Hienštab Biełarusi: «Zachad viadzie padrychtoŭku da vajennych dziejańniaŭ na ŭschodnim napramku»
Členy NATA za hod udvaja naraścili siły va Uschodniaj Jeŭropie, a ŭdarnyja hrupoŭki mohuć być stvorany kala hranic Rasii i Biełarusi ŭ samyja karotkija terminy. Pra heta zajaviŭ načalnik hałoŭnaha ŭpraŭleńnia ‒ namieśnik načalnika Hienieralnaha štaba Uzbrojenych sił Biełarusi Rusłan Kasyhin, piša «Zierkało».
Pavodle jaho, supraćborstva pamiž Rasijaj i Zachadam siońnia pierachodzić u «faktyčna kryzisnuju situacyju».
Pryčynaj usiamu jon ličyć namier ZŠA «dabicca vajennaj pieravahi na suśvietnaj arenie, bałansujučy pry hetym na miažy vajny»:
— ZŠA i ich sajuźniki maksimalna naraścili kompleks antyrasijskich i antybiełaruskich žorstkich mier praktyčna pa ŭsich žyćciova važnych dla Rasii i Respubliki Biełaruś napramkach, pryčym tut u chod idzie ŭsio: ad hrubaha palityčnaha i ekanamičnaha šantažu, biesprecedentnaha na siońniašni dzień infarmacyjnaha cisku da pramych pahroz mahčymaha prymianieńnia vajennaj siły, ‒ zajaviŭ namieśnik načalnika Hienštaba.
Pry hetym, pavodle jaho słoŭ, «pašyrajucca maštaby i pavyšajecca intensiŭnaść mierapryjemstvaŭ», a zasiarodžanyja kala biełaruskaj miažy siły NATA (kala 37,5 tys. čałaviek), zabiaśpiečany sučasnym udarnym uzbrajeńniem, udvaja pieravyšajuć anałahičny pakazčyk 2021 hoda.
‒ Pa sutnaści, viadziecca padrychtoŭka da viadzieńnia vajennych dziejańniaŭ na ŭschodnim kirunku, a ŭdarnyja hrupoŭki mohuć być stvorany kala miežaŭ Rasii i Biełarusi ŭ samyja karotkija terminy, ‒ ličyć Kasyhin.
4 maja ŭ Biełarusi pačałasia raptoŭnaja pravierka sił reahavańnia — u Minabarony zajavili, što mierapryjemstvy, jakija pravodziacca, «nie niasuć nijakaj pahrozy ni dla jeŭrapiejskaj supolnaści ŭ cełym, ni dla susiednich krain u pryvatnaści».
24 lutaha paśla sumiesnych rasijska-biełaruskich vajskovych vučeńniaŭ Rasija napała na Ukrainu. Padstavaju, pavodle biełaruskaha boku, stała nibyta padrychtoŭka napadu na Biełaruś z boku Ukrainy.
53-hadovy Rusłan Kasyhin naradziŭsia ŭ Krymie, vučyŭsia ŭ Rasii, i adnosicca da hrupy prarasijskich siłavikoŭ, jakija kantralujuć biełaruskija siłavyja struktury.
Kamientary