Masavaja emihracyja stała klučavym faktaram taho, što ŭ minułym hodzie biełarusy pieratvarylisia ŭ adnaho z hałoŭnych dziejučych subjektaŭ na polskim rynku nieruchomaści. Za košt u paŭtara raza ŭzrosłaj aktyŭnaści fizičnych asob u kupli kvater i damoŭ u Varšavie, Urocłavie i inšych haradach Biełaruś apiaredziła Niderłandy i Vialikabrytaniju i zaniała čaćviortaje miesca ŭ rejtynhu zamiežnych pakupnikoŭ polskaj nieruchomaści, piša officelife.media.
Pavodle spravazdačy ministra ŭnutranych spraŭ i administracyi Polščy, pradstaŭlenaj niadaŭna ŭ polskim Siejmie,
ahulnaja płošča nabytaj u 2021 hodzie biełaruskimi hramadzianami i kampanijami nieruchomaści ŭ hetaj krainie skłała zvyš 42 tys. kv. m. Heta novy rekord ad času niezaležnaści Biełarusi.
Papiaredni maksimum byŭ zafiksavany ŭ 2019 hodzie, kali fizičnyja i jurydyčnyja asoby ź Biełarusi stali haspadarami kala 31 tys. kv. m žylla i kamiercyjnych płoščaŭ u Polščy. U 2020-m, dla paraŭnańnia, im byli vydadzienyja dazvoły na kuplu prykładna 27 tys. kv. m žyłoj i niežyłoj nieruchomaści.
Dva hady tamu biełaruskija hramadzianie i kampanii zmahli apiaredzić pa nabytych płoščach rezidentaŭ Francyi i Kipra, a pa vynikach 2021-ha jany zrabili heta jašče i ź niderłandcami i brytancami.
Takim čynam, biełarusy ŭpieršyniu ŭ historyi padnialisia na čaćviortaje miesca jak samyja aktyŭnyja kupcy polskaj nieruchomaści, prapuściŭšy napierad tolki ŭkraincaŭ, niemcaŭ i jurydyčnych dy fizičnych asob ź Luksiemburha.
Ale kali prysutnaść u top-10 pakupnikoŭ polskaj nieruchomaści Luksiemburha i Kipra i ŭ bolšaj miery Niderłandaŭ i Ispanii zabiaśpiečyli inviestujučyja ŭ hety siehmient kampanii, to asnoŭnyja płoščy na rachunak pakazčyka Biełarusi i astatnich krain ź dziasiatki ŭnieśli fizičnyja asoby.
Ciapier čytajuć
U Minsku pieradumali znosić chruščoŭki. Renavacyja zakranie dvuch-trochpaviarchovyja damy1
Kamientary