Kudy možna źlatać na śviaty z Minska i kolki heta budzie kaštavać? Hladzim varyjanty
Čaściej za ŭsio pry nabyćci avijabiletaŭ dziejničaje pryncyp «čym raniej, tym lepš», ale daloka nie ŭsie tak robiać. Zrazumieła, navahodnija vakacyi — nie samy tanny čas dla padarožžaŭ, ale, niahledziačy na heta, niekatoryja biełarusy dumajuć ab tym, kab sustreć Novy hod za miažoj. «Naša Niva» paraŭnała košty na bilety pa «navahodnim» taryfie. My zrabili padborku tych krain, kudy spakojna možna vylecieć z Minska.
AAE
Pieralot u Dubaj ź Minska, naprykład, 24 śniežnia tudy i 30 śniežnia nazad abydziecca ŭ 1067 rubloŭ. Kali brać bilety paśla Novaha hoda, vylatać 2 studzienia, a viartacca 7-ha, to za ŭsio atrymajecca 1167 rubloŭ.
Dla ŭjezdu zamiežnych hramadzian u Dubaj i inšyja paŭnočnyja emiraty nieabchodny admoŭny PŁR-test na COVID-19. Siertyfikat ab vakcynacyi nie budzie padstavaj dla ŭjezdu.
Turcyja
Niatannym kurortam na navahodnija śviaty stanie Stambuł. Palacieć tudy 24 śniežnia, a viarnucca 30-ha «zavažyć» 1025 rubloŭ. Taki ž varyjant z vyletam 2-ha i viartańniem 7-ha abydziecca ŭ 805 rubloŭ.
Lacieć u Turcyju možna ź siertyfikatam ab vakcynacyi Sputnik V, a voś vakcyna Sputnik Lite nie prymajecca. Pasažyry, jakija nie rabili pryščepku, pavinny pakazać admoŭny vynik testa PŁR.
Hruzija
Ceny na avijabilety ŭ Tbilisi prykmietna daražejuć da navahodnich śviat. Kali płanavać pajezdku z 24 pa 30 śniežnia, to kvitki abyducca ŭ 942 rubli. Kali ž vylatać 3 studzienia, a viartacca 6-ha, to padarožža da Tbilisi budzie kaštavać 1254 rubli.
Vylecieć u Kutaisi 22 śniežnia, a viarnucca 29-ha možna za 486 rubloŭ. Takaja ž pajezdka ŭ pramiežak z 5 pa 9 studzienia abydziecca ŭ 1027 rubloŭ.
U Hruziju buduć puskać usich zamiežnikaŭ, jakija prajšli poŭny kurs vakcynacyi luboj kavid-vakcynaj, akramia Sputnik Lite. Dla hramadzian, jakija nie majuć pryščepki, patrebny admoŭny PŁR-test na COVID-19.
Uźbiekistan
Bilety ŭ Taškient z vyletam 24-ha śniežnia i viartańniem 29-ha možna nabyć za 853 rubli ŭ dva baki. Z 4 pa 8 studzienia pramy rejs budzie kaštavać takich ža samych hrošaj.
Siertyfikat ab vakcynacyi na ciapierašni momant nie budzie dastatkovaj umovaj dla ŭjezdu va Uźbiekistan. Usie zamiežniki, starejšyja za 2 hady, pavinny pakazać admoŭny PŁR-test na karanavirus.
Rasija
Padobna, što samyja tannyja avijabilety buduć u navahodnija śviaty da Maskvy. Padarožža z vyletam 24 i viartańniem 29 śniežnia abydziecca ŭ 479 rubloŭ za kvitki tudy-nazad. Kali ž vylatać 2 i viartacca 6 studzienia, to 295 rubloŭ.
Da Sankt-Pieciarburha možna budzie dabracca za 596 rubloŭ (u pramiežak 24-28 śniežnia), a kali adpraŭlacca 3 studzienia i viartacca 7-ha, to daviadziecca patracić 306 rubloŭ u dva baki.
Bilety pa maršrucie «Minsk — Krasnadar» u pieryjad z 24 pa 29 śniežnia buduć kaštavać 582 rubli ŭ dva baki. U pačatku studzienia — 554 rubli ŭ dva baki.
Siertyfikat ab vakcynacyi nie budzie padstavaj dla ŭjezdu ŭ Rasiju. Treba budzie pakazać admoŭny vynik PŁR-testa na COVID-19. Ale nie prosta pakazać, a zahruzić u dadatak «Padarožničaju biez COVID-19».
Armienija
Pramy rejs da Jerevana, kali lacieć 24 śniežnia tudy, a 30 nazad, abydziecca ŭ 547 rubloŭ. Taki samy košt budzie i ŭ studzieni.
U Armienii adobrany ŭsie vakcyny, jakija zarehistravanyja ŭ Biełarusi. Vakcynavanyja pryščepkaj Sputnik Lite mohuć pradjavić siertyfikat tolki z terminam 28 dzion paśla pryščepki.
Kazachstan
Bilety da Nur-Sułtana (tudy 24-ha, a nazad 29-ha śniežnia) «zavažać» 1372 rubli. U studzieni (vylet 2-ha, viartańnie 7-ha) cana ŭpadzie da 868 rubloŭ.
U pasažyraŭ pavinien być admoŭny vynik PŁR-testa na COVID-19, vydadzieny nie paźniej, čym za 3 dni da prybyćcia. Hetaje patrabavańnie nie raspaŭsiudžvajecca na hramadzian Respubliki Biełaruś, jakija vakcynavalisia adnoj z zarehistravanych vakcyn u Biełarusi.
Čamu tak doraha?
«Košt na avijabilety na pieryjad zimovych śviataŭ nie źmianiŭsia i farmirujecca pa standartnych ałharytmach, — kamientujuć «Našaj Nivie» dyjapazon cen u «Biełavija». — Pa kožnym kirunku ŭ avijakampanii apublikavanaja taryfnaja sietka — taryfy raźmierkavany pa brendach.
Dastupnaść miescaŭ u tym ci inšym taryfnym brendzie zaležyć ad dynamiki zahruzki rejsaŭ i kolkaści volnych miescaŭ. Takim čynam, na rejsach z vysokaj zahruzkaj košt biletaŭ budzie vyšejšym za tyja, dzie zahruzka nievysokaja. Tamu pry vybary bileta možna zaŭvažyć, što na adnym i tym ža napramku, ale ŭ roznyja daty, cana na bilety adroźnivajecca.
Uličvajučy vysoki popyt na rejsy ŭ pieradnavahodni pieryjad, vyjhrali tyja pasažyry, jakija nabyli avijabilety zahadzia. U pieryjady padvyšanaha popytu hetaja zakanamiernaść spracoŭvaje praktyčna zaŭsiody».
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary