Ministr ekanomiki: Pastanova № 991 — antykryzisnaja miera

Pastanova Savieta ministraŭ ad 28 lipienia 2009 hoda № 991 «Ab niekatorych pytańniach nabyćcia tavaraŭ na terytoryi Respubliki Biełaruś» źjaŭlajecca antykryzisnaj mieraj, zajaviŭ ministr ekanomiki Mikałaj Zajčanka ŭ efiry telekanała ONT 3 žniŭnia.

«Havoračy ab mecie pryniaćcia hetaj pastanovy ŭrada, ja pierš za ŭsio chacieŭ by adznačyć, što hetuju pastanovu treba razhladać jak antykryzisnuju mieru, — zajaviŭ Zajčanka. — Heta značyć u nas siońnia istotna abvastrylisia prablemy na ŭnutranym rynku, kali dastatkova vialikaja kolkaść pasrednikaŭ prapanujuć tavar, jaki prajšoŭ niekalki stupieniaŭ adzin ad adnaho, i adny i tyja ž subjekty haspadarańnia nabyvajuć tavar pa roznym košcie.

Tamu, kab pryvieści da adzinaha paradku tavarnyja patoki na našym rynku, voś heta, ja b skazaŭ, asnoŭnaja meta pryniaćcia hetaj pastanovy».

Jak adznačajecca ŭ kamientary Minekanomiki da pastanovy, jaki raźmieščany na sajcie ŭrada, dakumient pryniaty «ŭ metach zabieśpiačeńnia adzinaha paradku nabyćcia na terytoryi Respubliki Biełaruś tavaraŭ u pastaŭščykoŭ, jakija źjaŭlajucca vytvorcami tavaraŭ, a taksama ich aficyjnych handlovych pradstaŭnikoŭ va ŭmovach finansava‑ekanamičnaha kryzisu».

Pastanova nie raspaŭsiudžvajecca na tavary, jakija ekspartujucca, a taksama na dziejnaść indyvidualnych pradprymalnikaŭ i fizičnych asob.

Tavary, nabyćcio jakich rehulujecca inšymi, akramia pastanovy Savieta ministraŭ ad 28 lipienia 2009 hoda № 991, pravavymi aktami, «nabyvajucca ŭ adpaviednaści z hetymi pravavymi aktami (naprykład: mietały, naftapradukty, ałkaholnaja pradukcyja i h.d.)».

Nabyćcio tavaraŭ u niepasrednych vytvorcaŭ pastanova nie abmiažoŭvaje, adznačajecca ŭ kamientary.

Aficyjnym handlovym pradstaŭnikom «źjaŭlajecca haspadarčy subjekt, jaki buduje svaje ŭzajemaadnosiny z vytvorcam tavaraŭ na adpaviednaj dahavornaj asnovie».

U adpaviednaści z pastanovaj «u najbližejšy čas, pa zajavach aficyjnych handlovych pradstaŭnikoŭ, respublikanskija orhany dziaržaŭnaha kiravańnia, dziaržaŭnyja arhanizacyi, padparadkavanyja ŭradu, abłvykankamy, Minski harvykankam i Nacyjanalnaja akademija navuk Respubliki Biełaruś sfarmirujuć pieraliki aficyjnych handlovych pradstaŭnikoŭ, dakumientaŭ, jakija paćviardžajuć ich status i kryteryi ekanamičnaj abhruntavanaści nabyćcia tavaraŭ u aficyjnych handlovych pradstaŭnikoŭ».

Dahavory kupli‑prodažu (pastaŭki) tavaraŭ, «zaklučanyja i pačatyja vykanańniem» da 2 žniŭnia, dziejničajuć da zakančeńnia ich terminu biez prava praciahu. Novazaklučanyja dahavory kupli‑prodažu (pastaŭki) tavaraŭ pavinny adpaviadać pastanovie Savieta ministraŭ ad 28 lipienia 2009 hoda № 991.

Pradstaŭniki biźnies‑supolnaści na naradzie 2 žniŭnia zajavili, što buduć dabivacca admieny pastanovy.

Dźmitry Ułasaŭ, BiełaPAN

• 0
• 0
• 0
• 0
• 0
• 0
• 0
• 0