«Nichto nie kazaŭ, što nazad nielha brać». Kiraŭniki raskazvajuć, jak vykručvajucca padčas zvalnieńniaŭ za palityku
«Naša Niva» ŭžo nie raz raskazvała pra «čornyja śpisy» tych, kaho treba zvolnić. Jak praviła, pa palityčnych matyvach. Pra śpisy ad KDB nam raskazvali rabotniki siłavych struktur, miedycynskaj, kulturnaj, navukovaj, budaŭničaj i inšych śfier. U vyniku takich «čystak», pa słovach našych surazmoŭcaŭ, pradpryjemstvy i arhanizacyi pazbaŭlajucca prafiesijanałaŭ. Jak ža być kiraŭnictvu?
Čystki kadraŭ iduć chvalami, ich łohika ŭžo stanovicca zrazumiełaj. U pieršaj chvali, jakaja dakaciłasia ŭžo amal da ŭsich arhanizacyj, pad skaračeńnie traplajuć tyja ludzi, jakija padpisvalisia za demakratyčnych kandydataŭ na vybarach 2020-ha. U druhuju chvalu traplajuć tyja, chto byŭ na akcyjach pratestu — heta vyśviatlajecca pa bilinhach mabilnaha telefona.
Tym, chto pavodle źviestak bilinhaŭ znachodziŭsia ŭ miescach, dzie prachodzili akcyi, časam davodzicca mieć razmovu z «asabistam» u prysutnaści načalstva i tłumačyć, naprykład, što «jechaŭ na tralejbusie pobač» ci «chadziŭ na rynak».
Kali ž čałaviek užo trapiŭ u śpis KDB, to zastacca na rabocie amal niemahčyma. A što, kali zvolnić treba šmat śpiecyjalistaŭ? Tady kiraŭniki prydumlajuć peŭnyja schiemy.
Jak raskazaŭ supracoŭnik adnoj z arhanizacyj, zvolnieny pa palityčnych matyvach supracoŭnik praciahvaje nieaficyjna pracavać.
«Sprava ŭ tym, što dyrektar hetaj arhanizacyi i jahony namieśnik u svoj čas trapili na pasady pa pratekcyi, — kaža naš surazmoŭca. — Jany ničoha nie razumiejuć u rabocie arhanizacyi. I kali hałoŭnaha śpiecyjalista zvolnili, jany vyrašyli jaho pakinuć, ale nieaficyjna. Ciapier jany skidvajucca sa svaich zarobkaŭ i płaciać jamu najaŭnymi. A jon praciahvaje rabić tuju ž samuju rabotu».
Jašče adna historyja źviazanaja z adnoj ź dziaržaŭnych budaŭničych arhanizacyj.
«Zvolnili jakasnych śpiecyjalistaŭ. Potym adspravazdačylisia ŭ KDB i ŭziali ludziej nazad, — kaža nam abaznanaja krynica. — Nichto nie kazaŭ, što nazad nielha brać, i pracavać niama kamu, usie pakazčyki byli b zavalenyja».
Inšyja kiraŭniki iduć na zaviedama niezakonnyja zvalnieńni, kab zachavać čałavieka na rabocie i vykanać patrabavańnie orhanaŭ ci vykankama.
«Ja zvalniaŭ ludziej absalutna kryva, tak, jak nielha było zvalniać. Zvalniaŭ u adpačynku, zvalniaŭ pa artykule ludziej bieź nivodnaha spahnańnia. Adpaviedna, jany hetaje rašeńnie abskardžvali, i sud adnaŭlaŭ ich na rabocie, takim čynam i ja, i vykankam zastavalisia zadavolenymi», — raskazaŭ nam adzin z pravincyjnych dyrektaraŭ.
***
Kali vam viadomyja inšyja historyi, to paviedamlajcie nam ich u telehram bot «Našaj Nivy». Heta ananimna i biaśpiečna.
Čytajcie taksama:
«Śpisy spuskaje KDB». Čytačy z usioj krainy paviedamlajuć pra novyja «palityčnyja» zvalnieńni
«Pracavać niama kamu». Na biełaruskaj čyhuncy — novaja chvala palityčnych zvalnieńniaŭ (dabralisia i da kiraŭnictva)
«Adčuvańnie, što heta bulinh, a nie pramaja linija». Staršynia Dziaržkamiteta sudovych ekśpiertyz emacyjna adreahavaŭ na pytańnie pra palityčnyja zvalnieńni
Ciapier čytajuć
Prateže łukašenkaŭskaha favaryta Baskava buduje akademiju ŭ Brazilii i Ńju-Vasiuki suśvietnaha maštabu7
Kamientary