Hałoŭny enierhietyk Ukrainy: Biełaruś i Rasija stracili ŭkrainski enierhietyčny rynak nazaŭždy
Dałučeńnie enierhasistemy Ukrainy da jeŭrapiejskaj kantynientalnaj sietki ENTSO-E aznačaje, što Biełaruś i Rasija nazaŭždy stracili ŭkrainski rynak elektraenierhii, zajaviŭ 30 sakavika ŭ efiry telekanała «Kijeŭ» kiraŭnik praŭleńnia nacyjanalnaj enierhietyčnaj kampanii «Ukrenierha» Uładzimir Kudrycki, piša Radyjo Svaboda.
«Ukrainskija vytvorcy elektraenierhii atrymlivajuć dostup da vializnaha, hrandyjoznaha pa svaich maštabach jeŭrapiejskaha rynku, na jakim ceny ŭ niekalki razoŭ vyšejšyja za ŭnutranyja ŭkrainskija ceny. Heta aznačaje, što našyja pradpryjemstvy, naprykład, dziaržaŭny «Enierhaatam», inšyja dziaržaŭnyja i pryvatnyja hienieravalnyja kampanii zmohuć atrymlivać sotni miljonaŭ i miljardy jeŭra ekspartnaj vyručki, jakaja tak patrebnaja ciapier krainie», — skazaŭ Kudrycki.
«Adzinyja krainy, jakija pacierpiać ad hetaha abjadnańnia, — heta Rasija i jaje satelit Biełaruś, tamu što Ukraina, ukrainskaja enierhasistema adłučyłasia ad ich.
Biełaruś, naprykład, bolš nie zmoža pradavać svaju elektraenierhiju ź Biełaruskaj AES va Ukrainu. Heta značyć, jany stracili rynak elektraenierhii nazaŭždy. Taksama jany stracili enierhietyčny ryčah uździejańnia na Ukrainu, jaki da hetaha času, histaryčna, byŭ u ich rukach», — dadaŭ Kudrycki.
23 lutaha enierhasistema Ukrainy była izalavanaja ad Biełarusi i Rasii — dla testavych vyprabavańniaŭ, nazad jaje mielisia padłučyć 27 lutaha. Adnak z pryčyny napadu rasijskich vojskaŭ 24 lutaha Ministerstva enierhietyki Ukrainy pryniało rašeńnie nie viartać enierhasistemu ŭ paralelnuju pracu z Rasijaj i Biełaruśsiu, čyja terytoryja vykarystoŭvajecca dla naniasieńnia ŭdaraŭ z pavietra i prachodu suchaputnych vojskaŭ. 16 sakavika enierhasistema Ukrainy aficyjna stała častkaj ENTSO-E.
Pry hetym Ukraina była adzinym pakupnikom biełaruskaj elektraenierhii.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki42
Kamientary