartacca pa miedycynskuju dapamohu.

14 śniežnia 2020 hoda chłopčyk pamior. Učastkovy doktar, jakaja viečaram taho dnia pryjechała da siamji, raskazała: siastra maci paviedamiła miedykam, što patrebnaja dapamoha małomu plamieńniku. Adnak na miescy doktar ubačyła: chłopčyk užo niežyvy. Jahonaja maci kryčała sužycielu, što toj vinavaty ŭ śmierci. 

Sama paciarpiełaja ŭ sudzie raskazała, što žyła z tryma dziećmi i sužycielem, jaki nieadznarazova zastavaŭsia doma ź jaje małym synam. Niezadoŭha da trahiedyi mužčyna vykazvaŭ pažadańni śmierci chłopčyku, kazaŭ pra nienaviść da jaho. Susiedzi havaryli žurnalistam, što ajčyma razdražniała, kali mały płakaŭ. 

Pavodle ekśpiertyzy, śmierć nastupiła ad zakrytaj čerapna-mazhavoj traŭmy, jakaja ŭskładniłasia aciokam, ściskańniem i źmiaščeńniem hałaŭnoha mozha. Na ciele dziciaci byli šmatlikija traŭmy, z ahladu vynikaje, što abvinavačany biŭ chłopčyka pa hałavie, hrudziach i pa žyvacie. U sudzie abvinavačany nie admaŭlaŭ, što 9 śniežnia, za piać dzion da śmierci, źbiŭ dzicia. 

Psichijatry praviarali stan samoha abvinavačanaha. U jaho dyjahnastavanaje lohkaje psichičnaje rasstrojstva, adnak jon moh uśviedamlać, što robić i da jakich nastupstvaŭ heta pryviadzie. U momant ździajśnieńnia złačynstva jon byŭ ćviarozy. Raniej mieŭ sudzimaść, za parušeńnie ŭmovaŭ adbyvańnia «chimii», jamu dadatkova dali paŭtary hady źniavoleńnia. Vynikovy prysud — 21 hod pazbaŭleńnia svabody, Viarchoŭny sud pakinuŭ jaho ŭ sile.

Nieviadoma, ci była pryciahnutaja da adkaznaści maci, jakaja pakinuła małoha syna z čałaviekam, jaki vykazvaŭ nianaviść i pažadańni śmierci małomu, a taksama jakaja nie źviarnułasia svoječasova pa miedycynskuju dapamohu, kab vyratavać syna. Pa spravie ab zabojstvie jana prachodziła jak paciarpiełaja. Žančyna nie zajaŭlała patrabavańnie ab pahašeńni materyjalnaj ci maralnaj škody.

• 0
• 0
• 0
• 0
• 0
• 0
• 0
• 0