Pasoł Ukrainy ŭ Biełarusi: Va ŭdziele Łukašenki ŭ pieramovach z Rasijaj sensu niama
Pasoł Ukrainy ŭ Biełarusi Ihar Kizim nie bačyć sensu i karyści ad udziełu pradstaŭnikoŭ Alaksandra Łukašenki ŭ ŭkrainska-rasijskich pieramovach. Pra heta jon napisaŭ 9 krasavika ŭ Fejsbuku.
Pavodle słoŭ pasła, sutnaść udziełu biełaruskaha boku ŭ takich pieramovach nie zmahli jamu rastłumačyć navat u MZS Biełarusi:
«Ahučanaja pieršakrynicaj inicyjatyva vyhladaje nastolki niezrazumiełaj, što mnie jaje nie zmahli tołkam rastłumačyć i ŭ MZS Biełarusi, dzie ŭčora ŭ mianie była sustreča. Havorka ž idzie pra ŭkrainska-rasijskija pieramovy?»
Pradstaŭnik Ukrainy nie razumieje, u jakoj jakaści režym Łukašenki chacieŭ by ŭdzielničać — u jakaści achviary, ahresara, miratvorca abo pasiarednika. Pry hetym jon nie bačyć karyści ad takoha ŭdziełu, bo biełaruskija ŭłady padtrymali ahresiju i dali svaju terytoryju dla ŭvarvańnia Rasii va Ukrainu i naniasieńnia rakietna-bombavych udaraŭ rasijskaj avijacyjaj pa ŭkrainskich haradach.
Ihar Kizim adznačaje, što Łukašenka padtrymlivaje nieprymalnyja dla Ukrainy patrabavańni Kramla i sensu ŭ jaho ŭdziele ŭ pieramovach niama. Usio, što Rasija choča skazać, jana skaža i biez Łukašenki.
Kizim paraiŭ prymianić upłyŭ Łukašenki na Pucina, kali jon jość, dla spynieńnia vajny, maradziorstva i vyvadu akupacyjnych vojskaŭ z terytoryi Ukrainy, a nie dla vystaŭleńnia Ukrainie ultymatumaŭ ab kapitulacyi.
«Kapitulacyi nie budzie. Ukrainski narod i našy ŭzbrojenyja siły dajuć heta zrazumieć ŭžo 46 dzion i rasijanam, jakich zusim nie kvietkami (jak jany spadziavalisia) sustrakajuć u ŭkrainskich, u tym liku «ruskamoŭnych» haradach, i tym, chto praciahvaje paŭtarać mantru pra «try braterskija słavianskija narody». Nie čas. Raspluščycie vočy, narešcie», — źviarnuŭsia ŭkrainski ambasadar da pradstaŭnikoŭ režymu.
Ciapier čytajuć
Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak2020
Kamientary