Što pahladzieć. «Prajekt «Adam» — padarožžy ŭ časie, zorny skład i vysokija rejtynhi na Netflix 

«Prajekt «Adam» pieraniasie vas u 2050 hod — tam ludzi ŭžo navučylisia padarožničać u časie z dapamohaj zvyšchutkich samalotaŭ i technałohii, što ŭmieje stvarać «kratovyja nory» ŭ časie. Hetaj technałohijaj skarystaŭsia piłot Adam Ryd — jon nakiroŭvajecca ŭ minułaje, kab znajści kachanuju, jakaja źnikła ŭ časie, i nie dać vykarystać takija padarožžy ŭ razburalnych metach.

Ale hieroja raniać, i jon prybyvaje ŭ niapravilny čas — zamiest 2018-ha jon prylataje ŭ 2022-i hod. Tam sustrakajecca z 12-hadovaj viersijaj siabie i sprabuje razam z saboj ža adšukać ułasnaha baćku-navukoŭca, što i prydumaŭ niekali mašynu času. Hałoŭnaja meta — zrabić tak, kab ludzi nikoli nie navučylisia padarožničać u časie.

«Prajekt «Adam» — užo druhaja za hod vialikabiudžetnaja historyja, jakuju razam ažyćciaŭlajuć režysior Šon Levi i akcior Rajan Rejnalds (pabačycie jaho ŭ roli Adama Ryda). Pieršaja sproba ich supracoŭnictva — kamiedyjny bajevik «Hałoŭny hieroj», jaki pry biudžecie ŭ 120 miljonaŭ dalaraŭ sabraŭ u prakacie 300 miljonaŭ. Levi i Rejnaldsu tak dobra ŭdajecca supracoŭničać, što Netflix davieryŭ im užo treci film — «Dedpuł-3».

Kali vy čakajecie ad «Prajekta» fantastyku ŭ duchu Krystafiera Nołana, to, napeŭna, budziecie rasčaravanyja. Heta prostaja historyja, zrazumiełaja ź pieršaha razu i biez dadatkovych tłumačeńniaŭ. Ale ž, upeŭnienyja, niekatoryja hledačy znojduć u hetym i plusy.

Levi raspaviadaŭ, što čaćviora scenarystaŭ zatracili na napisańnie historyi vosiem hadoŭ, pry hetym jany navukova patłumačyli teoryju padarožžaŭ u časie. Ale ž vynik hučaŭ zanadta składana, i režysior skarystaŭ taki pryjom: padčas hutarki z adnym z aŭtaraŭ jon skazaŭ jamu: «Ujavi, što ja tupy». Tady aŭtar patłumačyŭ kancepcyju prostymi słovami, i mienavita hety dyjałoh pierajšoŭ u kančatkovuju viersiju scenaryja.

Važnyja dla kožnaha temy

Ale ž prosty zusim nie aznačaje «prymityŭny». Nasamreč, «Prajekt «Adam» — niadrenny bajavik, jaki dakładna zdoleje zabiaśpiečyć vam pryjemny viečar. Bajavyja sceny pastaŭlenyja dobra, u kadry abajalny Rajan Rejnalds, humar jość, stužka nie daje zanudzicca — što jašče treba? 

Pavialičyć

Uličycie, što heta ž i nie samaja zvyčajnaja fantastyka. Tut vam nie buduć nadakučvać futurystyčnymi kadrami haradoŭ budučyni i raskazami pra postapakaliptyčnaje žyćcio, jak heta mahło b być u inšych filmach. Tak, juny Adam pytajecca ŭ svajoj darosłaj viersii, jakoje jano — žyćcio ŭ 2050-m, ale atrymoŭvaje tolki adkaz «Terminatar niervova kuryć u baku».

Hetaha chopić. Film daje zrazumieć, što stałaha Adama akružaje zusim inšy śviet, čym toj, što bačyŭ Adama-dzicia, ale ž heta nie hałoŭnaje. Bolš važnyja, naprykład, adnosiny Adama z maci, jakaja adna haduje jaho paśla śmierci baćki, i sproby Adama-padletka navučycca pastajać za siabie. 

Ryd atrymoŭvaje mahčymaść, jakaja, napeŭna, šmat kamu była b karysnaj: paznajomicca sa svajoj starejšaj viersijaj i atrymać šans nie narabić tych pamyłak, za jakija potym budzie soramna i baluča. Naprykład, nie kryŭdzić lišni raz maci, što stolki dla jaho robić i ledźvie znachodzić čas na siabie, ci nie biehčy ad sutyčki. I, narešcie, navučycca nie rabić baluča ludziam, jakija akružajuć ciabie.

Maleńkija pryjemnaści dla tych, chto pavažaje lehiendarnuju fantastyku 80-ch — tut vy znojdziecie cikavyja adsyłki. Naprykład, darosły Ryd zmahajecca z drennymi chłopcami z dapamohaj zbroi, što padazrona nahadvaje džedajski mieč, i pierahavorvajecca sa svajoj maładoj viersijaj pra padkazki na budučyniu ŭ styli tryłohii «Nazad u budučyniu».

Rejtynhi na suśvietnych resursach

IMDB — 6,7 / 10,

Rotten Tomatoes — 69%.

«Naša Niva» adnaŭlaje zbor danataŭ — padtrymać prosta

Čytajcie jašče:

Što pahladzieć. «Siadaj za rul majoj mašyny» — najlepšy zamiežny film «Oskara» 2022 hoda

Što pahladzieć. «Prydumlajučy Hannu» — sieryjał pra machlarku, jakoj niemahčyma nie začaravacca

• 2
• 0
• 0
• 0
• 1
• 0
• 2
• 0